କନକ ବ୍ୟୁରୋ: ତ୍ରିରଙ୍ଗାମୟ ହୋଇ ଉଠିଥିଲା ଅଷ୍ଟ୍ରେଲିଆର ମେଲବର୍ଣ୍ଣ କ୍ରିକେଟ ଗ୍ରାଉଣ୍ଡ । ବିଶ୍ୱର ଦ୍ୱିତୀୟ ସବୁଠୁ ବଡ଼ କ୍ରିକେଟ ଗ୍ରାଉଣ୍ଡରେ ୧ ଲକ୍ଷରୁ ଉଦ୍ଧ୍ୱର୍ ଦର୍ଶକଙ୍କ ଭିଡ଼ ଭିତରୁ ଉଛୁଳି ଆସୁଥିଲା ଟିମ୍ ଇଣ୍ଡିଆ, ଟିମ୍ ଇଣ୍ଡିଆର ସ୍ୱର । ଏସିଆ କପ୍ ପରାଜୟର ପ୍ରତିଶୋଧ ନେଇଛି ଭାରତ । ଟି-ଟ୍ୱେଣ୍ଟି ବିଶ୍ୱକପ୍ ମ୍ୟାଚରେ ପୁଣିଥରେ ପାକିସ୍ତାନକୁ ଧୁଳି ଚଟାଇଛି ଭାରତ । ମେଲବର୍ଣ୍ଣ କ୍ରିକେଟ ଗ୍ରାଉଣ୍ଡରେ ଯେତିକି ଉତ୍ସବ ମନାଉଥିଲେ ଭାରତୀୟ ଫ୍ୟାନ । ତା’ଠାରୁ ଢ଼େର ଅଧିକ ଥିଲା କୋଟି କୋଟି ଭାରତୀୟଙ୍କ ମନର ଆବେଗ । ଦୀପାବଳି ପୂର୍ବରୁ ବାଣ ଫୁଟାଇ ଉତ୍ସବ ମନାଇଛନ୍ତି ଦେଶବାସୀ ।
Kanak News is now on WhatsApp
Join and get latest news updates delivered to you via WhatsApp
୧୬୦ ରନର ବିଜୟ ଲକ୍ଷ୍ୟକୁ ଦୃଷ୍ଟିରୁ ରଖି ବ୍ୟାଟିଂ କରିବା ପାଇଁ ପଡ଼ିଆକୁ ଓହ୍ଲାଇଥିଲେ ଅଧିନାୟକ ରୋହିତ ଶର୍ମା ଓ କେଏଲ୍ ରାହୁଲ । ବିଶ୍ୱର ଅନ୍ୟତମ ଶ୍ରେଷ୍ଠ ପେସ୍ ବୋଲର ସାହିନ ଆଫ୍ରିଦି ହାତରେ ବଲ୍ ଥିଲା, ଆଉ କୋଟି କୋଟି ଭାରତୀୟଙ୍କ ଛାତି ଧଡ଼ପଡ଼ ହେଉଥିଲା । ପାକିସ୍ତାନର ଦୁଦ୍ଧର୍ଷ ବୋଲିଂ ବାହିନୀର ମୁକାବିଲା କିପରି ଟିମ୍ ଇଣ୍ଡିଆ କରିବ, ଏ ନେଇ ସମସ୍ତଙ୍କ ନଜର ରହିଥିଲା । ଭାରତର ପ୍ରଥମ ତିନି ଜଣ ବ୍ୟାଟ୍ସସ୍ୟାନ ମଧ୍ୟ ପାକିସ୍ତାନ ବୋଲିଂ ଆଗରେ ୱିକେଟ୍ ଫୋପାଡି ଦେଇଥିଲା । ରୋହିତ, ରାହୁଲ ଉଭୟ ୪ ରନ୍ ଲେଖାଏଁ କରିଥିବା ବେଳେ ସୂର୍ଯ୍ୟ କୁମାର ଯାଦବ ୧୫ ରନ୍ କରି ଫ୍ୟାଭିଲିୟନକୁ ଫେରି ଯାଇଥିଲେ । ୱିକେଟ ପତନରେ ବ୍ରେକ୍ ଦେବା ପାଇଁ ଚତୁର୍ଥ ଡାଉନରେ ବ୍ୟାଟିଂ ପାଇଁ ଅକ୍ଷର ପଟେଲଙ୍କୁ ପଠାଇଥିଲା ଭାରତ । ସେ ମଧ୍ୟ ୨ ରନରେ ରନ ଆଉଟ୍ ହୋଇଥିଲେ । ୬ ଓଭର ଗୋଟିଏ ବଲରେ ମାତ୍ର ୩୧ ରନ୍ କରିଥିଲା ଭାରତ । ଅତ୍ୟଧିକ ରକ୍ଷଣାତ୍ମକ ଖେଳ, ଟିମ୍ ଇଣ୍ଡିଆର ବ୍ୟାଟିଂ ଲାଇନକୁ ଅସ୍ତବ୍ୟସ୍ତ କରି ଦେଇଥିଲା । କିନ୍ତୁ ବିରାଟ କୋହଲିଙ୍କ ମନରେ ଅନ୍ୟ କିଛି ଚାଲିଥିଲା ।
