କନକ ବ୍ୟୁରୋ : ନିର୍ବାଚନରେ ହାରିବା ପରେ ଅସହ୍ୟ ହେଲା ଟାହିଟାପରା । ପରାଜିତ ପ୍ରାର୍ଥୀଙ୍କ ସ୍ୱାମୀ ବିଷ ପିଇ ଆତ୍ମହତ୍ୟା କରିଦେବା ପରେ ଆତ୍ମହତ୍ୟା ଉଦ୍ୟମ କରିଥିବା ସ୍ତ୍ରୀ ମଧ୍ୟ ପ୍ରାଣ ହରାଇଛନ୍ତି । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ପଦ୍ମପୁର ପଞ୍ଚାୟତରୁ ଏଭଳି ଦୁଃଖଦ ଖବର ସାମ୍ନାକୁ ଆସିବା ପରେ ପ୍ରଶ୍ନ ଉଠୁଛି ଆତ୍ମହତ୍ୟା ପାଇଁ ପ୍ରବର୍ତ୍ତାଇ ଥିବା ଅଭିଯୋଗରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ କି?
Kanak News is now on WhatsApp
Join and get latest news updates delivered to you via WhatsApp
ସହିପାରିଲେନି ବିଜୟ ପ୍ରାର୍ଥୀ ସମର୍ଥକଙ୍କ ଟାହିଟାପରା । ଆତ୍ମହତ୍ୟା କରିଦେଲେ ସ୍ୱାମୀ । ଆଉ ସ୍ୱାମୀଙ୍କ ଦଶାହରେ ଆଖିବୁଜିଦେଲେ ଆତ୍ମହତ୍ୟା ଉଦ୍ୟମ କରିଥିବା ପତ୍ନୀ ସୁମତୀ ପରିଡା । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଅନ୍ତର୍ଗତ ପଦ୍ମପୁର ପଞ୍ଚାୟତରୁ ଏଭଳି ଦୁଃଖଦ ଖବର ସାମ୍ନାକୁ ଆସିବା ପରେ ଆଲୋଡନ ଖେଳିଯାଇଛି ।
ପଦ୍ମପୁର ପଞ୍ଚାୟତରେ ଗତ ୧୩ ତାରିଖରେ ବିଜେଡିର ବିଜୟ ଶୋଭାଯାତ୍ରା ଚାଲିଥିଲା । ଆଉ ହାରିଥିବା ସମିତି ସଭ୍ୟା ପ୍ରାର୍ଥୀ ସୁମତୀ ପରିଡାଙ୍କ ଘର ଆଗରେ ଶୋଭାଯାତ୍ରା ଯାଉଥିବାବେଳେ ସୁମତୀଙ୍କ ସ୍ୱାମୀ ରମାକାନ୍ତ ପରିଡା ଘର ଆଗରେ ଛିଡା ହୋଇଥିଲେ । ଆଉ ତାଙ୍କୁ ଦେଖି ଶୋଭାଯାତ୍ରାରେ ଯାଉଥିବା ସମର୍ଥକ ତାଙ୍କୁ ଟାହିଟାପରା କରିଥିଲେ । ଫଳରେ ରମାକାନ୍ତ ଆତ୍ମହତ୍ୟା କରିଦେଇଥିଲେ । ଏହାପରେ ସୁମିତୀ ମଧ୍ୟ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ ।
ଘଟଣା ନେଇ ଥାନାରେ ଦାୟର ହୋଇଥିବା ମାମଲାରେ ୬ ଜଣଙ୍କ ନାଁ ରହିଛି । ଏମାନେ ହେଲେ ଅଶୋକ କୁମାର ନାୟକ, କୃପାସିନ୍ଧୁ ନାୟକ, ମନୋଜ ରାୟ, ରଶ୍ମିକାନ୍ତ ନାୟକ ଓ ତପନ କୁମାର ନାୟକ । ତେବେ ପ୍ରଶ୍ନ ଉଠୁଛି…..
- ଏମାନଙ୍କ ବିରୋଧରେ ସଙ୍ଗୀନ ଦଫା ଲାଗିବ କି ?
- ପୁଲିସ କିଛି ଦୃଷ୍ଟାନ୍ତମୂଳକ ପଦକ୍ଷେପ ନେବ କି?
ବାସୁଦେବପୁର ଅଞ୍ଚଳର ଏହି ଘଟଣାରେ ପରିବାର ଲୋକେ ହତବାକ ହୋଇଯାଇଛନ୍ତି । ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ଏବେ ଅପେକ୍ଷା ଏ ବାବଦରେ ପୁଲିସ ଆଗକୁ କି କାର୍ଯ୍ୟାନୁଷ୍ଠାନ ନେଉଛି ।