ଭାରତ ଯୋଡ ଯାତ୍ରାରେ ସାମିଲ ହେବେ ଅଖିଳେଶ, ମାୟାବତୀ ଓ ଜୟନ୍ତ ଚୌଧୁରୀ ! ଓପି ରାଜଭରଙ୍କୁ ବି ନିମନ୍ତ୍ରଣ
କନକ ବ୍ୟୁରୋ : କନ୍ୟାକୁମାରୀରୁ ଆରମ୍ଭ ହୋଇଥିବା କଂଗ୍ରେସର ଭାରତ ଯୋଡ ଯାତ୍ରା ଏବେ ଦିଲ୍ଲୀରେ ଚାଲିଛି । ଏହାପରେ ଏହି ଯାତ୍ରା ଖୁବଶୀଘ୍ର ଦେଶର ସବୁଠାରୁ ବଡ ରାଜ୍ୟ ଉତ୍ତରପ୍ରଦେଶରେ ପ୍ରବେଶ କରିବ । ଏହି କ୍ରମରେ କଂଗ୍ରେସ ତରଫରୁ ଉତ୍ତର ପ୍ରଦେଶରେ ଭାରତଯୋଡ ଯାତ୍ରାରେ ସାମିଲ ହେବାକୁ ବହୁଜନ ସମାଜବାଦୀ ପାର୍ଟିର ମୁଖ୍ୟ ସୁଶ୍ରୀ ମାୟାବତୀ, ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ଓ ରାଷ୍ଟ୍ରୀୟ ଲୋକଦଳର ମୁଖ୍ୟ ଜୟନ୍ତ ଚୌଧୁରୀଙ୍କୁ ନିମନ୍ତ୍ରଣ କରିଛି । ଏହାସହ ଓପି ରାଜଭରଙ୍କୁ ବି ନିମନ୍ତ୍ରଣ କରାଯାଇଥିବା କଥା ସୂଚନା ମିଳିଛି । ଏହା ବ୍ୟତୀତ କଂଗ୍ରେସର ବରିଷ୍ଠ ନେତା ସଲମାନ ଖୁର୍ସିଦ ବି ଏଠାରେ ଯୋଗଦେବାର କାର୍ଯ୍ୟକ୍ରମ ରହିଛି । ଜାନୁଆରୀ ୩ ତାରିଖରେ ଭାରତ ଯୋଡ ଯାତ୍ରା ଉତ୍ତର ପ୍ରଦେଶରେ ପ୍ରବେଶ କରିବ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉକି ଦେଶର ଅଖଣ୍ଡତା ଉପରେ ବିପଦ ଥିବା କଥା କହି କଂଗ୍ରେସ ଏହି ଭାରତ ଯୋଡ ଯାତ୍ରା ଆରମ୍ଭ କରିଛି । ଏହି କ୍ରମରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ହଜାର ହଜାର କଂଗ୍ରେସ କର୍ମୀଙ୍କ ସହ ଅନ୍ୟଦଳର ନେତା ଓ ଅଭିନେତାମାନେ ଏହି ଯାତ୍ରାରେ ସାମିଲ ହେଉଛନ୍ତି । ସେପଟେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରଣାଳୟ ପକ୍ଷରୁ କୋଭିଡ କଟକଣା ନେଇ ଭାରତ ଯୋଡ ଯାତ୍ରାକୁ ସ୍ଥଗିତ ରଖିବାକୁ ରାହୁଲ ଗାନ୍ଧୀଙ୍କୁ ପତ୍ର ଲେଖିଥିବା ବେଳେ ଏହାକୁ ଅଗ୍ରାହ୍ୟ କରିଛି କଂଗ୍ରେସ ।