କଂଗ୍ରେସ ଭବନରେ ପୁଲିସ ପଶି ପିଟିବା ଘଟଣାରେ ଏକାଠି ହେଲେ ନେତା । ୧୪ରେ ଏସପି ଅଫିସ ଘେରିବାକୁ କଂଗ୍ରେସ ଦେଲା ଚେତାବନୀ
କନକ ବ୍ୟୁରୋ: ଶୁକ୍ରବାର ଛାତ୍ର କଂଗ୍ରେସ ପକ୍ଷରୁ ବିଧାନସଭା ଘେରାଉ ବେଳେ ମୁହାଁମୁହିଁ ହୋଇଥିଲେ କର୍ମୀ ଓ ପୋଲିସ । ଘଟଣା ଉଗ୍ର ରୂପ ଧାରଣ କରିବାରୁ ପୋଲିସ କରିଥିଲା ଲାଠିଚାର୍ଜ । ଲୋୟର ପିଏମଜି ଠାରୁ ମାଷ୍ଟର କ୍ୟାଂଟିନ ପର୍ଯ୍ୟନ୍ତ କଂଗ୍ରେସ କର୍ମୀଙ୍କୁ ଗୋଡାଇ ଗୋଡାଇ ପିଟିଥିଲେ ସୁରକ୍ଷା ବଳ । ଏହି ସମୟରେ କିଛି କର୍ମୀ ପ୍ରାଣ ବିକଳରେ କଂଗ୍ରେସ ରାଜ୍ୟ କାର୍ଯ୍ୟାଳୟ ଭିତରକୁ ପଶିଯାଇଥିଲେ ମଧ୍ୟ କଂଗ୍ରେସ ଭବନ ଭିତରେ ପଶି ମାଡ ମାରିଥିଲା ପୋଲିସ । ତେବେ ଜାତୀୟ ରାଜନୈତିକ ଦଳର କାର୍ଯ୍ୟାଳୟ ଭିତରେ ପଶି ଆକ୍ରମଣକୁ ନେଇ ପୋଲିସକୁ ଘେରିଛନ୍ତି କଂଗ୍ରେସ ନେତା ।
Kanak News is now on WhatsApp
Join and get latest news updates delivered to you via WhatsApp
ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ବିରୋଧ କରି ଆସନ୍ତା ୧୪ ତାରିଖରେ ସମସ୍ତ ଜିଲ୍ଲାର ଏସପି ଅଫିସ ଆଗରେ ପ୍ରତିବାଦ କରିବ କଂଗ୍ରେସ । ଘଟଣାର ଉଚ୍ଚସ୍ତରୀୟ ତଦନ୍ତ ମଧ୍ୟ ଦାବି କରିଛି ରାଜ୍ୟ କଂଗ୍ରେସ । ମମିତା ହତ୍ୟା ମାମଲାରେ ସରକାରଙ୍କ ବିରୋଧରେ ଆନ୍ଦୋଳନ କରୁଥିବା ବେଳେ ପୋଲିସ ଉପରକୁ ଅଣ୍ଡା ଓ ଟମାଟୋ ମାଡ କରିଥିଲେ ବୋଲି କହିଛନ୍ତି କଂଗ୍ରେସ ନେତା ଓ କର୍ମୀ । ହେଲେ ପୋଲିସ ଢେଲା ମାଡର କଥା କହୁଛି । ଆଉ ସ୍ଥିତି ଏପରି ହୋଇଥିଲା ଯେ ରଣକ୍ଷେତ୍ର ପାଲଟିଯାଇଥିଲା ଲୋୟର ପିଏମଜି ।
ଯଦି କଂଗ୍ରେସ କର୍ମୀ ଟେକା ମାଡ କରିଥିବା ପ୍ରମାଣିତ ହୁଏ ତେବେ ସେ ରାଜନୀତିରୁ ସନ୍ୟାସ ନେବେ ବୋଲି ଚ୍ୟାଲେଞ୍ଜ କରିଛନ୍ତି ବିଧାୟକ ତାରା ବାହିନୀପତି । ଏପଟେ କଂଗ୍ରେସ କର୍ମୀ କରିଥିବା ବିଶୃଙ୍ଖଳା ଓ ପୋଲିସର କାର୍ଯ୍ୟାନୁଷ୍ଠାନ ନେଇ ଆରମ୍ଭ ହୋଇଛି ତର୍ଜମା ।