୧୮ରେ ଘୂର୍ଣ୍ଣିବଳୟ ହେବା ନେଇ ଆଂଚଳିକ ପାଣିପାଗ କେନ୍ଦ୍ରର ସୂଚନା । ଆଇଏମଡି କହିଲା ଆଗାମୀ ୫ ଦିନ ଯାଏଁ ନାହିଁ ବାତ୍ୟାର ସୂଚନା, ଆମେରିକା ଓ ୟୁରୋପର ମଡେଲ ବାତ୍ୟା ଆଶଙ୍କା ନେଇ କରୁଛନ୍ତି ପୂର୍ବାନୁମାନ ।
କନକ ବ୍ୟୁରୋ : ଘୂର୍ଣ୍ଣିବଳୟ ନେଇ ପୂର୍ବାନୁମାନ କରିଛନ୍ତି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତା ୧୮ ତାରିଖ ବେଳକୁ ଉତ୍ତର ଆଣ୍ଡାମାନ ସାଗର ଏବଂ ତାର ପାଶ୍ୱର୍ବର୍ତୀ ଅଂଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି । ହେଲେ ଆସନ୍ତା ୫ ଦିନ ଭିତରେ ବାତ୍ୟା ସମ୍ପର୍କରେ କୌଣସି ସୂଚନା ନାହିଁ । ପୂର୍ବରୁ ୟୁରୋପ ଓ ଆମେରିକାର ପାଣିପାଗ ମଡେଲ ବାତ୍ୟା ଆସୁଥିବା ନେଇ ଆକଳନ କରି ସାରିଛନ୍ତି । ହେଲେ ବାତ୍ୟାକୁ ଗୁଜବ କହି ସାରିଛି ଆଇଏମଡି ।
Kanak News is now on WhatsApp
Join and get latest news updates delivered to you via WhatsApp
ବିଦେଶୀ ପାଣିପାଗ ମଡେଲ ବାତ୍ୟା ଆସୁଥିବା ନେଇ ଆକଳନ କରୁଥିବା ବେଳେ ଘୂର୍ଣ୍ଣିବଳୟ ନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।
୧୮ ତାରିଖରେ ଉତ୍ତର ଆଣ୍ଡାମାନ ସାଗର ଏବଂ ତା’ର ପାଶ୍ୱର୍ବର୍ତ୍ତୀ ଅଂଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହେବା ସମ୍ଭାବନା
ଆସନ୍ତା ୫ ଦିନ ମଧ୍ୟରେ ସାମୁଦ୍ରିକ ଝଡ଼ର ସୂଚନା ନାହିଁ
ଘୂର୍ଣ୍ଣିବଳୟ ନେଇ ପୂର୍ବାନୁମାନ କରିଥିବା ବେଳେ ୧୨୦ ଘଣ୍ଟା ମଧ୍ୟରେ ବାତ୍ୟା ସଂପର୍କରେ କିଛି ସୂଚନା ନାହିଁ ବୋଲି କହିଛି ଭାରତୀୟ ପାଣିପାଗ ବିଭାଗ । ଏପଟେ ଆଜି ମଧ୍ୟ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜାରି ରହିଛି । ୧୬ ଓ ୧୭ ତାରିଖରେ ବର୍ଷାର ପରିମାଣ କମିବ ବୋଲି ସୂଚନା ଦେଇଛନ୍ତି ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶକ ।
ୟୁରୋପୀୟ ପାଣିପାଗ ମଡେଲ ଇସିଏମଡବ୍ଲୁଏଫର ଆକଳନ ଅନୁସାରେ ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ଘୂର୍ଣ୍ଣିବଳୟ ଅବପାତରେ ପରିଣତ ହେବ । ଏହା ଭୀଷଣ ସାମୁଦ୍ରିକ ଝଡର ରୂପ ନେଇପାରେ । ବାତ୍ୟାକୁ ନେଇ ଆମେରିକାର ପାଣିପାଗ ମଡେଲ ‘ଜିଏଫଏସ୍’ ପୂର୍ବରୁ ସମାନ ଆଶଙ୍କା କରିଥିଲା । ୱିଣ୍ଡି ଯେଉଁ ଚିତ୍ର ଦର୍ଶାଉଛି, ତାହା ମଧ୍ୟ ବାତ୍ୟା ଆଡକୁ ଇଙ୍ଗିତ କରୁଛି । ତେବେ ବାତ୍ୟା ନେଇ କୌଣସି ପୂର୍ବାନୁମାନ କରିନାହିଁ ଆଇଏମଡି ।