ଦୁର୍ନୀତି ବିରୋଧରେ ରାଜ୍ୟ ସରକାରଙ୍କ ଜିରୋ ଟଲରେନ୍ସ ନୀତି : ଲାଞ୍ଚ ନେଇ ଧରାପଡିବା ପରେ ନିଲମ୍ବିତ ହେଲେ ଆଇଏଏସ ଅଧିକାରୀ
କନକ ବ୍ୟୁରୋ : ଲାଞ୍ଚ ନେଇ ନିଲମ୍ବିତ ହୋଇଛନ୍ତି ଆଇଏଏସ ଅଫିସର । ସରକାରୀ କର୍ମଚାରୀ ଲାଞ୍ଚ ନେଇ ଜେଲ୍ ଯିବା ଆପଣ ଜାଣିଥିବେ । ଜେଇ ଠାରୁ ଆରମ୍ଭ କରି କିରାଣୀ ଓ ଅନ୍ୟ ଅଧିକାରୀ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଜାଲରେ ପଡ଼ିବା ନିତିଦିନିଆ କାହାଣୀ । ହେଲେ ଆଜି ଲକ୍ଷେ ଟଙ୍କାର ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାବୁଡ଼ରେ ପଡିଛନ୍ତି ଆଇଏଏସ୍ ଅଫିସର୍ । ଉଦ୍ୟାନ କୃଷି ବିଭାଗ ନିର୍ଦ୍ଦେଶକ ବିଜୟ କେତନ ଉପାଧ୍ୟାୟଙ୍କୁ ଗିରଫ କରିଛି ଭିଜିଲାନ୍ସ । ଗିରଫ ହେବା ପରେ ତାଙ୍କୁ ନିଲମ୍ବନ କରିଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ଦେଶର ସବୁଠୁ ମର୍ଯ୍ୟାଦାଜନକ ଚାକିରି ଭାରତୀୟ ପ୍ରଶାସନିକ ସେବାର ଅଧିକାରୀ ହୋଇ, ଦେଶ ସେବା କରିବାକୁ ପ୍ରତିଶ୍ରୁତି ଦେଇଥିବା ଏହି ଅଫିସର ନିଜ ବୃତ୍ତିରେ କଳଙ୍କର ଦାଗ ଳଗାଇ ଦେଇଛନ୍ତି । ଲକ୍ଷେ ଟଙ୍କା ଲାଞ୍ଚ ନେଉଥିଲେ ଆଇଏଏସ୍ ଅଫିସର ବିଜୟକେତନ ଉପାଧ୍ୟାୟ । ତେବେ ପୂର୍ବରୁ ସୂଚନା ପାଇ ପ୍ରସ୍ତୁତ ରହିଥିଲା ଭିଜିଲାନ୍ସ । ଟଙ୍କା ନେବା ବେଳେ ଧରା ପଡ଼ିଥିଲେ ଏହି ଆଇଏଏସ ଅଧିକାରୀ । ଏହା ପରେ ତାଙ୍କୁ କାର୍ଯ୍ୟରୁ ନିଳମ୍ବନ କରାଯାଇଛି ।
ମୋ ସରକାର କାର୍ଯ୍ୟକ୍ରମ ଆରମ୍ଭ ହେବା ପରେ ହୋଇଛି ସବୁଠୁ ବଡ଼ କାର୍ଯ୍ୟାନୁଷ୍ଠାନ । ଲାଞ୍ଚ ନେଇ ଧରାପଡ଼ିବା ପରେ ଆଇଏଏସ୍ ଅଧିକାରୀ ବିଜୟ କେତନ ଉପାଧ୍ୟାୟଙ୍କୁ ନିଲମ୍ବନ କରିଛନ୍ତି ସରକାର । କେବଳ ତଳତଳିଆ କର୍ମଚାରୀ ନୁହେଁ, ଆଇଏଏସ୍ ଅଫିସର୍ଙ୍କ ବିରୋଧରେ ବି ସରକାର ନେଇଛନ୍ତି କଠୋର ଆଭିମୁଖ୍ୟ । ସେପଟେ ତାଙ୍କର ଘର, ଶ୍ୱଶୁର ଘର, ଅଫିସ, ସରକାରୀ ବାସଭବନ ଉପରେ ଏକ କାଳୀନ ଚଢ଼ାଉ କରିଛି ଭିଜିଲାନ୍ସ ।
୧୦ ବର୍ଷର ଚାକିରି ଭିତରେ ଏହି ଆଇଏଏସ ଅଫିସରଙ୍କ ସଂପତି ଦେଖି ତାଜୁବ ହୋଇଯାଇଛନ୍ତି ଭିଜିଲାନ୍ସ ଅଧିକାରୀ । ତାଙ୍କର ସୋରସ୍ଥିତ ବାସଭବନ ଉପରେ ୨ଟି ଭିଜିଲାନ୍ସ ଟିମ୍ ଚଢ଼ାଉ କରିଛନ୍ତି । ଏହି ସମୟ ମଧ୍ୟରେ କେତେ ସଂପତି ଅର୍ଜନ କରିଛନ୍ତି, ଚାଲିଛି ଖୋଳତାଡ଼ । ସେହିପରି ତାଙ୍କ ଶ୍ୱଶୁର ଘର ଓ ହର୍ଟିକଲଚର ଅଫିସ ଉପରେ ବି ଭିଜିଲାନ୍ସ ରେଡ୍ କରିଛି । ଭୁବନେଶ୍ୱର ସ୍ଥିତ ସରକାରୀ ବାସଭବନ ଉପରେ ଛାପା ମାରି ଆୟ ବହିର୍ଭୁକ୍ତ ସଂପତି ଆକଳନ କରୁଛି ଭିଜିଲାନ୍ସ । ଦୀର୍ଘଦିନ ଧରି ସଂଦେହ ଘେରରେ ଥିଲେ ଆଇଏଏଏସ ଅଧିକାରୀ ବିଜୟକେତନ ଉପାଧ୍ୟାୟ । ତାଙ୍କର ପ୍ରତ୍ୟେକ ଗତିବିଧି ଉପରେ ନଜର ରଖିଥିଲା ଭିଜିଲାନ୍ସ ।