କନକ ବ୍ୟୁରୋ: ଜଙ୍ଗଲରେ ଚାଲିଛି ମାଫିଆ ରାଜ । ଦିନକୁ ଦିନ ସକ୍ରିୟ ହେଉଛନ୍ତି କାଠ ମାଫିଆ ଆଉ ଜଙ୍ଗଲରୁ କାଟି ନେଉଛନ୍ତି ମୂଲ୍ୟବାନ ଶାଗୁଆନ କାଠ । କିନ୍ତୁ ଗଛ କଟାରେ ରୋକ ଲାଗାଇ ପାରୁନି ଖଲ୍ଲିକୋଟ ବନ ବିଭାଗ । ଫଳରେ ପ୍ରାକୃତିକ ସୌନ୍ଦର୍ଯ୍ୟରେ ଭରା ପହାଡ ଏବେ ଶ୍ରୀହିନ ହେବାକୁ ବସିଛି । ତଥାପି ଚେଇଁ ଶୋଇଛି ବନ ବିଭାଗ । ଦୁଇ ମାସ ତଳେ ଆମେ ଦେଖାଇଥିଲୁ ନାରାୟଣୀର ଭାଲେରୀ ପାହାଡରୁ ଶାଗୁଆନ କାଠ ଚୋରିର ଦୃଶ୍ୟ । ଆଉ ଏବେ ସାମ୍ନାକୁ ଆସିଛି ସେଇ ଖଲ୍ଲିକୋଟ ଅଂଚଳ ଛାଂଚୁଣୀଆ ଜଙ୍ଗଲର ଦୃଶ୍ୟ । ଛାଂଚୁଣିଆ ଜଙ୍ଗଲ ଖଲ୍ଲିକୋଟ ବନାଂଚଳ ଅଧିନ ସୁମଣ୍ଡଳ ବନପାଳଙ୍କ କାର୍ଯ୍ୟାଳୟ ଅଧିନରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ମାସ ଭିତରେ ଏହି ଜଙ୍ଗଲରୁ ପ୍ରାୟ ୧୦୦ରୁ ଅଧିକ ଶାଗୁଆନ ଗଛକୁ କାଟି ନେଇ ଯାଇଛନ୍ତି କାଠ ମାଫିଆ । ଜଙ୍ଗଲ ମଧ୍ୟରୁ ବାଛି ବାଛି ୩ ରୁ ୪ ଫୁଟ ଗୋଲେଇର ଗଛକୁ ମେସିନ ସାହାଯ୍ୟରେ କାଟି ନେଉଛନ୍ତି ମାଫିଆ । କୈରାସି ଠାରୁ ବାଣିଆବାଡି ସଂଯୋଗ କରୁଥିବା ମୁଖ୍ୟ ରାସ୍ତା ନିକଟରେ ବାରମ୍ବାର ଗଛ କଟା ଯାଉଥିଲେ ମଧ୍ୟ ବନ ବିଭାଗ ଜାଣି ପାରୁନି । ଯାହାକୁ ନେଇ ଏବେ ବିରାଟ ପ୍ରଶ୍ନବାଚୀ ସୃଷ୍ଟି ହୋଇଛି । ଏହି ଛାଂଚୁଣୀଆ ଜଙ୍ଗଲ କୈରାସି ବନ ସୁରକ୍ଷା ସମିତି ହାତରେ ରହିଥିବା ବେଳେ ବନ ବିଭାଗ ସହଯୋଗ କରୁନଥିବାରୁ ବନ ସୁରକ୍ଷା ସମିତି ଜଙ୍ଗଲ ଉପରେ ସଠିକ ଢଙ୍ଗରେ ନଜର ରଖି ପାରୁନଥିବା ଅଭିଯୋଗ ହୋଇଛି । ଖାଲି ଏତିକି ନୁହେଁ ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ବନ କର୍ମଚାରୀଙ୍କ ଜାଣତରେ ମୂଲ୍ୟବାନ ଶାଗୁଆନ କାଠ ଚୋରୀ ହେଉଛି । ତେବେ ଭାଲେରୀ ପାହଡ ଓ ଛାଂଚୁଣିଆ ଜଙ୍ଗଲରେ ଶାଗୁଆନ ଗଛ କଟା ଘଟଣା ସାମ୍ନାକୁ ଆସିବା ପରେ ଖଲ୍ଲିକୋଟ ବନାଂଚଳ ଅଧିନରେ ଥିବା ଅନ୍ୟ ଜଙ୍ଗଲର ସୁରକ୍ଷାକୁ ନେଇ ସନ୍ଦେହ ପ୍ରକାଶ ପାଇଛି ।