୫ ମାସ ପରେ ପୁଣି ରାଜଧାନୀକୁ କବଜାକୁ ନେଲେ ଡ୍ରାଇଭର । ବିଭିନ୍ନ ଦାବିରେ ଲୋୟର ପିଏମଜିରୁ ଲୋକସେବା ଭବନ ଯାଏଁ ରାଲି ଓ ରାସ୍ତାରୋକ
କନକ ବ୍ୟୁରୋ: ଡ୍ରାଇଭର ସଂଘ ସହ ଆଲୋଚନା ପରେ ୩ ମାସର ସମୟ ନେଇଛନ୍ତି ରାଜ୍ୟ ସରକାର । କିନ୍ତୁ ଏହାକୁ ନେଇ ଏବେ ସଂଘ ମଧ୍ୟରେ ଫାଟ ଦେଖାଦେଇଛି । ଆସନ୍ତାକାଲି ପାଇଁ ଷ୍ଟିଅରିଂ ଛାଡ ଆନ୍ଦୋଳନ କରିବାକୁ ଆହ୍ୱାନ ଦେଇଛି ଗୋଟିଏ ଗୋଷ୍ଠୀ । ତେବେ ଆଜି ହଠାତ୍ ରାଜ୍ୟର ଡ୍ରାଇଭର ସଂଘ ରାଜଧାନୀକୁ କବଜା କରିନେଇଥିଲେ । ସକାଳୁ ସକାଳୁ ଠେଙ୍ଗା ବାଡି ଧରି ଡ୍ରାଇଭରମାନେ ରାଜଧାନୀ ରାଜରାସ୍ତାରେ ଦେଖିବାକୁ ମିଳିଥିଲା । ଯାହାକୁ ନେଇ ପୁଲିସ ମଧ୍ୟ ଅଡୁଆରେ ପଡିଥିଲା । ଆଉ ରାଜଧାନୀରେ ଉପୁଜିଥିଲା ଚକା ଜାମ ପରିସ୍ଥିତି । ତେବେ ହଠାତ ଏତେ ଭିଡ ହେବ ବୋଲି କେମିତି ଜାଣିପାରିଲାନି ପ୍ରଶାସନ? ସେ ନେଇ ପ୍ରଶ୍ନ ଉଠିଛି ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷ ଅକ୍ଟୋବର ୨୯ରେ ଯେମିତି ଅଚାନକ ରାଜ୍ୟ ରାଜଧାନୀ ଭୁବନେଶ୍ୱରକୁ କବଜାକୁ ନେଇଥିଲା ଡ୍ରାଇଭର ସଂଘ, ସମାନ ଢଙ୍ଗରେ ପୁଣି ରାଜଧାନୀରେ ହଜାର ହଜାର ଡ୍ରାଇଭରଙ୍କ ଭିଡ । ବିଭିନ୍ନ ଦାବିନେଇ ଆନ୍ଦୋଳନ କରିବାକୁ ରବିବାର ରାତିରୁ ପହଞ୍ଚି ଯାଇଥିଲେ ଡ୍ରାଇଭର । ସୋମବାର ସକାଳ ପାହିଲା ବେଳକୁ ହାତରେ ଠେଙ୍ଗାବାଡି ଧରି ରାଜଧାନୀ ରାଜରାସ୍ତାକୁ କବଜାକୁ ନେଇ ସାରିଥିଲେ । ସିଧାସଳଖ ଲୋକସେବା ଭବନ ସମ୍ମୁଖରେ ପହଞ୍ଚି ଶକ୍ତି ପ୍ରଦର୍ଶନ କରିଥିଲେ । ରାଜ୍ୟର ବିଭିନ୍ନ ପ୍ରାନ୍ତରୁ ଡ୍ରାଇଭର ଆସି ପ୍ରଥମେ ଲୋଏର ପିଏମଜିରେ ଏକାଠି ହୋଇଥିଲେ । ପରେ ଲୋକସେବା ଭବନକୁ ଶୋଭାଯାତ୍ରା କରି ଯିବାବେଳେ ସୁରକ୍ଷାକର୍ମୀଙ୍କ ସହିତ ଧସ୍ତାଧସ୍ତି ମଧ୍ୟ ହୋଇଛି । ଏତେ ସଂଖ୍ୟାରେ ଡ୍ରାଇଭର ଏକାଠି ହୋଇଥିବାରୁ ରାଜଧାନୀରେ ସାଂଘାତିକ ଟ୍ରାଫିକ ଜାମ୍ ପରିସ୍ଥିତ ଉପୁଜିଛି । ଏପରିକି ଭିଡ ଯୋଗୁଁ ପିଏମଜି ଛକରେ ଦୀର୍ଘ ସମୟ ଧରି ଫସି ରହିଥିଲା ଏକ ଆମ୍ବୁଲାନ୍ସ ।
