ବହୁତ ହୋଇଗଲା ଆଉ ନୁହେଁ…ସାମ୍ବାଦିକାଙ୍କ ପାଇଁ ଏକାଠି ହେଲେ ସବୁ ସାମ୍ବାଦିକ, ଏସପ୍ଲାନେଡ ମଲ ଆଗରେ ହେଲା ବିକ୍ଷୋଭ, ତେଜିଲା ସାମ୍ବାଦିକ ସୁରକ୍ଷା ଦାବି
କନକ ବ୍ୟୁରୋ : କୁହାଯାଏ ଯେତେବେଳେ ମହିଳା ଆଖିରୁ ଲୁହ ଝରେ, ଏହି ଲୁହ ସାଥିରେ ଏକ ଝଡ଼ ନେଇ ଆସେ । ଯେଉଁ ଝଡ଼ ପୁରା ବ୍ୟବସ୍ଥାକୁ ଦୋହଲାଇ ଦେବାର ସମାର୍ଥ୍ୟ ରଖେ । ସାମ୍ବାଦିକଙ୍କ ସୁରକ୍ଷା ଦାବିରେ ବୋହୂଥିବା ଏହି ଝଡ଼ ହୁଏତ ଆସିବାକୁ ଯାଉଛି । ନହେଲେ ଓଡ଼ିଶାର ସମସ୍ତ ଗଣମାଧ୍ୟମର ପ୍ରତିନିଧିଙ୍କୁ ସ୍ୱାତୀ ଜେନା ଆକ୍ରମଣ ଘଟଣାରେ ଏମିତି ଏକାଠି ହୋଇନଥାନ୍ତା ।
Kanak News is now on WhatsApp
Join and get latest news updates delivered to you via WhatsApp
ପାର୍କିଂ ଫି’ ନାରେ ଏସପ୍ଲାନେଡ ମଲ୍ କରୁଥିବା ଜୁଲମ୍ ଏବଂ ବେଆଇନ୍ ପାର୍କିଂ ଆଦାୟ ସଂପର୍କିତ ଖବର ସଂଗ୍ରହ ପାଇଁ ଯାଇଥିବା ଅର୍ଗସ୍ ୱେବ୍ ଚ୍ୟାନେଲର ସାମ୍ବାଦିକାଙ୍କୁ ଆକ୍ରମଣ ଘଟଣା, ଏବେ ଚାରିଆଡେ ପ୍ରତିକ୍ରିୟା ସୃଷ୍ଟିକରିଛି । ଆଜି ଏସପ୍ଲାନେଡ ମଲ୍ ସାମ୍ନାରେ ଓଡ଼ିଶାର ସମସ୍ତ ପ୍ରମୁଖ ଗଣମାଧ୍ୟମର ପ୍ରତିନିଧି ରୁଣ୍ଡ ହୋଇ ଘଟଣାର ପ୍ରତିବାଦ କରିଛନ୍ତି ।
ସାମ୍ବାଦିକଙ୍କ ଏହି ପ୍ରତିବାଦରେ କେବଳ ଯେ, ଗଣମାଧ୍ୟମ ପ୍ରତିନିଧି ସାମିଲ ହୋଇଥିଲେ ତାହା ନୁହେଁ, ରାଜ୍ୟର ପ୍ରମୁଖ ରାଜନୈତିକ ଦଳର ନେତା ଏହି ଘଟଣାକୁ ନିନ୍ଦା କରିବା ସହ ସାମ୍ବାଦିକଙ୍କ ସୁରକ୍ଷା ପାଇଁ ଦାବି କରିଛନ୍ତି । ସାମ୍ବାଦିକଙ୍କୁ ଆକ୍ରମଣ ଘଟଣାର ପ୍ରତିବାଦ କରି ସାମାଜିକ କର୍ମୀ ଓ ସାମ୍ବାଦିକମାନେ ମିଳିତ ଭାବେ ଡିଜିପି ଅଫିସ୍ ଆଗରେ ପ୍ଲାକାର୍ଡ ଧରି ପ୍ରତିବାଦ କରିଛନ୍ତି । ସାମ୍ବାଦିକ ଆକ୍ରମଣ ଘଟଣାରେ ଲିପ୍ତ ଥିବା ସମସ୍ତ ଅଭିଯୁକ୍ତଙ୍କୁ ଗିରଫ କରିବା ସହ ସାମ୍ବାଦିକ ସୁରକ୍ଷା ଆଇନ୍ ଆଣିବାକୁ ଦାବି କରିଛନ୍ତି ।
ଏପଟେ ସାମ୍ବାଦିକଙ୍କ ପ୍ରତିବାଦକୁ ଦେଖି ଏସପ୍ଲାନଡେ ମଲ୍ ସାମ୍ନାରେ ପହଂଚିଥିଲେ ଭୁବନେଶ୍ୱର ଡିସିପି । ଘଟଣା ତର୍ଜମା କରାଯାଇ, ସଂପୃକ୍ତ ସମସ୍ତ ବ୍ୟକ୍ତିଙ୍କୁ ତଦନ୍ତ ପରିସର ଭୁକ୍ତ କରାଯିବ ବୋଲି ଭୁବନେଶ୍ୱର ଡିସିପି କହିଛନ୍ତି । ଆଉ ଏହି ସବୁ ଧରପଗଡ଼ ଭିତରେ ପଙ୍କଜ ସାହୁ ଓ ମହନ୍ତ ବିଶ୍ୱାଳ ନାମକ ଦୁଇ ଜଣ ସୁରକ୍ଷାକର୍ମୀଙ୍କୁ ଗିରଫ କରିଛି ପୋଲିସ । ଗିରଫ ଏହି ଦୁଇ ସୁରକ୍ଷା କର୍ମୀ କହିଛନ୍ତି-ମଲର ବରିଷ୍ଠ ଅଧିକାରୀ କହିଥିଲେ ଫି’ ଆଦାୟ କରିବାକୁ ।
ଶନିବାର ଏସପ୍ଲାନେଡ ମଲରେ ବେଆଇନ ପାର୍କିଂ ଆଦାୟ ନେଇ ସାମ୍ବାଦିକା ସ୍ୱାତୀ ଜେନା ଓ କ୍ୟାମେରା ପର୍ସନ ଖବର ସଂଗ୍ରହ କରୁଥିବା ବେଳେ ସେମାନଙ୍କୁ ମଲର ସୁରକ୍ଷା କର୍ମୀ ଆକ୍ରମଣ କରିଥିଲେ । ଏପରିକି ମଲର କର୍ମଚାରୀ ସେମାନଙ୍କୁ ଗୋଟିଏ କୋଠରୀ ଭିତରେ ବନ୍ଦ କରି ରଖିଥିବା ନେଇ ଅଭିଯୋଗ ହୋଇଥିଲା ।