କନକ ବ୍ୟୁରୋ: କପା ଚାଷ ପାଇଁ ବଲାଙ୍ଗିର ଜିଲ୍ଲାର ରହିଛି ସ୍ୱତନ୍ତ୍ର ପ୍ରସିଦ୍ଧି । ଉନ୍ନତମାନର କପା ପାଇଁ ବଜାରରେ ମଧ୍ୟ ଏହି କପାର ଚାହିଦା ରହିଛି । ତେଣୁ ଚଳିତ ବର୍ଷ କପା ଚାଷୀଙ୍କ ପାଇଁ ଅଣ୍ଟା ଭିଡିଛି ବଲାଙ୍ଗିର ଜିଲ୍ଲା ପ୍ରଶାସନ । କିଭଳି ଚାଷୀମାନେ ବିନା ଶୋଷଣରେ ଧଳା ସୁନା ବିକ୍ରି କରିପାରିବେ ସେଥିପାଇଁ ଉଦ୍ୟମ ଆରମ୍ଭ କରିଛନ୍ତି ବଲାଙ୍ଗିର ଜିଲ୍ଲାପାଳ । ବଲାଙ୍ଗିର ଜିଲ୍ଲାରେ ଅଧିକାଂଶ ଚାଷୀ କପା ଚାଷ କରି ନିଜର ଜୀବିକା ନିର୍ବାହ କରନ୍ତି । କମ୍ ପାଣି ଓ ଅଳ୍ପ ଦିନରେ ଏହା ଭଲ ଅମଳ ହୋଇଥାଏ । କମ୍ ପରିଶ୍ରମରେ ଲୋକେ ଭଲ ରୋଜଗାର ମଧ୍ୟ କରିଥାଆନ୍ତି । ଅଧିକାଂଶ ସମୟରେ କପା ବିକ୍ରି ସମୟରେ ଚାଷୀ ଶୋଷଣର ଶିକାର ହୋଇଥାଏ । ଦଲାଲ ଓ ଅସାଧୁ କପା ମିଲରଙ୍କ ଦ୍ୱାରା ଅଭାବୀ ବିକ୍ରିର ଶିକାର ହୋଇଥାଏ । ଏହାକୁ ରୋକିବା ପାଇଁ ଜିଲ୍ଲାପାଳଙ୍କ ପକ୍ଷରୁ ପ୍ରୟାସ ଆରମ୍ଭ ହୋଇଛି । ଚାଷୀଠୁ କପା କିଣୁଥିବା ସଂସ୍ଥା ଓ ଚାଷୀକୁୁ ନେଇ ଏକ ବୈଠକ କରିଛନ୍ତି ଜିଲ୍ଲାପାଳ । ଏହା ସହ ଜିଲ୍ଲାରେ ଖୁବ୍ ଶୀଘ୍ର ତିନୋଟି ମଣ୍ଡିରେ କପାକିଣା ଅରମ୍ଭ ହେବ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବଲାଙ୍ଗିର ଜିଲ୍ଲାର ମୁଖ୍ୟତଃ ପାଟଣାଗଡ, ବେଲପଡା, କଂଟାବାଞ୍ଜି, ତୁରେଇକେଲା, ଟିଟଲାଗଡ, ଦେଉଗାଁ ଅଞ୍ଚଳରେ ବହୁଳ ପରିମାଣରେ କପା ଚାଷ ହୋଇଥାଏ । ପାଖାପାଖି ୭୦ ହଜାର ହେକ୍ଟର ଜମିରେ ଚଳିତ ବର୍ଷ କପା ଚାଷ କରିଛନ୍ତି ଚାଷୀ । ଧାନ ଅପେକ୍ଷା କପା ଚାଷରେ ଭଲ ରୋଜଗାର ହେଉଥିବାରୁ ଚାଷୀମାନେ ଏହି ଚାଷ କରିଥାଆନ୍ତି । ବଲାଙ୍ଗିର କପାର ମାନ ବହୁତ ଭଲ ଥିବାରୁ ସୁଦୂର ନାଗପୁରରୁ ବ୍ୟବସାୟୀମାନେ ଏହାକୁ କିଣିଥାଆନ୍ତି । ଚାଷୀଙ୍କ ଘର ପାଖରୁ ଅଧିକ ଦାମରେ କିଣି ନିଅନ୍ତି ବ୍ୟବସାୟୀ । ଅପରପକ୍ଷେ ଏଭଳି ସ୍ଥିତିରେ ଜିଲ୍ଲାରେ ଥିବା ୧୭ଟି କପା ମିଲ ମାଲିକମାନେ ସରକାରକୁ ଟିକସ ଦେଇ କ୍ଷତିରେ ପଡ଼ୁଥିବା କହିଛନ୍ତି ।
ସବୁବର୍ଷ ଜିଲ୍ଲାରେ କପାର ଉତ୍ପାଦନ ବେଶ ଭଲ ହୋଇଥାଏ । ଏହି ଧଳା ସୁନାର କଳା ବଜାର ହେବା ଫଳରେ ଚାଷୀମାନେ ଉପଯୁକ୍ତ ମୂଲ୍ୟ ପାଇବାରୁ ବଞ୍ଚିତ ହୋଇଥାଆନ୍ତି । କିନ୍ତୁ ଚଳିତ ବର୍ଷ ଜିଲ୍ଲା ପ୍ରଶାସନର ଏହି ପ୍ରୟାସ ଚାଷୀଙ୍କୁ ଲାଭ ଦେବ ବୋଲି ଆଶା କରାଯାଉଛି ।