କନକ ବ୍ୟୁରୋ: ମେ’ ୧୩ତାରିଖରେ ଓଡ଼ିଶାରେ ପ୍ରଥମ ପର୍ଯ୍ୟାୟ ନିର୍ବାଚନ ହେବ ଏବଂ ଜୁନ୍ ୪ରେ ଫଳାଫଳ ଆସିବ । ଏଥିପାଇଁ ଆଉ ଏକ ମାସ ସମୟ ବାକି ଥିବା ବେଳେ ରାଜ୍ୟରେ ସରକାର ଗଢ଼ିବା ନେଇ ଦମ୍ଭୋକ୍ତି ଦେଖାଇଛନ୍ତି ନେତା । ପ୍ରଧାନମନ୍ତ୍ରୀ କହିଛନ୍ତି ଜୁନ୍ ୪ତାରିଖରେ ବିଜେଡି ଶାସନ ସରିବ, ୬ତାରିଖରେ ବିଜେପିର ମୁଖ୍ୟମନ୍ତ୍ରୀ ଚୟନ ହେବ ଏବଂ ୧୦ ତାରିଖରେ ବିଜେପିର ଶପଥ ଗ୍ରହଣ ହେବ । ଏହାକୁ ଦିବାସ୍ୱପ୍ନ ବୋଲି କଟାକ୍ଷ କରିଛନ୍ତି ମୁଖ୍ୟମନ୍ତ୍ରୀ । ଆଉ ଏସବୁ ଭିତରେ ଭି.କେ ପାଣ୍ଡିଆନ୍ ପୁଣିଥରେ ନବୀନଙ୍କ ଶପଥ ଗ୍ରହଣର ତାରିଖ ସହ ସମୟ ମଧ୍ୟ ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନରେନ୍ଦ୍ର ମୋଦୀ ନବୀନ ପଟ୍ଟନାୟକ ଭି.କେ ପାଣ୍ଡିଆନ୍
ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀ ବିଜେଡି ନେତା
ନିର୍ବାଚନ ସରିନି, ଫଳାଫଳ ଆସିନି । କିଏ ସରକାର ଗଢ଼ିବ ତାହା ବି ସ୍ପଷ୍ଟ ହୋଇନି । ହେଲେ ନେତାଙ୍କ ଆତ୍ମବିଶ୍ୱାସ ଦେଖନ୍ତୁ, ଫଳାଫଳ ଆସିବାର ପ୍ରାୟ ଗୋଟିଏ ମାସ ଆଗରୁ କିଏ କେବେ ଶପଥ ଗ୍ରହଣ କରିବ ତାକୁ ନେଇ ବାଜି ଲାଗୁଛି, ବୟାନବାଜି ଚାଲିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିର୍ବାଚନୀ ସଭାରେ କହିଛନ୍ତି- ଜୁନ ୪ ତାରିଖରେ ବିଜେଡି ଶାସନ ସରିବ, ୬ ତାରିଖରେ ବିଜେପି ମୁଖ୍ୟମନ୍ତ୍ରୀ ଚୟନ ହେବ ଏବଂ ୧୦ ତାରିଖରେ ଶପଥ ଗ୍ରହଣ ହେବ ।
ମୋଦୀଙ୍କ ଏହି ଦମ୍ଭୋକ୍ତିର ମାତ୍ର କିଛି ଘଂଟା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟାକ୍ଷ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ଭିଡିଓ ବାର୍ତା ଜରିଆରେ କହିଛନ୍ତି ଯେ, କିଛି ଦିନ ହେବ ଦିନରେ ସ୍ୱପ୍ନ ଦେଖୁଛି ବିଜେପି । ଭିଡିଓଟିକୁ ସୋସିଆଲ ମିଡିଆରେ ସେୟାର କରିଛନ୍ତି ବିଜେଡି ନେତା ଭିକେ ପାଣ୍ଡିଆନ୍ । ଭବାନୀପାଟଣାରୁ ଖଡିଆଲ ଯିବା ରାସ୍ତାରେ ଏହି ଭିଡିଓଟି କରାଯାଇଛି ।
ଗୋଟିଏ ପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାର ଗଠନ ଓ ଜୁନ୍ ୧୦ରେ ଶପଥ ଗ୍ରହଣର ଦମ୍ଭୋକ୍ତି, ଅନ୍ୟପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ତାଚ୍ଛଲ୍ୟ । ଆଉ ଏହାରି ଭିତରେ ବିଜେଡି ନେତା ଭି.କେ ପାଣ୍ଡିଆନ୍ ଆଉ ଗୋଟିଏ ପାଦ ଆଗକୁ ଯାଇ ଶପଥ ଗ୍ରହଣର ତାରିଖ ସହ ସମୟ ମଧ୍ୟ ଘୋଷଣା କରିଛନ୍ତି । କହିଛନ୍ତି- ୯ ତାରିଖ, ସାଢ଼େ ୧୧ରୁ ସାଢ଼େ ଗୋଟିଏରେ ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇ ରେକର୍ଡ କରିବେ ।
ଏସବୁ ଭିତରେ ଦେଖିବାର କଥା, ଜୁନ୍ ୪ ତାରିଖରେ ଯେତେବେଳେ ଫଳାଫଳ ଆସିବ, ଜଣାପଡ଼ିବ କିଏ ସରକାର ଗଢ଼ିବ? କାହା ସପକ୍ଷରେ ଯିବ ଜନାଦେଶ? ଆଉ ମୁଖ୍ୟମନ୍ତ୍ରୀ ଭାବେ କିଏ ଶପଥ ନେବେ?