ରାୟଗଡ଼ାରେ ଖାଁ ଖାଁ ପଡ଼ିଛି ଧଳା ସୁନା ମଣ୍ଡି । ସରକାରଙ୍କ ପକ୍ଷରୁ ଧାର୍ଯ୍ୟ ହୋଇଥିବା ମୂଲ୍ୟ ଚାଷୀଙ୍କୁ ସୁହାଉନଥିବା ଅଭିଯୋଗ
କନକ ବ୍ୟୁରୋ: ରାୟଗଡ଼ା ଜିଲ୍ଲାରୁ ଉତ୍ପାଦିତ ହେଉଥିବା କପାର ଚାହିଦା ଅନ୍ତର୍ଜାତୀୟ ବଜାରରେ ରହିଛି । ଜିଲ୍ଲାର ଅଧିକାଂଶ ଚାଷୀ କପା ଚାଷ କରି ଜୀବିକା ନିର୍ବାହ କରନ୍ତି । ତେବେ ଚାଷୀମାନେ ଉତ୍ପାଦିତ କପାକୁ ମଣ୍ଡିରେ ବିକ୍ରି ନକରି ବାହାରେ ବିକ୍ରି କରୁଛନ୍ତି । ଫଳରେ ଶୁନସାନ ହୋଇପଡ଼ିଛି ମଣ୍ଡି । ବାହାର ରାଜ୍ୟର ସୂତାକଳ ମାଲିକ ମାନେ ଏହି କପାକୁ କିଣିବା ପାଇଁ ରାୟଗଡ଼ା ମୁହାଁ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚାଷରେ ବ୍ୟବହୃତ ହେଉଥିବା ରାସୟନିକ ସାର, କପା ପାଇଁ କୀଟନାଶକ ଔଷଧର ଅହେତୁକ ଦରବୃଦ୍ଧି ଅନୁସାରେ ସରକାରଙ୍କ ନିର୍ଦ୍ଧାରିତ ଦର ଚାଷୀଙ୍କୁ ସୁହାଉନଥିବା ସେମାନେ ଅଭିଯୋଗ କରିଛନ୍ତି । ଦୂର୍ଗମ ଅଞ୍ଚଳରୁ ମଣ୍ଡିକୁ କପା ଆଣିବା ତଥା କୁଲି ମଜୁରି ବାବଦକୁ ଅଧିକ ଖର୍ଚ୍ଚ ହେଉଥିବାରୁ ମଣ୍ଡି ଅପେକ୍ଷା ବାହାରେ କପାର କୁଇଣ୍ଟାଲ ପିଛା ଦର ଅଧିକ ଥିବାରୁ ଚାଷୀ କପା ମଣ୍ଡିକୁ ନନେଇ ବାହାରେ ବିକ୍ରି କରି ଲାଭବାନ ହେଉଛନ୍ତି । ଜିଲ୍ଲାରେ ମଣ୍ଡିରେ କପାର ସହାୟକ ମୂଲ୍ୟ ୬ ହଜାର ୩୮୦ ଟଙ୍କା ଥିବା ବେଳେ ବାହାରେ ୮ ହଜାରରୁ ୯ ହଜାର ଟଙ୍କା ରହିଛି । ତାମିଲନାଡୁ, ଗୁଜୁରାଟ, ମୁମ୍ବାଇର ସୂତାକଳ ମାଲିକ ମାନେ ସିଧା ରାୟଗଡା କପା ଚାଷୀଙ୍କ ଘର ଆଗରେ ଗାଡି ଲଗାଇ କିଣି ନେଉଛନ୍ତି । ଯାହା ଫଳରେ ରାୟଗଡା ଜିଲ୍ଲାରେ ୪ ହଜାର ୩୨୬ ଜଣ ଚାଷୀ ସରକାରଙ୍କ ପକ୍ଷରୁ କରାଯାଇଥିବା ମଣ୍ଡିରେ ବର୍ତମାନ ପର୍ଯ୍ୟନ୍ତ ପାଦ ପକାଇନାହାନ୍ତି । ଯାହା ବିଡମ୍ବନାର ବିଷୟ ପାଲଟିଛି । ତେଣୁ ସରକାରଙ୍କ ପକ୍ଷରୁ ଚାଷୀଙ୍କ ପାଇଁ ତୁରନ୍ତ କିଛି ବ୍ୟବସ୍ଥା କରିବାକୁ ସାଧାରଣରେ ଦାବି ହୋଇଛି ।