କନକ ବ୍ୟୁରୋ: ବାହାନାଗା ଟ୍ରେନ ଦୁର୍ଘଟଣାରେ ଆହତଙ୍କ ଚିକିତ୍ସା ଚାଲିଛି । ଆହତଙ୍କ ଶୀଘ୍ର ସୁସ୍ଥ ହେବା ଏବେ ସମସ୍ତଙ୍କ ପାଇଁ ବଡ ଚ୍ୟାଲେଞ୍ଜ ପାଲଟିଛି । ଆହତଙ୍କୁ ଭୁବନେଶ୍ୱର ଏମ୍ସ, କଟକ ଏସସିବି ସମେତ ବାଲେଶ୍ୱର, ସୋର ଓ ଭଦ୍ରକରେ ଚିକିତ୍ସିତ କରାଯାଇଛି । ଆଜି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନନୁଖ ମାଣ୍ଡଭ୍ୟ ଆହତଙ୍କ ଅବସ୍ଥା ପଚାରି ବୁଝିଛନ୍ତି । ଦୁଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ଧର୍ମେନ୍ଦ୍ର ପ୍ରଧାନ ବି ବିଭିନ୍ନ ମେଡିକାଲ ବୁଲି ଆହତଙ୍କ ସ୍ୱାସ୍ଥ୍ୟବସ୍ଥା ବୁଝିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କରମଣ୍ଡଳ ଟ୍ରେନ ଦୁର୍ଘଟଣା ମୃତ୍ୟୁର ବିଭୀଷିକା ଖେଳାଇଥିବା ବେଳେ ଏବେ ଅନେକ ଗୁରୁତର ଭାବେ ଚିକିତ୍ସାଧୀନ ହୋଇ ମୃତ୍ୟୁ ସହ ସଂଗ୍ରାମ କରୁଛନ୍ତି । ଯାହା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପାଇଁ ବଡ ଚ୍ୟାଲେଞ୍ଜ । କାହାର ମେରୁଦଣ୍ଡ ଗୁରୁତର ଭାବେ ଆଘାତ ଲାଗିଛି ତ ଆଉ କାହାର ମୁଣ୍ଡରେ, ଏହିଭଳି ଅନେକ ଏବେ ଗୁରୁତର ହୋଇ ରାଜ୍ୟର ବିଭିନ୍ନ ହସ୍ପିଟାଲରେ ଚିକିତ୍ସାଧୀନ ରହିଛନ୍ତି ।
୨୬୦ ଜଣ ଗୁରୁତର ହୋଇ ଏମ୍ସ ସମେତ ରାଜ୍ୟର ବିଭିନ୍ନ ହସ୍ପିଟାଲରେ ଚିକିତ୍ସାଧୀନ ରହିଛନ୍ତି । ସ୍ୱାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ ବିଭିନ୍ନ ହସ୍ପିଟାଲ ବୁଲି ରୋଗୀଙ୍କ ସ୍ୱାସ୍ଥ୍ୟାବସ୍ଥାର ଅନୁଧ୍ୟାନ କରିଛନ୍ତି । ଆଶ୍ୱସ୍ତିକର କଥା ହେଲା ଏଥିମଧ୍ୟରୁ ଜଣଙ୍କ ଅବସ୍ଥା ଗମ୍ଭୀର ଥିବା ବେଳେ ଅନ୍ୟମାନଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି । ଟ୍ରେନ ଦୁର୍ଘଟଣା ପରେ ବର୍ତମାନର ସ୍ଥିତି ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ଅବଗତ କରାଇଛନ୍ତି ମୁଖ୍ୟମନ୍ତ୍ରୀ । ପ୍ରତିଟି ଜୀବନ ବଞ୍ଚାଇବା ପାଇଁ ସମସ୍ତ ପଦକ୍ଷେପ ନିଆଯାଉଥିବା କହିଛନ୍ତି ନବୀନ । ଏହାସହ ଆହତଙ୍କ ଚିକିତ୍ସା ପାଇଁ ଡାକ୍ତର, ଡାକ୍ତରୀ ଛାତ୍ର ଓ ଅନ୍ୟମାନେ ଲାଗିପଡିଛନ୍ତି ।
- କେମିତି ଅଛି ଗୁରୁତରଙ୍କ ସ୍ୱାସ୍ଥ୍ୟାବସ୍ଥା?
- ହସ୍ପିଟାଲ ବୁଲିଲେ ତିନି କେନ୍ଦ୍ରମନ୍ତ୍ରୀ
ସୋର ହସ୍ପିଟାଲ, ଭଦ୍ରକ ହସ୍ପିଟାଲ, ଏସସିବି ହସ୍ପିଟାଲ, ଏମ୍ସ ଭୁବନେଶ୍ୱର । ଦୁର୍ଘଟଣା ପରେ ଏବେ ଗୁରୁତର ହୋଇଥିବା ବ୍ୟକ୍ତି କିଭଳି ସୁସ୍ଥ ହେବେ ସେ ନେଇ ସମସ୍ତ ପ୍ରକାର ପ୍ରୟାସ ଚାଲିଛି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ, ରେଳମନ୍ତ୍ରୀ ଅଶ୍ୱିନୀ ବୈଷ୍ନବ, ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଭିନ୍ନ ହସ୍ପିଟାଲ ବୁଲି ଚିକିତ୍ସାଧୀନ ଥିବା ରୋଗୀଙ୍କ ସ୍ୱାସ୍ଥ୍ୟାବସ୍ଥା ପଚାରିବୁଝିଛନ୍ତି ।
ଗୁରୁତର କିଭଳି ଶୀଘ୍ର ଆରୋଗ୍ୟ ହୋଇପାରିବେ ସେଥିପାଇଁ ଦିଲ୍ଲୀ ଏମ୍ସର ୧୭ ଜଣିଆ ବିଶେଷଜ୍ଞ ଟିମ୍ ଆସିଛନ୍ତି । ଯେଉଁଥିରେ ରାମମନୋହର ଲୋହିଆ, ଦିଲ୍ଲୀ ଏମ୍ସ ସମେତ ଲେଡିହାର୍ଡେଂ ହସ୍ପିଟାଲର ଅଭିଜ୍ଞ ଡାକ୍ତର ଆସିଛନ୍ତି । ଚିକିତ୍ସା ଓ ଅପରେସନ ପାଇଁ ଅତ୍ୟାଧୁନିକ ଉପକରଣ ଏବଂ ଔଷଧ ଅଣାଯାଇଥିବା ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି । ସେପଟେ ପଶ୍ଚିମବଙ୍ଗର ବିଭିନ୍ନ ହସ୍ପିଟାଲରେ ୨୦୬ ଜଣ ଏବେ ଚିକିତ୍ସାଧୀନ ରହିଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଅନ୍ୟପଟେ ଚିକିତ୍ସିତ ହେଉଥିବା ଆହତଙ୍କୁ କେଉଁ ପ୍ରକାରର ଚିକିତ୍ସା ଆବଶ୍ୟକ ରହିଛି, କେଉଁ ବିଶେଷଜ୍ଞ ଡାକ୍ତର କେଉଁ ମେଡିକାଲ ଯିବେ ସେନେଇ ଏକ ପ୍ଲାନ ପ୍ରସ୍ତୁତ ହୋଇଛି ।