ଦିଗପହଣ୍ଡି ଦୁର୍ଘଟଣା ପାଇଁ ଦାୟୀ କିଏ? ପ୍ରାଥମିକ ତଦନ୍ତ ପରେ ସୂଚନା ଦେଲେ ବ୍ରହ୍ମପୁର ଏସପି
କନକ ବ୍ୟୁରୋ: ଦିଗପହଣ୍ଡି ବସ ଦୁର୍ଘଟଣା ପାଇଁ ଓଏସଆରଟିସି ବସ ଡ୍ରାଇଭର ଦାୟୀ । ଦୁର୍ଘଟଣା ପରେ ସଂପୃକ୍ତ ଡ୍ରାଇଭର ଘଟଣାସ୍ଥଳରୁ ଫେରାର ହୋଇ ଭୁବନେଶ୍ୱର ଚାଲି ଆସିଥିଲେ । ପରେ କମିଶନରେଟ ପୋଲିସ ସାହାଯ୍ୟରେ ଦିଗପହଣ୍ଡି ପୋଲିସ ଡ୍ରାଇଭରଙ୍କୁ ନେଇ ଘଟଣାସ୍ଥଳରେ ଦୁର୍ଘଟଣାର ଡେମୋ କରାଇଥିଲେ । ଓଏସଆରଟିସି ବସଟି ଦ୍ରୁତ ଗତିରେ ଆସୁଥିଲା ଓ ମଧ୍ୟରାତ୍ରୀ ସଂପୃକ୍ତ ରାତିରେ ଡ୍ରାଇଭରଙ୍କ ଆଖି ପଡିଯାଇଥିଲା ବୋଲି କହିଛନ୍ତି ବ୍ରହ୍ମପୁର ଏସପି । ଫଳରେ ଘଟିଥିବା ମର୍ମନ୍ତୁଦ ଦୁର୍ଘଟଣା ଯୋଗୁଁ ଝିଅ ବାହାଘର ସାରି ଫେରୁଥିବା କନ୍ୟା ଯାତ୍ରୀଙ୍କ ମଧ୍ୟରୁ ୧୨ ଜଣଙ୍କର ଦୁଃଖଦ ମୃତ୍ୟୁ ଘଟିଥିଲା ।
Kanak News is now on WhatsApp
Join and get latest news updates delivered to you via WhatsApp
ଦିଗପହଣ୍ଡି ବସ୍ ଦୁର୍ଘଟଣାରେ ଓଏସଆରଟିସି ବସ୍ ଡ୍ରାଇଭରଙ୍କ ଭୁଲ ଥିବା ବ୍ରହ୍ମପୁର ଏସପି ସ୍ପଷ୍ଟ କରିଥିବା ବେଳେ କେମିତି ହୋଇଥିଲା ଦୁର୍ଘଟଣା? ଦୁର୍ଘଟଣା କେଉଁ ପରିସ୍ଥିତିରେ ଘଟିଥିଲା? ସେ ନେଇ ଘଟଣାସ୍ଥଳରେ ଛାନବିନ୍ କରିଛି ପୁଲିସ୍ ଟିମ୍ । କାଲି ରାତିରେ ଓଏସଆରଟିସି ବସ୍ ଡ୍ରାଇଭର ମାନସ ପ୍ରଧାନଙ୍କୁ ଦୁର୍ଘଟଣାସ୍ଥଳକୁ ନେଇ ଡେମୋ କରାଯାଇଛି । ଘଟଣାସ୍ଥଳରେ ଦୁର୍ଘଟଣାର ପୁରା କାହାଣୀ ସାମ୍ନାରେ ରଖିଛନ୍ତି ବସ୍ ଡ୍ରାଇଭର ।
