ବିଜେଡି ସରକାରକୁ ଉପାଡି ଫିଙ୍ଗ, ଓଡ଼ିଆ ପୁଅକୁ ମୁଖ୍ୟମନ୍ତ୍ରୀ କରିବ ବିଜେପି । ପରଜଙ୍ଗ ସଭାରୁ ବିଜେଡିକୁ ଅମିତ ଶାହାଙ୍କ ଟାର୍ଗେଟ ।
କନକ ବ୍ୟୁରୋ : ଢେଙ୍କାନାଳ ପରଜଙ୍ଗରେ ଗୃହମନ୍ତ୍ରୀ ଅମିତ ଶାହାଙ୍କ ପ୍ରଚାର । ବିଶାଳ ଜନସଭାକୁ ସମ୍ବୋଧିତ କରି ଶାହା କହିଛନ୍ତି, ଏଥର ଓଡ଼ିଶାରେ ବିଜେପି ସରକାର ହେବାକୁ ଯାଉଛି । ଗତ ୧୦ ବର୍ଷ ମଧ୍ୟରେ ମୋଦୀ ଗରିବଙ୍କ କଲ୍ୟାଣ ପାଇଁ ଅନେକ କାମ କରୁଛନ୍ତି । ମୋଦୀ ସରକାର ୫ କିଲୋ ଲେଖାଏଁ ଚାଉଳ ଦେଉଛନ୍ତି । ସମସ୍ତଙ୍କୁ ଘର, ପାଣି, ଉଜ୍ଜଳା ଯୋଜନାରେ ଗ୍ୟାସ ଯୋଗାଇଛି । ପୂରା ଦେଶ ମୋଦୀଙ୍କୁ ପୁଣିଥରେ ପ୍ରଧାନମନ୍ତ୍ରୀ କରିବାକୁ ଚାହୁଁଛି ।
Kanak News is now on WhatsApp
Join and get latest news updates delivered to you via WhatsApp
ଶାହା କହିଛନ୍ତି, ଓଡ଼ିଶାରେ ତାମିଲ ବାବୁ ଶାସନ କରିପାରିବେ କି? କିନ୍ତୁ ତାମିଲ ବାବୁଙ୍କୁ ନବୀନ ବାବୁ ଓଡ଼ିଶାର ରାଜା କରିଛନ୍ତି । ଏ ବିଜେଡି ସରକାରକୁ ଉପାଡି ଫିଙ୍ଗିବା ସହ ଏହି ମାଟିର ପୁଅକୁ ମୁଖ୍ୟମନ୍ତ୍ରୀ କରିବ ବିଜେପି । ଏ ବାବୁ ମାନେ ଓଡ଼ିଶାରେ ଲୁଟ୍ କରି ଚାଲିଛନ୍ତି । ଓଡ଼ିଶାର ଖଣି ଖାଦାନକୁ ଲୁଟି ଖାଇଛନ୍ତି । ବିଜେପି ସରକାର ହେଲେ ଦୁର୍ନୀତିଖୋର ବାବୁଙ୍କୁ ଜେଲରେ ଭର୍ତ୍ତି କରିବୁ । ମହାପ୍ରଭୁଙ୍କ ପବିତ୍ର ରତ୍ନଭଣ୍ଡାରର ଚାବି ହଜିଗଲା, ଡୁପ୍ଲିକେଟ ଚାବି ବୁଲିଲା, ଯାଞ୍ଚ ରିପୋର୍ଟ ସାବର୍ଜନୀନ କରାଗଲାନି । କିନ୍ତୁ ବିଜେପି ସରକାର ଆସିଲେ ଯାଞ୍ଚ ରିପୋର୍ଟକୁ ସାବର୍ଜନୀନ କରିବା ସହ ରତ୍ନଭଣ୍ଡାରର ଟିକିନିକି ତଥ୍ୟ ଓଡ଼ିଶାବାସୀଙ୍କ ସାମ୍ନାରେ ରଖିବୁ । ରତ୍ନଭଣ୍ଡାର ଚାବି ହଜାଇଥିବା ବ୍ୟକ୍ତିଙ୍କୁ ଆମେ ନିଶ୍ଚୟ ଦଣ୍ଡ ଦେବୁ ।
