ବାର୍ଡ’ଫ୍ଲୁ ଆତଙ୍କ ! ବନ୍ଦରନଗରୀ ପରେ ଏବେ ଭିତରକନିକାକୁ ମାଡିଲା ବିପଦ
କନକ ବ୍ୟୁରୋ: ଜଗତସିଂହପୁର ପରେ ଏବେ କେନ୍ଦ୍ରାପଡ଼ାରେ ବାର୍ଡ’ଫ୍ଲୁ ଆତଙ୍କ ଖେଳିଯାଇଛି । ଜିଲ୍ଲାର ବିଭିନ୍ନ ସ୍ଥାନରେ କାଉ ମରିପଡ଼ିବାକୁ ନେଇ ଏହିଭଳି ପରିସ୍ଥିତି ସୃଷ୍ଟି ହୋଇଛି । ବିଶେଷକରି, ଭିତରକନିକାରେ ୩ଟି କାଉ ମରିପଡ଼ିବା ଫଳରେ ପ୍ରଶାସନ ଅଧିକ ସତର୍କ ହୋଇଯାଇଛି । ଏହି ଜାତୀୟ ଉଦ୍ୟାନରେ ଏବେ ବିଦେଶୀ ପକ୍ଷୀଙ୍କ ଭିଡ଼ ଥିବାରୁ ପରିସ୍ଥିତି ଉପରେ ତୀକ୍ଷ୍ମଣ ନଜର ରଖିଛି । ଏହି ଅଞ୍ଚଳରୁ ୩୦ଟି ନମୁନା ସଂଗ୍ରହ କରାଯାଇଥିବା ଜଣାପଡ଼ିଛି । ଜଗତସିଂହପୁର ପରେ ଏବେ କେନ୍ଦ୍ରାପଡ଼ା ଜିଲ୍ଲାରେ ଅନୁରୂପ ଭାବେ ବାର୍ଡ଼’ଫ୍ଲୁ ଆତଙ୍କ ଖେଳିଯାଇଛି । ସୋମବାର, ମହାକାଳପଡ଼ା ବ୍ଲକର ୧୬ଟି ଗ୍ରାମରେ କୁକୁଡ଼ା, ବତକ ଓ ଅନ୍ୟାନ୍ୟ ଗୃହପାଳିତ ପକ୍ଷୀମାନଙ୍କଠାରୁ ରକ୍ତ ନମୁନା ସଂଗ୍ରହ କରାଯାଇଥିଲା । ପଟ୍ଟାମୁଣ୍ଡାଇ ବ୍ଲକର ଚନ୍ଦନନଗର ନିକଟରେ ରାଜନଗର-ପଟ୍ଟାମୁଣ୍ଡାଇ ରାସ୍ତା ଉପରେ ଗତକାଲି ସଂଧ୍ୟାରେ ୩ଟି କାଉ ମରି ପଡିଥିବା ଦେଖିବାକୁ ମିଳିଥିଲା । ଭିତରକନିକା ଜାତୀୟ ଉଦ୍ୟାନ ମଧ୍ୟରେ ମୃତ ପକ୍ଷୀ ମିଳି ନ ଥିଲେ ମଧ୍ୟ ଭିତରକନିକା ଅଭୟାରଣ୍ୟ ଅଂଚଳରେ ଗତକାଲି ସଂଧ୍ୟାରେ ୩ଟି କାଉର ମୃତଦେହ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି କେନ୍ଦ୍ରାପଡା ଜିଲ୍ଲା ମୁଖ୍ୟ ପଶୁଚିକିତ୍ସାଧିକାରୀ ଡା. ଶାନ୍ତନୁ ଟାକ୍ରିଙ୍କ ନେତୃତ୍ୱରେ ଏକ ଟିମ୍ ଭିତରକନିକା ପରିଦର୍ଶନ କରିଥିଲେ । ପକ୍ଷୀଙ୍କ ଆବସସ୍ଥଳୀ ବଗଗହନ ଏବଂ ମଠଆଡିଆରେ ପହଁଛି ୨୦ଟି ଦେଶୀ ଓ ବିଦେଶୀ ପକ୍ଷୀଙ୍କ ମଳ ନମୁନା ସଂଗ୍ରହ କରିଛନ୍ତି । ଏହାବାଦ୍ ଭିତରକନିକା ପ୍ରବେଶପଥକୁ ଲାଗିକରି ଥିବା ଡାଙ୍ଗମାଳ ଓ ଖମାରସାହି