କନକ ବ୍ୟୁରୋ: ଅର୍ଚ୍ଚନା ନାଗଙ୍କୁ ନେଇ ଚାରିଆଡେ ଚର୍ଚ୍ଚା ହେଉଥିଲେ ବି ପୋଲିସର ତଦନ୍ତ ପ୍ରକ୍ରିୟାକୁ ନେଇ ସନ୍ଦେହ ବଢ଼ିବାରେ ଲାଗିଛି । ବ୍ଲାକମେଲିଂ ଓ ହନିଟ୍ରାପ୍ ଅଭିଯୋଗରେ ଏବେ ଅର୍ଚ୍ଚନା ଜେଲରେ ଅଛନ୍ତି । କିନ୍ତୁ ସମାନ ଅଭିଯୋଗ ଥାଇ ମଧ୍ୟ ତାଙ୍କ ସ୍ୱାମୀ ଜଗବନ୍ଧୁ ଓ ସହଯୋଗୀ ଖଗେଶ୍ୱରଙ୍କ ବିରୋଧରେ ପୋଲିସର କାର୍ଯ୍ୟାନୁଷ୍ଠାନ ଶୂନ । ପ୍ରଶ୍ନ ଉଠୁଛି, ସମାନ ଏତଲା ହୋଇଥିଲେ ପୋଲିସ କାହିଁକି ସେମାନଙ୍କୁ ଅନୁକମ୍ପା ଦେଖାଉଛି? କାହାର ରହିଛି କି ଚାପ?
Kanak News is now on WhatsApp
Join and get latest news updates delivered to you via WhatsApp
- ଚାପି ହୋଇଯାଉଛି କି ଅର୍ଚ୍ଚନା ନାଗ ମାମଲା?
- ଜଗବନ୍ଧୁ ଓ ଖଗେଶ୍ୱର ବୁଲୁଛନ୍ତି ଖୁଲମଖୁଲ୍ଲା!
ମାମଲା ଏକ, ଅଭିଯୁକ୍ତ ଅନେକ । ରାଜ୍ୟର ସବୁଠୁ ବଡ ହନିଟ୍ରାପ ଓ ବ୍ଲାକମେଲର କାହାଣୀ ସେତେବେଳେ ପଦାକୁ ଆସିଥିଲା ଯେତେବେଳେ ଜଣେ ଯୁବତୀ ଅର୍ଚ୍ଚନାର ନାଗଫାଶର ଖୁଲାସା କରି ଥାନାର ଦ୍ୱାରସ୍ଥ ହୋଇଥିଲେ । ଯୁବତୀ ଜଣକ ଖଣ୍ଡଗିରି ଥାନାରେ ଦେଇଥିବା ଏଫଆଇଆରରେ ରହିଛି ତିନି ଅଭିଯୁକ୍ତଙ୍କ ନାଁ । ଆଇପିସିର ଦଫା ୩୭୦ ଅର୍ଥାତ୍ ବେଆଇନ ମାନବ ଚାଲାଣ ଭଳି ୧୬ଟି ଦଫାରେ ଝାରପଡା ଜେଲରେ ଅର୍ଚ୍ଚନା ନାଗ । ସେହି ଏତଲାରେ ଅର୍ଚ୍ଚନା ସମେତ ତାଙ୍କ ସ୍ୱାମୀ ଜଗବନ୍ଧୁ ଚାନ୍ଦ ଓ ସହଯୋଗୀ ଖଗେଶ୍ୱର ପାତ୍ରଙ୍କ ନାଁ ମଧ୍ୟ ରହିଛି । ଯୁବତୀ ଦେଇଥିବା ଏତଲାରେ ସ୍ପଷ୍ଟ ଭାବେ ଲେଖାଯାଇଛି, ଜଗବନ୍ଧୁ ଓ ଖଗେଶ୍ୱର ଧନୀ, ବ୍ୟବସାୟୀଙ୍କ ତାଲିକା ପ୍ରସ୍ତୁତ କରି ଅର୍ଚ୍ଚନାଙ୍କୁ ଦେଉଥିଲେ । ଅର୍ଚ୍ଚନାଙ୍କ କାରନାମାରେ ଏମାନେ ସଂପୃକ୍ତ ବୋଲି ଯୁବତୀ ଲେଖିଥିଲେ । କିନ୍ତୁ ପ୍ରଶ୍ନ ଉଠୁଛି ଏହି ମାମଲାରେ ଅର୍ଚ୍ଚନାଙ୍କୁ ବାଦ ଦେଲେ ଅନ୍ୟ ଦୁଇ ଅଭିଯୁକ୍ତ ଖୁଲମ ଖୁଲ୍ଲା ବାହାରେ ବୁଲୁଛନ୍ତି ।
ସେପଟେ ଅର୍ଚ୍ଚନା ନାଗ ବ୍ଲାକମେଲିଂ ମାମଲାର ସିବିଆଇ ତଦନ୍ତ କରିବାକୁ ଦାବି କରିଛି ବିଜେପି । ବିରୋଧୀ ଦଳ ନେତା କହିଛନ୍ତି ଅର୍ଚ୍ଚନାର ନାଗଫାଶରେ ରାଜ୍ୟ ପୁଲିସର ବରିଷ୍ଠ ଅଧିକାରୀ ସଂପୃକ୍ତ ଅଛନ୍ତି । ତେଣୁ ରାଜ୍ୟ ସରକାରଙ୍କ ପୁଲିସ ତଦନ୍ତ କଲେ ତଦନ୍ତ ଠିକ ହେବ ନାହିଁ । ନିରପେକ୍ଷ ତଦନ୍ତ ପାଇଁ ଏହି ମାମଲା ସିବିଆଇକୁ ଦିଆଯାଉ ବୋଲି କହିଛନ୍ତି ଜୟ ନାରାୟଣ ମିଶ୍ର । ତେବେ ରାଜ୍ୟର ସବୁଠୁ ବଡ ହନିଟ୍ରାପ ଓ ବ୍ଲାକମେଲିଂ ମାମଲାରେ ଅର୍ଚ୍ଚନା ନାଗ ଗିରଫ ପରେ ତଦନ୍ତ ଟିକେ ଧିମେଇ ଯାଇଥିବା ଚର୍ଚ୍ଚା ହେଉଛି । ଆଉ ଏହାରି ଭିତରେ ଅର୍ଚ୍ଚନା ନାଗଙ୍କ ଜାମିନ ଆବେଦନର ରାୟ ସୋମବାର ଆସିବାକୁ ଯାଉଛି ।