କନକ ବ୍ୟୁରୋ : ଆମେରିକାର ପ୍ରମୁଖ ଖବରକାଗଜ ‘ୱାଲ ଷ୍ଟ୍ରିଟ୍ ଜର୍ନାଲ’ ତାର ମତାମତ ପୃଷ୍ଟାରେ ବିଜେପିକୁ ବିଶ୍ୱର ମହତ୍ୱପୂର୍ଣ୍ଣ ଦଳ ବୋଲି ଲେଖିଛି । ଆମେରିକାର ପ୍ରମୁଖ ଶିକ୍ଷାବିତ୍ ବାଲ୍ଟର ରସେଲ ମିଡଙ୍କ ଏହି ଲେଖାରେ କୁହାଯାଇଛି କି, ଆମେରିକାର ଦେଶ ହିତ ନଜରରେ ବିଜେପି ବିଶ୍ୱର ସବୁଠାରୁ ମହତ୍ୱପୂର୍ଣ୍ଣ ବିଦେଶୀ ରାଜନୈତିକ ପାର୍ଟି । ଏହାସହ ୨୦୨୪ ନିର୍ବାଚନ ଜିତିବା ପାଇଁ ବିଜେପି ଆଗକୁ ବଢୁଥିବା କଥା ସେ ଲେଖିଛନ୍ତି । ଏହାସହ ମିଡ ଲେଖିଛନ୍ତି କି ଆଗାମୀ ଦିନରେ ବିଜେପି ଏଭଳି ଏକ ଦେଶରେ ନିଜର ଦବଦବା ପ୍ରତିଷ୍ଠା କରିବାକୁ ଯାଉଛି ଯେଉଁ ଦେଶର ବଢୁଥିବା ଶକ୍ତିକୁ ଅନ୍ୟଦେଶମାନେ ଆମେରିକା ଓ ଚୀନର ବିନା ସହାୟତାରେ ଅଟକାଯାଇପାରିବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ମିଡ ଆହୁରି ଲେଖିଛନ୍ତି କି, ଆମେରିକା ବିଶ୍ଳେଷକ, ଯେଉଁମାନେ ମୁଖ୍ୟତଃ ବାମ ବିଚାରଧାରାରେ ବିଶ୍ୱାସ କରନ୍ତି ସେମାନେ ମୋଦୀଙ୍କ ଉପରେ ପ୍ରଶ୍ନ ଉଠାଉଛନ୍ତି । ଏହି ପ୍ରଶ୍ନ ଅମୁଳକ ନୁହେଁ ବୋଲି ମିଡ୍ କହିଛନ୍ତି । ସେ କହିଛନ୍ତି କି, ଯେଉଁ ସାମ୍ବାଦିକମାନେ ଭାରତର କ୍ଷମତାରେ ଥିବା ରାଜନୈତିକ ଦଳକୁ ଆଲୋଚନା କରୁଛନ୍ତି ସେମାନଙ୍କୁ ଉତ୍ପୀଡନ କିମ୍ବା ତା ଠାରୁ ଅଧିକ ଯନ୍ତ୍ରଣାଦାୟକ ବିରୋଧର ସାମ୍ନା କରିବାକୁ ପଡିପାରେ । ଏହାସହ ଭାରତୀୟ ଅଳ୍ପସଂଖ୍ୟକ, ଯେଉଁମାନେ ହିନ୍ଦୁବାଦୀ ବିଚାରଧାରାର ବିରୋଧୀ, ସେମାନଙ୍କୁ ଭିଡ ହିଂସା ଓ ଧର୍ମାନ୍ତରଣ ବିରୋଧୀ ଆଇନର ସାମ୍ନା କରିବାକୁ ପଡୁଛି ।
ମିଡ ଆରଏସଏସକୁ ପ୍ରଶଂସା ମଧ୍ୟ କରିଛନ୍ତି । ସେ ଲେଖିଛନ୍ତି କି, ବିଜେପି ଭାରତର ପୂର୍ବୋତ୍ତର ରାଜ୍ୟମାନଙ୍କରେ ଉଲ୍ଲେଖନୀୟ ବିଜୟ ହାସଲ କରିଛି । ପାଖାପାଖି ୨୦କୋଟି ଜନସଂଖ୍ୟା ବିଶିଷ୍ଠ ଉତ୍ତର ପ୍ରଦେଶରେ ବିଜେପି ସରକାରଙ୍କୁ ସିୟା ସଂପ୍ରଦାୟର ମୁସଲମାନମାନେ ସମର୍ଥନ କରୁଛନ୍ତି । ଆରଏସଏସ କାର୍ଯ୍ୟକର୍ତ୍ତାମାନେ ଜାତିଗତ ଭେଦଭାବ ସହ ଲଡିବାକୁ ପ୍ରୟାସ ଜାରି ରଖିଛନ୍ତି ।
ସେପଟେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ଆରଏସଏସ ପ୍ରମୁଖ ମୋହନ ଭାଗବତଙ୍କ ଭେଟକୁ ନେଇ ମିଡ୍ କହିଛନ୍ତି କି, ବିଜେପି ଓ ଆରଏସଏସ ମଧ୍ୟରେ ଏଭଳି ଗୁରୁତ୍ୱପୂର୍ଣ୍ଣ ବୈଠକ ପରେ ମୋର ପୂର୍ଣ୍ଣ ବିଶ୍ୱାସ ଯେ ସଂଘ ପରିବାର ଧାର୍ମିକ ଉତ୍ସାହ ଥିବା ଲୋକଙ୍କ ସହ ମିଶି ଦୁନିଆର ସବୁଠାରୁ ଶକ୍ତିଶାଳୀ ନାଗରିକ ସମାଜ ସଂଗଠନ ପ୍ରସ୍ତୁତ କରିସାରିଛି ।