ଗାଁରୁ ୧୦ଟି କୁକୁଡାଙ୍କର ମଳ ଓ ମଳଦ୍ୱାରର ସ୍ୱାବ୍ ସଂଗ୍ରହ କରିଛନ୍ତି । ଏହି ଦୁଇଟି ଗାଁର ପୋଖରୀ ପାଣି ନମୁନା ସଂଗ୍ରହ କରି ଫୁଲନଖରାସ୍ଥିତ ଆନିମଲ ଡିଜିଜ୍ ରିସର୍ଚ୍ଚ ଇନଷ୍ଟିଚୁୟୁଟକୁ ପଠାଇଛନ୍ତି । ଭିତରକନିକାରେ ବାର୍ଡ ଫ୍ଲୁ ସଂପର୍କରେ ରେଞ୍ଜ ଅଫିସର ସୁବ୍ରତ କୁମାର ପାତ୍ରଙ୍କୁ ପଚାରିବାରୁ ଭିତରକନିକା ଅଂଚଳରେ ବାର୍ଡ’ଫ୍ଲୁ ଆତଙ୍କ ନାହିଁ ବୋଲି କହିଛନ୍ତି ।
ସେପଟେ, ବନ୍ଦରନଗରୀ ପାରାଦ୍ୱୀପରେ ବାର୍ଡଫ୍ଲୁ ଆତଙ୍କ ଦେଖାଦେଇଛି । ପ୍ରତିଷେଧକ ମୂଳକ ବ୍ୟବସ୍ଥା ସ୍ୱରୂପ ବିଭିନ୍ନ ସ୍ଥାନରେ କୁକୁଡା ମରା ଅଭିଯାନ ଚାଲିଛି । ନୂଆବଜାର ଓ ସଂଜୟ ଗାନ୍ଧୀ ବସ୍ତିରେ ଚାଲିଛି କୁକୁଡା ମରା ଅଭିଯାନ । ଜିଲ୍ଲା ପ୍ରଶାସନ ପକ୍ଷରୁ ୮ଟି ଟିମ ନିୟୋଜିତ କରାଯାଇଛି । ବିଭିନ୍ନ ନାମୀଦାମୀ ହୋଟେଲରେ ଚଢାଉ କରି କୁକୁଡା ଓ ଅଣ୍ଡା ଜବତ କରାଯାଉଛି । ପାରାଦୀପ ପୌରପରିଷଦ ଓ ମେଡିକାଲ ଟିମ ପକ୍ଷରୁ ମିଳିତ ଚଢାଉ କରାଯାଇଛି ।
ସୋମବାର ସନ୍ଧ୍ୟାରେ ୩ ଜଣିଆ କେନ୍ଦ୍ରୀୟ ଟିମ୍ ପାରାଦ୍ୱୀପରେ ପଂହଚି ପ୍ରଭାବିତ ଷଣ୍ଢକୁଦ ଅଂଚଳ ପରିଦର୍ଶନ କରିଛନ୍ତି । ପ୍ରଶାସନର ବୈଠକ ବସି ପ୍ରତିଷେଧକମୂଳକ ବ୍ୟବସ୍ଥା ସମ୍ପର୍କରେ ଆଲୋଚନା କରାଯାଇଛି । ଲୋକଙ୍କୁ ଭୟଭୀତ ନ ହେବାକୁ ପରାମର୍ଶ ଦିଆଯାଇଛି । ୨ ଦିନରେ ପାରାଦ୍ୱୀପ ଅଂଚଳରେ ୮ଶହରୁ ଅଧିକ କୁକୁଡାଙ୍କୁ ମରାଯାଇଥିବା ପ୍ରଶାସନ ଦାବି କରିଛି । କୁକୁଡା, ବତକ ଓ ଅଣ୍ଡା ନଖାଇବାକୁ ଲୋକଙ୍କୁ ସଚେତନ କରୁଛି ପ୍ରଶାସନ । କ୍ଷତିଗ୍ରସ୍ତ ଚାଷୀଙ୍କୁ ସରକାରୀ ନିୟମ ଅନୁସାରେ କ୍ଷତିପୂରଣ ଦିଆଯିବ ବୋଲି ମତ୍ସ୍ୟ ଓ ପଶୁ ସମ୍ପଦ ବିଭାଗ ସୂଚନା ଦେଇଛି । ଏହା ଛଡା ତିନି ମାସ ପାଇଁ ପାରାଦୀପକୁ କୁକୁଡା ଓ ବତକ ଯୋଗାଣ ବନ୍ଦ କରାଯିବା ନେଇ ନିଷ୍ପତି ହୋଇଛି ।