କନକ ବ୍ୟୁରୋ: ପରିବାର ଲୋକ କହିଦେଇଥିଲେ, ବଂଚିବାର ଆଉ ଆଶାନାହିଁ । ହେଲେ ତୋସିଲିଜୁମାବ ଇଂଜେକ୍ସନ ବଂଚାଇଦେଲା ଜୀବନ । ଦୀର୍ଘ ଦେଢମାସକାଳ ଆଇସିୟୁ ଓ ଭେଂଟିଲେଟରରେ କରୋନା ସହ ଲଢେଇ କରିବା ପରେ ନୂଆ ଜୀବନ ପାଇଛନ୍ତି ସୁନ୍ଦରଗଡ ସହରର ଫାଷ୍ଟଫୁଡ ଦୋକାନୀ ସୁଶୀଲ ଘୋଷ । କରୋନାର ଦ୍ୱିତୀୟ ଲହର ସମୟରେ ସୁନ୍ଦରଗଡ କରୋନା ଗ୍ରାଫରେ ଏକ ନମ୍ବରରେ ଥିଲା । ଏହି ସମୟରେ ସେ କରୋନାରେ ଆକ୍ରନ୍ତ ହୋଇଥିଲେ । ଶରୀରର ଅମ୍ଲଜାନ ସ୍ତର କମିଯାଇଥିଲା । ଭେଂଟିଲେଟରରେ ସଂଘର୍ଷ କରୁଥିଲେ ସୁଶୀଲ । କିନ୍ତୁ ଏକ ଇଂଜେକନ୍ସନ ସୁଶୀଲଙ୍କ ଜୀବନକୁ ବଂଚାଇଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରପଡା ଜିଲ୍ଲା ମହାକାଳପଡା ବ୍ଲକ ଖରିନାସୀ ଗାଁ ସୁରେନ୍ଦ୍ର ବେହେରା ମୃତ୍ୟୁକୁ ପାଖରୁ ଦେଖି ପୁଣି ନୂଆ ଜୀବନ ପାଇଛନ୍ତି । କରୋନା ବେଳେ ସେ ଭେଂଟିଲେଟରରେ ରହିଥିଲେ । ଅକ୍ସିଜେନ ସ୍ତର କମିଯିବା ସହ ଫୁସଫୁସ ବି ଆକ୍ରାନ୍ତ ହୋଇଥିଲା । ଧାରକରଜ କରି ୧୩ ଲକ୍ଷ ଟଙ୍କା ଖର୍ଚ୍ଚ କରିଥିଲେ ପରିବାର ଲୋକେ । ଏବେ ବି ସେହି କଥା ମନପଡିଲେ ପରିବାର ଲୋକଙ୍କ ମାଟିତଳୁ ପାଦ ଖସିଯାଏ । ଧାର ଟଙ୍କା କିଭଳି ସୁଝିବେ ଏବେ ସେହି ଚିନ୍ତା ସମସ୍ତଙ୍କୁ ଘାରିଛି ।
କରୋନାର ଦ୍ୱିତୀୟ ଲହରରେ ଅଳ୍ପକେ ମୃତ୍ୟୁ ମୁଖରୁ ବର୍ତ୍ତିଯାଇଛନ୍ତି ମାଆ ଓ ପୁଅ । ଏଭଳି ଏକ ଘଟଣା ଦେଖିବାକୁ ମିଳିଛି କୋରାପୁଟ ଜିଇଡି କଲୋନୀରେ । ଏହି କଲୋନୀର ପ୍ରତିଭା ମିଶ୍ର ଓ ଦୀପକ ମିଶ୍ର କରୋନାରେ ଆକ୍ରାନ୍ତ ହୋଇଥିଲେ । ପରେ ପୁରା ପରିବାରକୁ କରୋନା ଆକ୍ରାନ୍ତ କରିଥିଲା । କରୋନାରେ ପ୍ରତିଭା ମିଶ୍ରଙ୍କ ଭାଇଙ୍କ ମୃତ୍ୟୁ ଘଟିଥିଲା । କିନ୍ତୁ ପ୍ରତିଭା ଓ ଦୀପକ ସୁସ୍ଥ ହୋଇଥିଲେ । ବର୍ତମାନ ପୁଣି କୋଭିଡ ଚିନ୍ତା ଘାରିଥିବାବେଳେ ସମସ୍ତେ ମାସ୍କ ପିନ୍ଧିବା ସହ ନିୟମ ମାନିବାକୁ ନିବେଦନ କରିଛନ୍ତି ମାଆ ଓ ପୁଅ ।
କେବଳେ ଏମାନେ ନୁହନ୍ତି କରୋନାରେ ଏମିତି ଅନେକ ଅଛନ୍ତି ଯେଉଁମାନେ ନିଜ ସଂଘର୍ଷର କାହାଣୀ କହିଛନ୍ତି । କରୋନା ଅନେକ ଲୋକଙ୍କ ଜୀବନକୁ ବଦଳାଇଦେଇଛି । ଯେତେବେଳେ ପୁଣି କରୋନା ଭୟ ବିଶ୍ୱର ଚିନ୍ତା ବଢାଇଛି ସମସ୍ତେ କରୋନା ନିୟମ ମାନିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ ।