ସଂସଦ ଅଧିବେଶନ ପୂର୍ବରୁ କେମିତି ଆସିଲା ଲଜ୍ଜାଜନକ ଭିଡିଓ : ଅମିତ ଶାହା
କନକ ବ୍ୟୁରୋ : ବିରୋଧୀ ମେଣ୍ଟ ମୋଦୀ ସରକାରଙ୍କ ବିରୋଧରେ ଆଣିଥିବା ଅନାସ୍ଥା ପ୍ରସ୍ତାବ ଉପରେ ସଂସଦରେ ୨ଦିନ ହେବ ଚର୍ଚ୍ଚା ଚାଲିଛି । ଆଜି ପ୍ରଥମେ କଂଗ୍ରେସ ସାଂସଦ ସଂସଦର ଆଲୋଚନାରେ ସାମିଲ ହୋଇ ମଣିପୁର ପ୍ରସଙ୍ଗ ଉଠାଇ କେନ୍ଦ୍ର ସରକାରଙ୍କ ଉପରେ ବର୍ଷିଥିଲେ । ଏହାର ଜବାବରେ ସଂସଦରେ ଅମିତ୍ ଶାହା ମଣିପୁର ହିଂସାକୁ ନେଇ ବୟାନ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୃହମନ୍ତ୍ରୀ ଅମିତ୍ ଶାହା କହିଛନ୍ତି କି, ମଣିପୁରରେ ଯେବେ ବି ସଂପ୍ରଦାୟିକ ହିଂସା ହୋଇଛି ତାହା ତାଣ୍ଡବ ରଚିଛି । ହେଲେ ମଣିପୁରରେ କ୍ରମାଗତ ଭାବେ ୬ବର୍ଷଧରି ବିଜେପିର ସରକାର ଥିଲେ ବି ସେଠାରେ ଗୋଟିଏ ବି ଜାତିଗତ ହିଂସା ହୋଇନାହିଁ । ହେଲେ ମଣିପୁର ହିଂସାକୁ ନେଇ ଗୃହମନ୍ତ୍ରୀ ମ୍ୟାମାରକୁ ଦୋଷାରୋପ କରିଛନ୍ତି । ସେ କହିଛନ୍ତି ମ୍ୟାମାରରେ ୨୦୨୧ରେ କ୍ଷମତା ପରିବର୍ତନ ହେବା ପରେ ସେଠାରେ ସେନା ଶାସନ ଆରମ୍ଭ ହୋଇଛି । ସେନା ଶାସନ ସମୟରେ କୁକୀ ସଂପ୍ରଦାୟ ଉପରେ ଅତ୍ୟାଚାର ଆରମ୍ଭ ହୋଇଛି । ଫଳରେ ହଜାର ହଜାର କୁକୀ ସଂପ୍ରଦାୟର ଲୋକ ମଣିପୁରରେ ଆସି ଶରଣାର୍ଥୀ ଭାବେ ରହୁଛନ୍ତି । ଏହାକୁ ନଜରରେ ରଖି କେନ୍ଦ୍ର ସରକାର ୨୦୨୨ରେ ସୀମାରେ ଅନୁପ୍ରବେଶ ବନ୍ଦ କରିବାକୁ ଉଦ୍ୟମ କରିଥିଲା ।
ସେପଟେ ସଂସଦରେ ମଣିପୁର ପ୍ରସଙ୍ଗରେ ସରକାର ପ୍ରଥମଦିନରୁ ଆଲୋଚନା ପାଇଁ ପ୍ରସ୍ତୁତ ଥିବା ବେଳେ ବିରୋଧୀ ଆଲୋଚନା ପାଇଁ ଆଗକୁ ଆସୁନଥିବା ଅଭିଯୋଗ କରିଛନ୍ତି ଗୃହମନ୍ତ୍ରୀ । ବିରୋଧୀମାନେ ସରକାରଙ୍କ କଥା ଶୁଣୁ ନାହାଁନ୍ତି । ହେଲେ ୧୪୦ କୋଟି ଲୋକ ଆମକୁ ସରକାର ଗଠନ କରିବାକୁ କ୍ଷମତା ଦେଇଥିବାରୁ ବିରୋଧୀ ଆମ କଥା ଶୁଣିବାକୁ ବାଧ୍ୟ ବୋଲି ସେ କହିଛନ୍ତି ।
