ଟେଷ୍ଟ ଦଳରେ ୩ଟି ପରିବର୍ତ୍ତନ କରିବାକୁ ପରାମର୍ଶ ଦେଲେ ଦିନେଶ କାର୍ତ୍ତିକ । ଦେଖନ୍ତୁ, କେଉଁ କେଉଁ ଖେଳାଳିଙ୍କୁ ସାମିଲ କରିବାକୁ ପରାମର୍ଶ ଦେଲେ କାର୍ତ୍ତିକ ।
କନକ ବ୍ୟୁରୋ: ଅଷ୍ଟ୍ରେଲିଆଠାରୁ ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ ହାରିବା ପରେ ଲଗାତାର ଦ୍ୱିତୀୟ ଥର ପାଇଁ ଟେଷ୍ଟ ଚାମ୍ପିୟନ୍ ହେବାରୁ ବଞ୍ଚିତ ହୋଇଛି ଟିମ୍ ଇଣ୍ଡିଆ । ଦ୍ୱିତୀୟ ଥରରେ ଟିମ୍ ଇଣ୍ଡିଆ ଅଷ୍ଟ୍ରେଲିଆଠାରୁ ବଡ ବ୍ୟବଧାନରେ ପରାଜିତ ହୋଇଛି । ତେବେ କଙ୍ଗାରୁ ଟିମଠାରୁ ଏତେ ବଡ ବ୍ୟବଧାନରେ ହାରିବା ପରେ, ଦଳରେ କିଛି ପରିବର୍ତ୍ତନ ନିହାତି ଆବଶ୍ୟକ ବୋଲି ବରିଷ୍ଠ କ୍ରିକେଟରମାନେ ମତ ଦେଇସାରିଲେଣି । ଏହିକ୍ରମରେ ଟିମ୍ ଇଣ୍ଡିଆର ୱିକେଟକିପର ବ୍ୟାଟ୍ସମ୍ୟାନ୍ ଦିନେଶ କାର୍ତ୍ତିକ ମଧ୍ୟ ଟେଷ୍ଟ ଟିମରେ ୩ଟି ପରିବର୍ତ୍ତନ କରିବାକୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଦିନେଶ କାର୍ତ୍ତିକ କହିଛନ୍ତି ଯେ, ଜଣେ ବ୍ୟାଟ୍ସମ୍ୟାନ୍ ଭାବେ ଯଶସ୍ୱୀ ଜୟସୱାଲଙ୍କ କଥା ନିହାତି ହେବା ଦରକାର । ତାଙ୍କର ଘରୋଇ ସିଜିନ ବହୁତ ଭଲ ରହିଥିଲା । ତେଣୁ ଜଣେ ବ୍ୟାଟର ଭାବେ ତାଙ୍କ ପାଇଁ ଦଳରେ ସ୍ଥାନ ବାହାର କରିବା ନିହାତି ଆବଶ୍ୟକ ବୋଲି ଦିନେଶ କାର୍ତ୍ତିକ କହିଛନ୍ତି । ତା ସହିତ ସର୍ଫରାଜ ଖାନଙ୍କୁ ନେଇ ମଧ୍ୟ ପ୍ରତିକ୍ରିୟା ରଖିଛନ୍ତି ଦିନେଶ କାର୍ତ୍ତିକ ।
ସର୍ଫରାଜ ଖାନଙ୍କ ଘରୋଇ ସିଜିନ୍ ବେଶ ଭଲ ରହିଛି । ମିଡିଲ୍ ଅର୍ଡରରେ ମଧ୍ୟ ସେ ଜଣେ ଭଲ ବ୍ୟାଟ୍ସମ୍ୟାନ୍ । ତେଣୁ ଟିମ୍ ଇଣ୍ଡିଆରେ ତାଙ୍କ ପାଇଁ ସ୍ଥାନ ବାହାର କରିବାକୁ ସେ ପରାମର୍ଶ ଦେଇଛନ୍ତି । ଏହା ବ୍ୟତୀତ ମିଡିୟମ୍ ଫାଷ୍ଟ ବୋଲର ମୁକେଶ କୁମାରଙ୍କୁ ମଧ୍ୟ ଟେଷ୍ଟ ଦଳରେ ସାମିଲ କରିବାକୁ ସେ କହିଛନ୍ତି । ଅଷ୍ଟ୍ରେଲିଆ ବିପକ୍ଷରେ ମହମ୍ମଦ ଶାମି, ମହମ୍ମଦ ସିରାଜ ଭଲ ବୋଲିଂ କରିଥିଲେ । ହେଲେ ଉମେଶ ଏବଂ ସାର୍ଦ୍ଦୁଳ ଭଲ ବୋଲିଂ କରିନପାରିବା କାରଣରୁ ଟିମ୍ ଇଣ୍ଡିଆର ଦୁର୍ବଳତା ପଛରେ ପଡିଥିଲା । ତେଣୁ ତାଙ୍କ ସ୍ଥାନରେ ମୁକେଶ କୁମାରଙ୍କୁ ଦଳରେ ସୁଯୋଗ ଦେବାକୁ ଦିନେଶ କାର୍ତ୍ତିକ ପରାମର୍ଶ ଦେଇଛନ୍ତି ।