ମହାପ୍ରଭୁଙ୍କୁ ନେଇ ସମ୍ବିତଙ୍କ ବିବାଦୀୟ ବୟାନ ପ୍ରସଙ୍ଗରେ ପ୍ରତିକ୍ରିୟା ରଖିଲେ ଭିକେ ପାଣ୍ଡିଆନ୍ । କହିଲେ, ଜଗନ୍ନାଥ ହେଉଛନ୍ତି ଓଡିଆ ଅସ୍ମିତାର ପ୍ରତୀକ । ଭଗବାନଙ୍କୁ ରାଜନୀତିରୁ ଦୂରେଇ ରଖାଯାଉ ।
କନକ ବ୍ୟୁରୋ: ମହାପ୍ରଭୁ ଜଗନ୍ନାଥଙ୍କୁ ନେଇ ପୁରୀ ବିଜେପି ଲୋକସଭା ପ୍ରାର୍ଥୀ ସମ୍ବିତ ପାତ୍ର ବିବାଦୀୟ ବୟାନ ରଖିବା ପରେ ଏନେଇ ପ୍ରତିକ୍ରିୟା ରଖିଛନ୍ତି ବିଜେଡି ନେତା ଭିକେ ପାଣ୍ଡିଆନ୍ । ଜାତୀୟ ଖବର ସରବରାହ ସଂସ୍ଥା ଏଏନଆଇକୁ ଇଣ୍ଟରଭ୍ୟୁ ଦେଇ ପାଣ୍ଡିଆନ୍ କହିଛନ୍ତି, ଆମକୁ ଭଗବାନ ଜଗନ୍ନାଥଙ୍କୁ ରାଜନୀତିରୁ ବାହାରେ ରଖିବାକୁ ହେବ । ଏଥିସହିତ ସମ୍ବିତ ପାତ୍ରଙ୍କୁ ପାଣ୍ଡିଆନ୍ ନିଜର ଧ୍ୟାନ ରଖିବାକୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାଣ୍ଡିଆନ୍ କହିଛନ୍ତି, ବିଜେପି ଓଡିଆ ଅସ୍ମିତାର କଥା କହୁଛି ଏବଂ ଭଗବାନ ଜଗନ୍ନାଥ ହେଉଛନ୍ତି ଓଡିଆ ଅସ୍ମିତାର ପ୍ରତୀକ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ଅନୁଭବ କରିଛନ୍ତି ଯେ, ଭଗବାନଙ୍କୁ ରାଜନୀତିରୁ ବାହାରେ ରଖିବେ । ଭଗବାନ ହେଉଛନ୍ତି ଅମର, ଆମେ ହେଉଛେ ନଶ୍ୱର । ତେଣୁ ଆମେ ଦୁହିଁଙ୍କୁ କାହିଁକି ସବୁବେଳେ ମିଶାଇବା ବୋଲି ପ୍ରଶ୍ନ କରିବା ସହିତ ରାଜନୀତିରୁ ଦୁରେଇ ରଖିବା ଉଚିତ୍ ବୋଲି କହିଛନ୍ତି ପାଣ୍ଡିଆନ୍ । ଅନ୍ୟପଟେ ଏଭଳି ବିବାଦୀୟ ବୟାନ ଯେତେବେଳେ ଦିଆହେଲା, ସେତେବେଳେ ମୁଖ୍ୟମନ୍ତ୍ରୀଙ୍କୁ ମଧ୍ୟ ଦୁଃଖ ହେଲା ବୋଲି କହିଛନ୍ତି ପାଣ୍ଡିଆନ୍ ।
ଅନ୍ୟପଟେ ସେ ଆହୁରି ମଧ୍ୟ କହିଛନ୍ତି ଯେ, ଓଡିଶାର ଲୋକ ନିର୍ବାଚନରେ ଧର୍ମ କିମ୍ବା ମହାପ୍ରଭୁ ଜଗନ୍ନାଥଙ୍କୁ ଆଣିବା ପସନ୍ଦ କରନ୍ତିନି । ଏହା ପ୍ରଥମ ଥର ପାଇଁ ହେଇଛି । ଗତ ୨୦୧୯ ସାଧାରଣ ନିର୍ବାଚନ ଏବଂ ପଞ୍ଚାୟତ ନିର୍ବାଚନ ସମୟରେ ମଧ୍ୟ ଏଭଳି ହେଇଥିଲା ବୋଲି କହିଛନ୍ତି ପାଣ୍ଡିଆନ୍ । ସେମାନେ ସବୁବେଳେ କିଛି ନା କିଛିକୁ ଧର୍ମ ଏବଂ ମହାପ୍ରଭୁ ଜଗନ୍ନାଥଙ୍କ ସହ ଯୋଡି ଦେଇଥାନ୍ତି । ବିଜେପି ନିର୍ବାଚନରେ ବିଜେଡି ଏବଂ ନବୀନ ପଟ୍ଟନାୟକଙ୍କୁ ଟକ୍କର ଦେବାକୁ ଚେଷ୍ଟା କରୁଛି । ତେଣୁ ଏଭଳି ରଣନୀତି ଆପଣାଉଥିବା କହିଛନ୍ତି ଭିକେ ପାଣ୍ଡିଆନ୍ ।
ଶେଷରେ ସମ୍ବିତ ପାତ୍ର ନିଜର ସ୍ୱାସ୍ଥ୍ୟ ପ୍ରତି ଧ୍ୟାନ ଦେବାକୁ କହିବା ସହ ଭୀଷଣ ଗରମ, ଧୂଳି ପ୍ରତି ସଚେତନ ରହିବାକୁ କହିଛନ୍ତି ପାଣ୍ଡିଆନ୍ । ଆଉ ମାତ୍ର ୩ ଦିନ ପରେ ତାଙ୍କ ନିର୍ବାଚନ ହେବାକୁ ଅଛି । ତେଣୁ ଏଭଳି ସମୟରେ ସେ ଉପବାସ କଲେ, ଚେତା ହରାଇପାରନ୍ତି ବୋଲି କହିଛନ୍ତି ଶାହା ।