ଅନ୍ୟପଟେ ମଣିପୁର ଘଟଣାରେ ବିରୋଧୀ ରାଜନୀତି କରୁଛନ୍ତି ବୋଲି ଅମିତ୍ ଶାହା କହିଛନ୍ତି । ଗୃହମନ୍ତ୍ରୀ କହିଛନ୍ତି କି ଆମେ ମାନୁଛୁ ମଣିପୁରରେ ସାଂଘାତିକ ହିଂସା ହୋଇଛି । ଏଭଳି ଘଟଣାକୁ ସରକାର କେବେ ବି ସମର୍ଥନ କରିବେ ନାହିଁ । ହେଲେ ଏଭଳି ସମ୍ବେଦନଶୀଳ ଘଟଣା ଉପରେ ରାଜନୀତି କରିବା ଲଜ୍ଜାଜନକ ବୋଲି ସେ କହିଛନ୍ତି ।
ମଣିପୁର ହିଂସା ଉପରେ ବିରୋଧୀମାନେ ମଣିପୁର ମୁଖ୍ୟମନ୍ତ୍ରୀ ଏନ୍ ବିରେନ ସିଂଙ୍କ ଇସ୍ତଫା ମାଗିବା ଦାବି ଉପରେ ଗୃହମନ୍ତ୍ରୀ କହିଛନ୍ତି କି, ମଣିପୁର ଘଟଣା ଉପରେ ଯଦି ରାଜ୍ୟ ସରକାର ସହଯୋଗ କରିନଥାନ୍ତେ ତେବେ ରାଜ୍ୟରେ ଅନୁଚ୍ଛେଦ ୩୭୦ ଲଗାଯାଇଥାନ୍ତା ଓ ମୁଖ୍ୟମନ୍ତ୍ରୀଙ୍କୁ ବରଖାସ୍ତ କରାଯାଇଥାନ୍ତା । ହେଲେ ମଣିପୁର ହିଂସାକୁ ନଜରରେ କେନ୍ଦ୍ର ନେଇଥିବା ସମସ୍ତ ନିଷ୍ପତ୍ତିକୁ ମଣିପୁର ସରକାର ଗ୍ରହଣ କରିଛନ୍ତି । କେନ୍ଦ୍ର ସରକାର ମଣିପୁରର ମୁଖ୍ୟ ଶାସନ ସଚିବଙ୍କ ବଦଳି କରିଛନ୍ତି । କେନ୍ଦ୍ରୀୟ ଗୃହରାଜ୍ୟମନ୍ତ୍ରୀ ନିତ୍ୟାନନ୍ଦ ରାୟ ଦୀର୍ଘଦିନ ଧରି ମଣିପୁରରେ ରହି ହିଂସା ଉପରେ ନଜର ରଖିବା ସହ ସେଠିକାର ଆଇନ ଶୃଙ୍ଖଳା ପରିସ୍ଥିତିକୁ ନେଇ ସମୀକ୍ଷା କରିଛନ୍ତି । ଏଣୁ ମଣିପୁର ମୁଖ୍ୟମନ୍ତ୍ରୀ ଯେତେବେଳେ କେନ୍ଦ୍ରର ସମସ୍ତ ନିଷ୍ପତ୍ତିକୁ ସ୍ୱୀକାର କରୁଛନ୍ତି ତେଣୁ ସେଠାରେ ମୁଖ୍ୟମନ୍ତ୍ରୀ ବଦଳାଇବାର କୌଣସି ଆବଶ୍ୟକତା ନାହିଁ ବୋଲି ଶାହା ସ୍ପଷ୍ଟ କରିଛନ୍ତି ।