କନକ ବ୍ୟୁରୋ: ସହିଦନଗର ଥାନା ପରିସରରେ ସଂପର୍କୀୟଙ୍କ ସହ ଫୋନରେ କଥା ହେବାବେଳେ ଅଚାନକ ଟଳି ପଡୁଛନ୍ତି ଜଣେ ଯୁବକ । ଥାନାରେ ଲାଗିଥିବା ସିସିଟିଭିରେ କଏଦ ହୋଇଛି ଏହାର ପୂରା ଦୃଶ୍ୟ । ତେବେ ତତକ୍ଷଣାତ ତାଙ୍କୁ କ୍ୟାପିଟାଲ ହସ୍ପିଟାଲକୁ ନେଇଥିଲା ପୋଲିସ । ହେଲେ ସେଠାରେ ତାଙ୍କୁ ମୃତ ଘୋଷଣା କରାଯାଇଛି । ତେବେ ଏହି ଅଘଟଣ ପରେ ଯୁବକଙ୍କ ପରିଚୟ ମିଳିଛି । ତାଙ୍କ ନାଁ ବିଚିତ୍ର ପଲେଇ, ଘର ଯାଜପୁର ଅଞ୍ଚଳରେ । ସେ ଭୁବନେଶ୍ୱର ଗାଡକଣା ଅଞ୍ଚଳରେ ରହିଆସୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ସିସିଟିଭି ଫୁଟେଜରୁ ବିଚିତ୍ରଙ୍କ ମୃତ୍ୟୁ ଅସ୍ୱାଭାବିକ ମନେ ହେଉଥିବାବେଳେ, ପରିବାର ଲୋକଙ୍କ ଅଭିଯୋଗ ଆଧାରରେ ଆଇପିସିର ଧାରା ୩୦୨ ଅର୍ଥାତ ହତ୍ୟା ମାମଲା ରୁଜୁ କରି ତଦନ୍ତ ଚଳାଇଛି କମିଶନରେଟ ପୋଲିସ ।
ତେବେ ସବୁକିଛି ଥାନା ପରିସରରେ ଘଟିଛି । ତେଣୁ ପୂରା ଘଟଣା ବୁଝିବାକୁ ପୋଲିସକୁ ବେଶି ସମୟ ଲାଗିନଥିଲା । ପ୍ରତ୍ୟକ୍ଷଦର୍ଶୀଙ୍କ ବୟାନ ଆଧାରରେ ୨ ଜଣଙ୍କୁ ଉଠାଇ ଆଣିଛି ସହିଦନଗର ଥାନା ପୋଲିସ । ସୂଚନା ଅନୁସାରେ ବିଚିତ୍ର ମିଠା ବ୍ୟବସାୟ କରୁଥିଲେ । ଘୋର ଆର୍ଥିକ ଅନଟନ ଦେଇ ଗତି କରୁଥିବାବେଳେ କରଜ ଓ ସୁଧ କାରବାରକୁ ନେଇ ତାଙ୍କୁ ଅପହରଣ କରାଯାଇଥିଲା । ପୋଲିସ ଉଠାଇ ଆଣିଥିବା ନେତ୍ରମଣି ବେହେରା ଓ ବଟକୃଷ୍ଣ ବେହେରାଙ୍କଠାରୁ ବିଚିତ୍ର ୩ ଲକ୍ଷ ଟଙ୍କା ଧାର ନେଇ ଶୁଝି ପାରୁନଥିଲେ । ଟଙ୍କା ଆଦାୟ ପାଇଁ ତାଙ୍କୁ ଗୁରୁବାର ଅପହରଣ କରିନେଇ ମାରପିଟ କରୁଥିବାବେଳେ ବାଣିବିହାରରେ କାରର ଗତି କମ୍ ହେବାରୁ ଖସିଆସିଥିଲେ ବିଚିତ୍ର । ଅପହରଣକାରୀଙ୍କ ସହ ତାଙ୍କର ଠେଲାପେଲା ହେଉଥିବାବେଳେ ଉଦ୍ଧାର କରିଥିଲେ କିଛି ଛାତ୍ର । ବାଇକରେ ବସାଇ ତାଙ୍କୁ ସହିଦନଗର ଥାନାକୁ ଆଣିଥିଲେ । ଯେଉଁଠି ତାଙ୍କର ମୃତ୍ୟୁ ହୋଇଛି ।
ପ୍ରତ୍ୟକ୍ଷଦର୍ଶୀଙ୍କ କହିବା ହେଲା, ଅପହରଣକାରୀ ତାଙ୍କୁ ମାରପିଟ କରିଛନ୍ତି । ପରିବାର ଲୋକ ମଧ୍ୟ ପୁଅକୁ ପିଟି ପିଟି ମାରିଦେଇଥିବା ଅଭିଯୋଗ କରିବା ପରେ ହତ୍ୟା ମାମଲା ରୁଜୁ କରିଛି ପୋଲିସ । ଗିରଫ ନେତ୍ରମଣି ଓ ବଟକୃଷ୍ଣ ସଂପର୍କରେ ଭାଇ-ଭଉଣୀ ବୋଲି ଜଣାପଡିଛି । ଅପହରଣ କରାଯାଇଥିବା କାରକୁ ମଧ୍ୟ ପୋଲିସ ଜବତ କରିଛି ।