ଓଡିଶା ଡ୍ରାଇଭର ଆସୋସିଏସନର ଛତା ତଳେ ୩୦ଟି ଜିଲ୍ଲାର ଡ୍ରାଇଭର ଏକାଠି ହୋଇ ସରକାରଙ୍କ ଉପରେ ଚାପ ପକାଇଛନ୍ତି ।
- ପ୍ରତି ୧୦୦ କିଲୋମିଟରରେ ବସ୍ ପାର୍କିଂ ବ୍ୟବସ୍ଥା
- ଡ୍ରାଇଭରଙ୍କୁ କୋଭିଡ ଯୋଦ୍ଧାର ମାନ୍ୟତା ପ୍ରଦାନ
- କରୋନା କାଳରେ ହୋଇଥିବା କ୍ଷତି ପାଇଁ ପ୍ୟାକେଜ୍
- ଦୁର୍ଘଟଣାରେ ମୃତ ଡ୍ରାଇଭରଙ୍କୁ ୨୦ ଲକ୍ଷ ଅନୁକମ୍ପା
- ଗୁରୁତର ଆହତ ହେଲେ ୧୦ ଲକ୍ଷ ଟଙ୍କାର ବୀମା
- ଡ୍ରାଇଭରଙ୍କୁ ଅବସରକାଳୀନ ପେନସନ ବ୍ୟବସ୍ଥା
ଏହିଭଳି ଏକାଧିକ ଦାବି କରିଆସୁଛି ଓଡିଶା ଡ୍ରାଇଭର ସଂଘ । ଏନେଇ ଡ୍ରାଇଭର ସଂଘ ସହ ଆଲୋଚନା ପରେ ୩ ମାସର ସମୟ ନେଇଛନ୍ତି ରାଜ୍ୟ ସରକାର । ଦାବି ଉପରେ ବିଚାର କରିବାକୁ ଏକ କମିଟି ଗଠନ କରାଯିବ ବୋଲି କହିଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା ।
ସରକାରଙ୍କ ସହ ଡ୍ରାଇଭର ମହାସଂଘର ପ୍ରତିନିଧି ଆଲୋଚନା କରିବା ପରେ ଡ୍ରାଇଭର ମହାସଂଘ ଆନ୍ଦୋଳନ ସ୍ଥଗିତ ରଖିବାକୁ ନିଷ୍ପତି ନେଇଥିବା ମନ୍ତ୍ରୀ କହିଛନ୍ତି । ହେଲେ ଏବେ ବି ରାସ୍ତାରୁ ହଟି ନାହାନ୍ତି ଡ୍ରାଇଭର । ସଂଘର ସଭାପତି ଓ ସଂପାଦକ ବିକ୍ରି ହୋଇଯାଇଥିବା ଅଭିଯୋଗ କରି ଦାବି ପୂରଣ ପାଇଁ ଅଡି ବସିଛନ୍ତି ଗୋଟିଏ ଗୋଷ୍ଠୀ । ଯାହାକୁ ନେଇ ଡ୍ରାଇଭରଙ୍କ ଭିତରେ ମାଡପିଟର ଦୃଶ୍ୟ ମଧ୍ୟ ସାମ୍ନାକୁ ଆସିଛି । ତେବେ ରାଜଧାନୀ ରାସ୍ତାରେ ବସି ଡ୍ରାଇଭରମାନେ ଆନ୍ଦୋଳନ କରିବା ଫଳରେ ଅଭାବନୀୟ ପରିସ୍ଥିତି ଉପୁଜିଥିଲା । ବାଣୀବିହାର ଫ୍ଲାଏ ଓଭର ଉପରେ ଶହ ଶହ ଗାଡି ଅଟକି ରହିଥିବାବେଳେ ଦୀର୍ଘ ସମୟ ଧରି ଲୋକ ଫସିରହିଲେ । ତେଣୁ ପ୍ରଶ୍ନ ଉଠୁଛି…
- ଏତେ ସଂଖ୍ୟାରେ ଡ୍ରାଇଭର ଆନ୍ଦୋଳନକୁ ଆସିବେ ବୋଲି କେମିତି ଜାଣିପାରିଲା ନାହିଁ ପ୍ରଶାସନ?
- ଅନ୍ୟ ସମୟରେ ବ୍ୟାପକ ପୋଲିସ ମୁତୟନ ହେଉଥିବାବେଳେ ଆଜି କାହିଁକି ସେଭଳି ବନ୍ଦୋବସ୍ତ ନଥିଲା?
- ହଜାର ହଜାର ସଂଖ୍ୟାରେ ଡ୍ରାଇଭର ରାଜଧାନୀକୁ କବଜାକୁ ନେବେ ବୋଲି ଗୁଇନ୍ଦା ବିଭାଗ ଜାଣିପାରିଲା ନାହିଁ କେମିତି?