ବାହାନଗା ସ୍କୁଲରେ ଚାଲିଲା ବୁଲଡୋଜର । ଟ୍ରେନ ଦୁର୍ଘଟଣାକୁ ଆସନ୍ତାକାଲି ପୁରୁଛି ୧୦ ଦିନ । ମୃତ ଯାତ୍ରୀଙ୍କ ଆତ୍ମାର ଶାନ୍ତି ପାଇଁ ସାମୂହିକ ମୁଣ୍ଡନ ଓ ଦଶାହ କର୍ମ
କନକ ବ୍ୟୁରୋ: ବାହାନଗା ହାଇସ୍କୁଲରେ ଚାଲିଛି ବୁଲଡୋଜର । ସ୍ଥାନୀୟ ଲୋକଙ୍କ ଭାବନାକୁ ସମ୍ମାନ ଜଣାଇ ସ୍କୁଲର ପୁନରୁଦ୍ଧାର ପାଇଁ ପଦକ୍ଷେପ ନେଇଛି ପ୍ରଶାସନ । ସ୍କୁଲ କୋଠରୀରେ ଶବ ରଖାଯାଇଥିବାରୁ ଛାତ୍ରଛାତ୍ରୀ ଓ ଅଭିଭାବକଙ୍କ ଭିତରେ ଭୟ ରହିଛି । କିନ୍ତୁ ଦୁର୍ଘଟଣାର ସେହି କାଳରାତିକୁ ଭୁଲି ଆଗକୁ ବଢୁଛନ୍ତି ସ୍ଥାନୀୟ ବାସିନ୍ଦା । ଦୁର୍ଘଟଣାକୁ କାଲି ୧୦ ଦିନ ପୁରୁଥିବା ବେଳେ ହୋମଯଜ୍ଞ ଓ ଗଣଦଶାହ କରିବା ପାଇଁ ପ୍ରସ୍ତୁତି କରିଛନ୍ତି କିଛି ସ୍ୱେଚ୍ଛାସେବୀ ସଂଗଠନ । ଏପଟେ ଦୁର୍ଘଟଣା ପଛର ଷଡଯନ୍ତ୍ର ଉପରୁ ପରଦା ହଟାଇବାକୁ ସିବିଆଇ ତଦନ୍ତ ଜାରି ରହିଛି । ତେଣୁ ତଦନ୍ତରେ ବାଧା ସୃଷ୍ଟି ନକରିବା ପାଇଁ ବାହାନଗା ଷ୍ଟେସନକୁ ବନ୍ଦ ରଖାଯାଇଥିବା କହିଛନ୍ତି ଦକ୍ଷିଣ ପୂର୍ବ ରେଳବାଇ ପିଆରଓ ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ଦୁର୍ଘଟଣାକୁ ବାହାନଗାବାସୀ ଅତି ନିକଟରୁ ଦେଖିଛନ୍ତି, ଯେଉଁ ଯନ୍ତ୍ରଣାକୁ ଅତିପାଖରୁ ଅନୁଭବ କରିଛନ୍ତି, ସେଭଳି ଦିନ, ଭଗବାନ କାହାକୁ ନଦେଖାନ୍ତୁ । କାଲି ଭଳି ଲାଗୁଛି, କରମଣ୍ଡଳର କଳା କାହାଣୀକୁ ୯ ଦିନ ବିତିଯାଇଛି । ହେଲେ ସେଦିନର ଚିତ୍ର ଏବେ ବି ତାଜା ହୋଇରହିଛି । ରାତି ପାହିଲେ, ଅଘଟଣକୁ ୧୦ଦିନ ହୋଇଯିବ । ଯାତ୍ରୀଙ୍କ ସ୍ୱାଭାବିକ୍ ମୃତ୍ୟୁ ହୋଇଥିଲେ, ପ୍ରଥା ଅନୁସାରେ ମୃତକଙ୍କ ଦଶାହକର୍ମ ହୋଇଥାନ୍ତା, ସମ୍ପର୍କୀୟଙ୍କ ମୁଣ୍ଡନ ହୋଇଥାନ୍ତା । କିନ୍ତୁ ଏବେ ବି ଅନେକ ମୃତକଙ୍କ ମୁହଁ ବି ଦେଖିପାରି ନାହାଁନ୍ତି ସମ୍ପର୍କୀୟ ।
- ମୃତକଙ୍କ ଆତ୍ମାର ଶାନ୍ତି ପାଇଁ ହେବ ସାମୁହିକ ମୁଣ୍ଡନ
- ବାହାନଗାରେ ହେବ ଦଶାହକର୍ମ ଏବଂ ବିଶ୍ୱଶାନ୍ତି ମହାଯଜ୍ଞ
ମୃତ ଯାତ୍ରୀଙ୍କ ସଦଗତି ଏବଂ ଆହତଙ୍କ ଆରୋଗ୍ୟ କାମନା କରି ବାହାନଗାରେ ଆୟୋଜିତ ହେଉଛି ବିଶାଳ କାର୍ଯ୍ୟକ୍ରମ । ମୃତକଙ୍କ ପାଇଁ ଦଶାହ, ଶାନ୍ତି ପାଇଁ ବିଶ୍ୱଶାନ୍ତି ଯଜ୍ଞ, ଧାର୍ମିକ ପରିବେଶ ସୃଷ୍ଟି କରିବା ପାଇଁ ସଂର୍କୀର୍ତନ୍ୟ ଓ ସର୍ବଧର୍ମ ସଭାର ଆୟୋଜନ କରୁଛନ୍ତି, ବାହାନଗା, ସୋର ଓ ବାଲେଶ୍ୱରର କିଛି ସାମାଜିକ ସଂଗଠନ ।
ଏପଟେ ବାହାନଗା ଷ୍ଟେସନରେ ସାମୟିକ ଭାବେ ଟ୍ରେନର ରହଣୀକୁ ବନ୍ଦ ରଖାଯାଇଛି । ଦକ୍ଷିଣପୂର୍ବ ରେଲୱର ସିପିଆରଓ କହିଛନ୍ତି- ତଦନ୍ତ ଚାଲୁଥିବାରୁ, ଷ୍ଟେସନର ରିଲେ ରୁମ୍ ବନ୍ଦ ରହିଛି । ତେଣୁ ଷ୍ଟେସନରେ ଏବେ କୌଣସି ଟ୍ରେନ୍ ଅଟକିବ ନାହିଁ । ପରବର୍ତ୍ତି ନୋଟିସ ନଆସିବା ପର୍ଯ୍ୟନ୍ତ ଟ୍ରେନ ରହିବ ନାହିଁ । ଦୁର୍ଘଟଣାର ତଦନ୍ତ ଚାଲିଥିବାରୁ ବାହାନଗା ବଜାର ଷ୍ଟେସନରେ ଟ୍ରେନ୍ ରହିବ ନାହିଁ ବୋଲି ସୂଚନା ଦିଆଯାଇଛି ।ଅଘଟଣକୁ ଭୁଲି ଆଗକୁ ବଢ଼ିବା ହୁଏତ ବର୍ତମାନ ସମୟର ବଡ଼ ଆହ୍ୱାନ । ଆଉ ଏଦିଗରେ ଯଥୋଚିତ ଉଦ୍ୟମ କରୁଛନ୍ତି ସ୍ଥାନୀୟ ବାସିନ୍ଦା ।