ସ୍କିଲ ଡେଭଲପମେଣ୍ଟ ଦୁର୍ନୀତି ମାମଲାରେ ଗିରଫ ହେଲେ ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ । ଚନ୍ଦ୍ରବାବୁ ଓ ତାଙ୍କ ପୁଅ ଉପରେ ରହିଛି ୩୭୧ କୋଟି ଟଙ୍କା ଠକେଇ ଅଭିଯୋଗ
କନକ ବ୍ୟୁରୋ : ଶନିବାର ଭୋରୁ ଭୋରୁ । ଏକ ଜନସଭାରେ ଯୋଗ ଦେବା ପରେ ଆନ୍ଧ୍ରପ୍ରଦେଶ ନାନ୍ଦିଆଲରେ ବିଶ୍ରାମ ନେଉଥିଲେ ଟିଡିପି ମୁଖ୍ୟ ତଥା ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ । କେହି କିଛି ବୁଝିବା ଆଗରୁ ହଠାତ ବିଶ୍ରାମସ୍ଥଳରେ ପହଁଚିଥିଲେ ସିଆଇଡି ଟିମ । ସିଆଇଡିର ଏଭଳି କାର୍ଯ୍ୟାନୁଷ୍ଠାନକୁ ସହଜରେ ଗ୍ରହଣ କରିପାରିନଥିଲେ ଦଳୀୟକର୍ମୀ ଓ ଚନ୍ଦ୍ରବାବୁଙ୍କ ସମର୍ଥନ । ପ୍ରବଳ ହଙ୍ଗାମା, ବିରୋଧରେ ଭିତରେ ଗିରଫ ହୋଇଥିଲେ ଆନ୍ଧ୍ର ରାଜନୀତି ଦୁନିଆର ଏହି ହାଇପ୍ରୋଫାଇଲ ଚେହେରା । ଆସନ୍ତୁ ଜାଣିବା କ’ଣ ଏହି ସ୍କିଲ ଡେଭଲପମେଂଟ ଦୁର୍ନୀତି ଓ କେମିତି ଚନ୍ଦ୍ରବାବୁ ନାଇଡୁ ଓ ତାଙ୍କ ପୁଅ ନାଁରେ ଲାଗିଛି ୨୫୦କୋଟି ଟଙ୍କାର ଦୁର୍ନୀତି ଅଭିଯୋଗ ।
Kanak News is now on WhatsApp
Join and get latest news updates delivered to you via WhatsApp
୨୦୧୬ ମସିହାରେ ରାଜ୍ୟର ବେକାରି ଯୁବକଙ୍କୁ ସ୍କିଲ ତାଲିମ ପାଇଁ ଆନ୍ଧ୍ର୍ରପ୍ରଦେଶ ସରକାର ସ୍କିଲ ଡେଭଲପମେଂଟ କୋପରେସନ ଗଠନ କରିଥିଲେ । ୩ହଜାର ୩ଶହ କୋଟି ଟଙ୍କାର ପ୍ରୋଜେକ୍ଟ ପାଇଁ ତତକାଳୀନ ଟିଡିପି ସରକାର ଦୁଇଟି ଗ୍ରୁପ ସହ ଏମଓୟୁ ସ୍ୱାକ୍ଷର କରିଥିଲେ । ଏହି ପ୍ରୋଜେକ୍ଟକୁ ରାଜ୍ୟ କ୍ୟାବିନେଟର ଅନୁମତି ମିଳିନଥିଲା ଏବଂ ଏଥିରେ ଦୁର୍ନୀତି ସାମ୍ନାକୁ ଆସିଥିଲା । ଏହାକୁ ନେଇ ୨୦୨୧ରେ ମାମଲା ରୁଜୁ ହୋଇଥିଲା । ମାମଲାରେ ଚନ୍ଦ୍ରବାବୁ ନାଇଡୁଙ୍କୁ ମୁଖ୍ୟ ଅଭିଯୁକ୍ତ ଦର୍ଶାଯାଇଥିଲା । ତାଙ୍କ ଉପରେ ୨୫୦ କୋଟି ଠକେଇ ଅଭିଯୋଗ ହୋଇଥିଲା । ମାମଲାରେ ପୂର୍ବରୁ ୮ ଜଣଙ୍କୁ ଗିରଫ କରାଯାଇଛି ।
ସିଆଇଡି ଚନ୍ଦ୍ରବାବୁଙ୍କୁ ଗିରଫ କରିବା ପରେ ତାତି ଉଠିଛନ୍ତି ଟିଡିପି କର୍ମୀ, ନେତା ଓ ସମର୍ଥକ । ଆନ୍ଧ୍ରପ୍ରଦେଶର ସ୍ଥାନେ ସ୍ଥାନେ ବିକ୍ଷୋଭ କରିବା ସହ ପୋଡାଜଳା, ରାସ୍ତାରୋକ ଓ ବିରୋଧ ପ୍ରଦର୍ଶନ କରିଛନ୍ତି । ଏମାନଙ୍କ ମଧ୍ୟରୁ କିଛିଜଣଙ୍କୁ ବାନ୍ଧିଛି ପୁଲିସ ।ଗିରଫ ପରେ ଚନ୍ଦ୍ରବାବୁଙ୍କ ଡାକ୍ତରୀମାଇନା କରିବା ସହ କୋର୍ଟରେ ହାଜର କରାଯାଇଥିବା ସୂଚନା ରହିଛି ।