ଗୋଟିଏ ପଟେ ୱିକେଟ ସମ୍ଭାଳି ସ୍କୋରକୁ ଆଗକୁ ବଢ଼ାଇଥିଲେ ବିରାଟ । କୋହଲି ଓ ହାର୍ଦ୍ଦିକ ପାଣ୍ଡ୍ୟା ଭାରତୀୟ ପାଳିକୁ ସମ୍ଭାଳି ନେଇଥିଲେ । ୪୦ ରନ୍ କରିଥିବା ବେଳେ ଶେଷ ଓଭରର ପ୍ରଥମ ବଲ୍ରେ ଆଉଟ୍ ହେବା ପରେ ପୁଣିଥରେ ଖେଳର ମୋଡ ବଦଳି ଯାଇଥିଲା । ଏହାପରର ପ୍ରତ୍ୟେକ ବଲ୍ ଥିଲା ରୋମାଞ୍ଚକର । ଖେଳାଳିଙ୍କ ଉପରେ ଯେତିକି ଚାପ ରହିଥିଲା, ସେତିକି ଚାପ ଭିତରେ ଖେଳ ଦେଖୁଥିଲେ ଉଭୟ ଦେଶର ଖେଳପ୍ରେମୀ । ଛକା, ନୋ-ବଲ୍, ଦିନେଶ କାର୍ତିକଙ୍କ ୱିକେଟ୍ ସବୁକିଛି ଦେଖିବାକୁ ମିଳିଥିଲା ଶେଷ ଓଭରରେ । ତେବେ ଶେଷ ବଲ୍ରେ ବିଜୟୀ ହୋଇଥିଲା ଭାରତ । ୪ ୱିକେଟ୍ ହରାଇ ଭାରତକୁ ମିଳିଥିଲା ଏହି ସଫଳତା । ମାତ୍ର ୫୩ ବଲ୍ରେ ୮୨ ରନ୍ କରି କୋହଲି ସାଜିଥିଲେ ବିଜୟର ମହାନାୟକ । ସେଥିରେ ଥିଲା ୬ ଚୌକା, ୪ ଛକା ।
ମେଲବର୍ଣ୍ଣରେ ଯେତେବେଳେ ଭାରତ-ପାକିସ୍ତାନ ମଧ୍ୟରେ ମୁକାବିଲା ଆରମ୍ଭ ହୋଇଥିଲା, ସେତେବେଳେ ସାରା ବିଶ୍ୱର କୋଟି କୋଟି କ୍ରିକେଟ୍ ପ୍ରେମୀଙ୍କ ନଜର ଅଟକି ରହିଥିଲା । ମେଲବର୍ଣ୍ଣରେ ଖେଳ ହେଉଥିଲା, ଭାରତ-ପାକିସ୍ତାନର କୋଟି କୋଟି ଲୋକଙ୍କ ହୃଦସ୍ପନ୍ଦନ ବଢ଼ିଚାଲିଥିଲା । ପ୍ରଥମରୁ ହିଁ ବ୍ୟାଟ-ବଲ୍ର ସଂଘର୍ଷ ସମସ୍ତଙ୍କ ମନରେ ରୋମାଞ୍ଚ ଭରି ଦେଇଥିଲା । ରୋହିତ ଶର୍ମା ଟସ୍ ଜିତିବା ପରେ ପାକିସ୍ତାନଙ୍କୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ । ଭୁବନେଶ୍ୱର କୁମାରଙ୍କ ପ୍ରଥମ ବଲ୍ ହିଁ ସୂଚାଇ ଦେଇଥିଲା, ଯେ ରୋମାଞ୍ଚକର ହେବାକୁ ଯାଉଛି ମ୍ୟାଚ୍ । ଦ୍ୱିତୀୟ ଓଭର ବୋଲି କରିବାକୁ ଆସିଥିଲେ ଭାରତର ଯୁବ ସ୍ୱିଙ୍ଗ ବୋଲର ଅର୍ଶଦୀପ ସିଂହ । କ୍ୟାରିୟରରେ ପ୍ରଥମ ବିଶ୍ୱକପ୍ ପ୍ରଥମ ବଲ୍ରେ ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ତଥା ପାକିସ୍ତାନର କ୍ୟାପଟେନ୍ ବାବର ଆଜମଙ୍କୁ ଖାତା ଖୋଲିବା ପୂର୍ବରୁ ଏଲବିଡବ୍ୟୁ କରି ପ୍ୟାଭିଲିୟନକୁ ଫେରାଇ ଦେଇଥିଲେ । ଦ୍ୱିତୀୟ ଓଭରରେ ଟି-୨୦ର ଶ୍ରେଷ୍ଠ ବ୍ୟାଟ୍ସମ୍ୟାନ ମହମ୍ମଦ ରିଜୱାନଙ୍କୁ ମାତ୍ର ୪ ରନ୍ରେ ଆଉଟ୍ କରି ପାକିସ୍ତାନର ବଡ଼ ସ୍କୋର ଉପରେ ଲଗାମ ଲଗାଇ ଦେଇଥିଲେ ।
ତେବେ ତୃତୀୟ ୱିକେଟ୍ ଯୋଡ଼ି ସାନ ମାସୁଦ୍ ଓ ଇଫ୍ତିଖାର ଅହମ୍ମଦ ପାକିସ୍ତାନ ପାଳିକୁ ସମ୍ଭାଳି ନେଇଥିଲେ । ଅକ୍ଷର ପଟେଲଙ୍କ ବଲରେ ଇଫତିଖାରଙ୍କ ଗୋଟିଏ ପରେ ଗୋଟିଏ ଛକା, ଭାରତୀୟ ଫ୍ୟାନଙ୍କୁ ନିରାଶ କରି ଦେଇଥିଲା । କିନ୍ତୁ ମହମ୍ମଦ ସାମି, ଇଫ୍ତିଖାରଙ୍କ ୱିକେଟ୍ ନେବା ପରେ ପୁଣି ଥରେ ମ୍ୟାଚ ଫେରିଥିଲା ଭାରତ ପଟକୁ । ଏହା ପରେ ହାର୍ଦ୍ଦିକ ପାଣ୍ଡ୍ୟା ୩ଟି ୱିକେଟ୍ ନେଇ ପାକିସ୍ତାନକୁ ପଛରେ ପକାଇ ଦେଇଥିଲେ । ସେତେବେଳେ ପାକିସ୍ତାନର ସ୍କୋର ଥିଲା ୬ ୱିକେଟ୍ରେ ୧୧୫ । ତେବେ ସାହିନ ଆଫ୍ରିଦିଙ୍କ ଚୌକା, ଛକା ବଳରେ ସମ୍ମାନଜନକ ସ୍କୋରରେ ପହଁଚିଥିଲା ପାକିସ୍ତାନ । ସାନ ମାସୁଦ୍ ଓ ଇଫ୍ତିଖାର ଅହମ୍ମଦ ପାକିସ୍ତାନ ଉଭୟ ଅର୍ଦ୍ଧଶତକ କରିଥିବା ବେଳେ ପ୍ରଥମ ୱିକେଟର ପତନ ପରେ ଆସିଥିଲା ସାନ୍ ମାସୁଦ ଅନରାଜିତ ରହିଥିଲେ । ୮ ୱିକେଟ୍ରେ ୧୫୯ ରନ୍ରେ ଅଟକିଥିଲା ପାକିସ୍ତାନର ସ୍କୋର । ଏସିଆ କପ୍ରେ ନୈରାଶ୍ୟଜନକ ପ୍ରଦର୍ଶନ ପରେ ଭାରତୀୟ ବୋଲିଂ ବାହିନୀର ଏହା ଥିଲା ଚିତାକର୍ଷକ ପ୍ରଦର୍ଶନ । ୧୬୦ ରନ୍ର ଟାର୍ଗେଟକୁ ଆଖି ଆଗରେ ରଖି ପଡ଼ିଆକୁ ଓହ୍ଲାଇଥିଲା ଟିମ୍ ଇଣ୍ଡିଆ । ବିରାଟ କୋହଲୀଙ୍କ ଦମଦାର ପ୍ରଦର୍ଶନ ଯୋଗୁଁ ମେଲବର୍ଣ୍ଣରେ ଇତିହାସ ରଚିଲା ଭାରତ ।