ଖଣିଜ ସମ୍ପଦରେ ଭରପୁର ରହିଛି ଓଡ଼ିଶା । ସମୃଦ୍ଧ ଓଡ଼ିଶାର ଜନତା ଗରିବ । ଏଠାରେ ଯୁବବର୍ଗ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି । ବିଜେପି ସରକାରରେ ଓଡ଼ିଶାରେ ଯୁବବର୍ଗଙ୍କୁ ନିଯୁକ୍ତି ଦିଆଯିବ । ଆୟୁଷ୍ମାନ ଯୋଜନାକୁ ନବୀନ ସରକାର ଲାଗୁ କରୁନାହାନ୍ତି । ନବୀନ ସରକାରକୁ ବିଦା କରନ୍ତୁ, ଆୟୁଷ୍ମାନ ଯୋଜନାକୁ ତୁରନ୍ତ ଓଡ଼ିଶାରେ ଲାଗୁ କରିବୁ । ବୁଣାକାରଙ୍କ କଲ୍ୟାଣ ପାଇଁ ୩୦୦୦ ଟଙ୍କା ଲେଖାଏଁ ଦେବୁ । ନବୀନ ବାବୁ ବୁଢା ହୋଇଗଲେଣି, ତେଣୁ ତାଙ୍କୁ ବିଦା କରନ୍ତୁ । ବିଜେପି ସରକାରର ୨ ବର୍ଷ ଭିତରେ ଦେଢ ଲକ୍ଷ ଯୁବବର୍ଗଙ୍କୁ ନିଯୁକ୍ତି ଦେବୁ । ୩ କୋଟି ଲକ୍ଷପତି ଦିଦିଙ୍କ ମଧ୍ୟରୁ ୨୫ ଲକ୍ଷ ଲକ୍ଷପତି ଦିଦି ଓଡ଼ିଶାରୁ ସୃଷ୍ଟି କରିବୁ ।
ଅଯୋଧ୍ୟାରେ ରାମ ମନ୍ଦିରର ନିର୍ମାଣ ହେଲା । କଂଗ୍ରେସ ୭୦ ବର୍ଷ ଧରି ଏହାକୁ ବିରୋଧ କରୁଥିଲା । କିନ୍ତୁ ପ୍ରଧାନମନ୍ତ୍ରୀ ମୋଦୀଙ୍କ ସହଯୋଗରେ ଅଯୋଧ୍ୟାରେ ରାମ ମନ୍ଦିରର ନିର୍ମାଣ ହେଲା । ପୂରା ଦେଶ ରାମ ଉତ୍ସବ ପାଳନ କଲା ବେଳେ ବିଜେଡି ସରକାର ଓ ତାମିଲ ବାବୁ ରାମ ଉତ୍ସବରେ ସାମିଲ ହେବାକୁ ରାମଭକ୍ତଙ୍କୁ ଅଟକାଇଥିଲେ । ଏଭଳି ସରକାରକୁ ଭୋଟ ଦେବା କଥା ନୁହେଁ । ନରେନ୍ଦ୍ର ମୋଦୀ ଏ ଦେଶକୁ ସୁରକ୍ଷିତ ରଖିବାକୁ କାମ କରୁଛନ୍ତି । ମୋଦୀ କାଶ୍ମୀରରୁ ଧାରା ୩୭୦ ହଟାଇବା ସହ ଆତଙ୍କବାଦୀଙ୍କୁ ମୁହଁତୋଡ ଜବାବ ଦେଇଛନ୍ତି । କଂଗ୍ରେସ ନେତା କହୁଛନ୍ତି ପାକିସ୍ତାନ ପାଖରେ ପରମାଣୁ ବୋମା ଅଛି ତେଣୁ ପିଓକେ କଥା ନ କହିବାକୁ ଭୟଭୀତ କରୁଛନ୍ତି । କଂଗ୍ରେସ ନେତାଙ୍କୁ ଯଦି ଡରିବାର ଅଛି ତ ଡରନ୍ତୁ , କିନ୍ତୁ ବିଜେପି କର୍ମୀ ଡରିବାର ନାହିଁ । ପିଓକେ ଭାରତର ଥିଲା ଆଗକୁ ମଧ୍ୟ ରହିବ । ଏହାକୁ ଆମେ ନିଶ୍ଚୟ ଆଣିବୁ । ଓଡ଼ିଶାକୁ ଏକ ନମ୍ବର କରିବାକୁ ହେଲେ ବିଜେପି ପ୍ରାର୍ଥୀଙ୍କୁ ଜିତାଇବାକୁ ଅପିଲ କରିଛନ୍ତି ଅମିତ ଶାହା ।