ଓଡିଶାରେ ଏବର୍ଷ ଖରାଦିନେ କମ୍ ଗରମ: ରାଜ୍ୟ ଉପରେ ରହିବ ଲା-ନିନାର ପ୍ରଭାବ
କନକ ବ୍ୟୁରୋ: ଗ୍ରୀଷ୍ମ ରୁତୁକୁ ନେଇ ଭାରତୀୟ ପାଣିପାଗ ବିଭାଗର ଏହି ଆକଳନ ଆଶ୍ୱସ୍ତି ଆଣି ଦେଇଛି । ମାର୍ଚରୁ ମେ ମାସ ମଧ୍ୟରେ ରାଜ୍ୟରେ ସ୍ୱାଭାବିକଠାରୁ ତାପମାତ୍ରା କମ ରହିବ । ଅର୍ଥାତ୍ ବେଶି ଖରା ହେବ ନାହିଁ, ଏପରିକି ସ୍ଥାନେ ସ୍ଥାନେ ହାଲକା ବର୍ଷା ହେବାର ପୂର୍ବାନୁମାନ କରାଯାଇଛିି । ବିଶେଷ କରି ଉପକୂଳ ଓଡିଶା ସମେତ ମୟୂରଭଂଜ, କେନ୍ଦୁଝର, ଅନୁଗୁଳ, ଢେଙ୍କାନାଳ, ନୟାଗଡ, ବୌଦ୍ଧ ଆଦି ଜିଲ୍ଲାରେ ଗ୍ରୀଷ୍ମ ୩ ମାସ, ଦିନ ଓ ରାତିର ତାପମାତ୍ରା ସ୍ୱାଭାବିକ ଠାରୁ କମ ରହିବ ।
Kanak News is now on WhatsApp
Join and get latest news updates delivered to you via WhatsApp
ପାଣିପାଗ ବିଭାଗର ସୂଚନା ଅନୁସାରେ ଏବେ ପ୍ରଶାନ୍ତ ମହାସାଗରରୁ ଭାରତ ଭୂଖଣ୍ଡକୁ ଜଳୀୟ ବାଷ୍ପପୂର୍ଣ୍ଣ ବାୟୁ ପ୍ରବାହିତ ହେଉଛି । ଏହାସହ ଭାରତ ମହାସାଗର ଓ ପ୍ରଶାନ୍ତ ମହାସାଗରର ତାପମାତ୍ରା କମ ରହିଛି । ଏହାର ପ୍ରଭାବ ଭାରତ ଭୂଖଣ୍ଡ ଉପରେ ପଡୁଛି । ପାଣିପାଗ ବିଭାଗର ଆକଳନ ଅନୁସାରେ ଲା-ନିିନାର ପ୍ରଭାବ ଯୋଗୁଁ, ଚଳିତ ବର୍ଷ ଓଡିଶାରେ ଗ୍ରୀଷ୍ମ ମାସରେ କମ ଗରମ ଅନୁଭୁତ ହେବ ।
ପ୍ରଶାନ୍ତ ମହାସାଗର ଆଡୁ ଅଧିକ ଜଳକଣା ଯୁକ୍ତ ଶୀତଳ ବାୟୁ ଭାରତ ଭୂଖଣ୍ଡକୁ ପ୍ରବାହିତ ହେଉଛି । ସ୍ଥଳଭାଗରେ ଥିବା ଶୁଷ୍କ ତଥା ଗରମ ବାୟୁମଣ୍ଡଳ ସେହି ଶୀତଳ ବାୟୁ ସଂସ୍ପର୍ଶରେ ଆସି ବାଷ୍ପୀକରଣ ହେଉଛି । ଏହା ହେଉଛି ଲା-ଲିନା ପ୍ରଭାବ । ଏହା ଯୋଗୁଁ ଗ୍ରୀଷ୍ମ ରୁତୁରେ ଦିନର ତାପମାତ୍ରା ସ୍ୱାଭାବିକ ଠାରୁ କମ ରହୁଛି ।
ଲା-ନିିନା ପ୍ରଭାବ ଏବେ ଓଡିଶାରେ ସକ୍ରିୟ ରହିଛି । ତେଣୁ ମାର୍ଚ୍ଚରୁ ମେ ମଧ୍ୟରେ ରାଜ୍ୟରେ ସ୍ୱାଭାବିକରୁ ଅଧିକ ଖରା ଅନୁଭୂତ ହେବନି ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ଏପଟେ ଗତ ୨୪ ଘଂଟା ଭିତରେ ଓଡିଶାର କେତେକ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇଛି । ମୟୂରଭଂଜ ଜିଲ୍ଲା ବାଙ୍ଗିରିପୋଷିରେ ୨୦ ମିଲିିମିଟର ବର୍ଷା ରେକର୍ଡ କରାଯାଇଛି ।
ଲା-ନିିନା ପ୍ରଭାବରେ ଚଳିତ ବର୍ଷ ଓଡିଶାବାସୀଙ୍କ ପାଇଁ ଗ୍ରୀଷ୍ମ ରୁତୁ ଆଶ୍ୱସ୍ତିକର ହେବ ବୋଲି ପ୍ରାରମ୍ଭିକ ଆକଳନରୁ ଜଣାପଡିଛି ।