କନକ ବ୍ୟୁରୋ : ପ୍ରଥମେ ମହାରାଷ୍ଟ୍ର, ପରେ ବିହାର ଓ ଏବେ ଝାଡଖଣ୍ଡରେ ମୁଖ୍ୟମନ୍ତ୍ରୀ ପରିବର୍ତ୍ତନ ହୋଇପାରନ୍ତି । ଏନେଇ ବିଜେପି ସାଂସଦଙ୍କ ଟ୍ୱିଟ ପରେ ରାଜନୀତି ସରଗରମ ହେବାରେ ଲାଗିଛି । ବିଜେପି ସାଂସଦ ନିଶିକାନ୍ତ ଦୁବେଙ୍କ ଏକ ଟ୍ୱିଟ ପରେ ଝାଡଖଣ୍ଡରେ ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନ ହୋଇପାରନ୍ତି ବୋଲି ଚର୍ଚ୍ଚା ହେଉଛି । ଦୁବେ ଏକ ଟ୍ୱିଟରେ ଲେଖିଛନ୍ତି କି ଭାବିଜୀ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ତେଣୁ ପ୍ରସ୍ତୁତି ଆରମ୍ଭ କର । ସେ କାହାରି ନାମ ନେଇ ନଥିଲେ ବି ତାଙ୍କ ଟ୍ୱିଟ୍ ମୁତାବକ ଝାଡଖଣ୍ଡରେ ହେମନ୍ତ ସୋରେନଙ୍କ ସ୍ଥାନରେ ତାଙ୍କ ପତ୍ନୀ କଳ୍ପନା ସୋରେନ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ହେମନ୍ତ ସୋରେନଙ୍କ ଉପରେ ଅଫିସ ଅଫ୍ ପ୍ରଫିଟ ଭଳି ଅଭିଯୋଗ ଆସିବା ପରେ ଅଡୁଆରେ ପଡିଛନ୍ତି ହେମନ୍ତ । ସେପଟେ ଯଦି ଏଭଳି କିଛି ହେଉଛି ତେବେ ଝାଡଖଣ୍ଡବାସୀ ପ୍ରଥମଥର ପାଇଁ ରାଜ୍ୟର ମହିଳା ମୁଖ୍ୟମନ୍ତ୍ରୀ ଦେଖିବାକୁ ପାଇବେ । ହେମନ୍ତ ସୋରେନଙ୍କ ନାମରେ ଏଭଳି ଅଭିଯୋଗ ଆସିବା ପରେ ଦଳ ପକ୍ଷରୁ କିଛି ଖୋଲାଖୋଲି ମନ୍ତବ୍ୟ ଆସୁନଥିଲେ ବି ବିରୋଧୀ ବିଜେପି ଏନେଇ ଉଭୟ କଂଗ୍ରେସ ଓ ଜେଏମଏମ ଉପରେ ବର୍ଷିବାରେ ଲାଗିଛି ।
ଅନ୍ୟଏକ ଟ୍ୱିଟରେ ବିଜେପି ସାଂସଦ ନିଶିକାନ୍ତ ଦୁବେ ଦଳର ନେତା ଓ କର୍ମୀମାନଙ୍କୁ ଉପ ନିର୍ବାଚନ ପାଇଁ ପ୍ରସ୍ତୁତ ରହିବାକୁ ଆହ୍ୱାନ ଦେଇଛନ୍ତି । ଅନ୍ୟପଟେ ଆମେ ଝାଡଖଣ୍ଡ ବିଧାନସଭାର ସ୍ଥିତିକୁ ଅନୁଧ୍ୟାନ କଲେ ରାଜ୍ୟ ବିଧାନସଭାର ମୋଟ ୮୧ ଟି ଆସନ । ଏହା ମଧ୍ୟରୁ ଜେଏମଏ-୩୦, ଜାତୀୟ କଂଗ୍ରେସ ୧୬ ଓ ଆରଜେଡି ୧ ବିଧାନସଭା ଆସନ ଜିତିଛି । ଏହି ୩ ଦଳ ୪୭ ଜଣ ବିଧାୟକଙ୍କ ସମର୍ଥନରେ ସରକାର ଗଠନ କରିଛନ୍ତି ।
झारखंड में भाभी जी के ताजपोशी की तैयारी,परिवारवादी पार्टी का बेहतरीन नुस्ख़ा गरीब के लिए
— Dr Nishikant Dubey (@nishikant_dubey) August 19, 2022
ସେପଟେ ଏନଡିଏ ମେଣ୍ଟରୁ ବିଜେପି ୨୫, ଝାରଖଣ୍ଡ ବିକାଶ ମୋର୍ଚ୍ଚା ୩, ଅଲ ଝାରଖଣ୍ଡ ଷ୍ଟୁଡେଣ୍ଟ ୟୁନିୟନ ୨, ଜାତୀୟତାବାଦୀ କଂଗ୍ରେସ ୧ , ବାମଦଳ ୧ ଓ ୨ ଜଣ ସ୍ୱାଧୀନ ବିଧାୟକ ରହିଛନ୍ତି । ଏନଡିଏ ସମର୍ଥନରେ ୩୦ ଜଣ ବିଧାୟକ ରହିଛନ୍ତି । ଏନଡିଏକୁ ସରକାର ଗଠନ କରିବାକୁ ହେଲେ ୧୧ ଜଣ ବିଧାୟକଙ୍କର ଆବଶ୍ୟକତା ରହିଛି । ଏହାରି ମଧ୍ୟରେ କଂଗ୍ରେସ ଓ ଜେଏମଏମ ଭିତରେ ସଂପର୍କ ଠିକ୍ ନଥିବାରୁ ହେମନ୍ତ ସୋରେନ ୟୁପିଏ ମେଣ୍ଟ ଭାଙ୍ଗି ଏନଡିଏରେ ସାମିଲ ହୋଇ ପାରନ୍ତି ଓ ନିଜ ପତ୍ନୀ କଳ୍ପନାଙ୍କୁ ମୁଖ୍ୟମନ୍ତ୍ରୀ କରିପାରନ୍ତି ବୋଲି ରାଜନୈତିକ ବିଶ୍ଳେଷକମାନେ ମତ ଦେଉଛନ୍ତି ।