ଯଦିଓ ଓଏସଆରଟିସି ବସ୍ ଡ୍ରାଇଭର ମିନି ବସ୍ ଧକ୍କା ଦେଇଥିଲା ବୋଲି ସଫେଇ ରହିଛନ୍ତି । ତଥାପି ପ୍ରାଥମିକ ତଦନ୍ତ ପରେ ବ୍ରହ୍ମପୁର ଏସପି, ଯେଉଁ ସୂଚନା ଦେଇଛନ୍ତି ତାହା ଚିନ୍ତାଜନକ । ସେ କହିଛନ୍ତି-
ଓଏସଆରଟିସି ବସ୍ ଡ୍ରାଇଭରଙ୍କ ତ୍ରୁଟି ଯୋଗୁଁ ଘଟିଛି ଦୁର୍ଘଟଣା । ସେପଟେ ମଦ୍ୟପାନ କରିଥିବା ସନ୍ଦେହରେ ଉଭୟ ବସ୍୍ର ଡ୍ରାଇଭରଙ୍କ ମେଡିକାଲ ପରୀକ୍ଷା କରାଯାଇଥିଲା । ଉଭୟଙ୍କ ରିପୋର୍ଟ ନେଗେଟିଭ ଆସିଛି । ତେବେ ଓଏସଆରଟିିସି ବସ ଡ୍ରାଇଭରଙ୍କ ତ୍ରୁଟିପୂର୍ଣ୍ଣ ଚାଳନା ଯୋଗୁଁ ଦୁର୍ଘଟଣା ହୋଇଥିବା ପ୍ରଥମିକ ତଦନ୍ତରୁ ଜଣାପଡ଼ିଛି ।
ଏପଟେ ଦିଗପହଣ୍ଡି ବସ୍ ଦୁର୍ଘଟଣା ପରେ ଚେତିଛି ପରିବହନ ବିଭାଗର ଚେତା । ସେପ୍ଟେମ୍ବର ମାସରୁ ଅଟୋ ଓ ବାଇକ୍ ବ୍ୟତୀତ ସବୁ ଗାଡ଼ିରେ ଲାଗିବ ଭିଏଲ୍ଟିସି ବ୍ୟବସ୍ଥା । ପାସେଞ୍ଜରଙ୍କ ପାଇଁ ଗାଡ଼ିରେ ପାନିକ୍ ବଟନ୍ ବ୍ୟବସ୍ଥା ମଧ୍ୟ ରହିବ । ଜାତୀୟ ପରମିଟ୍ ଥିବା ମାଲବାହୀ ଗାଡ଼ିରେ ମଧ୍ୟ ଲାଗିବ ଭିଏଲଟିସି ବା ଭେଇକିଲ୍ ଲୋକେସନ୍ ଟ୍ରାକିଂ ଡିଭାଇସ୍ । ଫଳରେ ଗାଡ଼ିର ପରମିଟ୍, ସ୍ପିଡ୍, ଯାତ୍ରୀଙ୍କ ସଂଖ୍ୟା, ଗାଡ଼ିର ଫିଟନେସ୍, ଗାଡ଼ିର ଲୋକେସନ୍ ଭଳି ତଥ୍ୟ କଂଟ୍ରୋଲ୍ ରୁମରୁ ଜଣାପଡ଼ିବ ।
କୌଣସି ଦୁର୍ଘଟଣା ଘଟିଲେ ପରିବହନ ବିଭାଗ ଯେଉଁ ଭଳି ତତ୍ପରତା ଦେଖାଉଛି, ଯଦି ପୂର୍ବରୁ ଏଭଳି ତତ୍ପରତା ଦେଖାଉଥାନ୍ତା, ହୁଏତ ଦିଗପହଣ୍ଡି ଭଳି ଘଟଣା ରୋକିବାରେ ସମ୍ଭବ ହେଉଥାନ୍ତା । କାରଣ, ଏବେ ବି ପ୍ରାୟ ୩ ହାଜର ଅନ୍ଫିଟ୍ ବସ୍ ରାସ୍ତାରେ ଚାଲୁଛି ।