ଡେଲଟା ଭୂତାଣୁ ଅପେକ୍ଷା ଅଧିକ ସଂକ୍ରାମକ ଓମିକ୍ରନ୍ । ତିନି ଲେୟାର ମାସ୍କ କିମ୍ବା ଏନ୍-୯୫ ମାସ୍କ ପିନ୍ଧିବାକୁ କହିଲେ ରାଜ୍ୟ ସରକାର
କନକ ବ୍ୟୁରୋ: କରୋନାର ନୂଆ ପ୍ରଜାତି ଓମିକ୍ରନ୍ ଏବେ ଦେଶ ଆଗରେ ନୂଆ ଆହ୍ୱାନ ହୋଇ ଛିଡା ହୋଇଛି । ସାରା ବିଶ୍ୱ କରୋନାର ଚତୁର୍ଥ ଲହରକୁ ସାମ୍ନା କରୁଥିବାରୁ ଅଧିକ ସତର୍କ ହେବା ପାଇଁ ଚେତାଇ ଦେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ସମ୍ଭାବ୍ୟ ତୃତୀୟ ଲହରର ମୁକାବିଲା କରିବାକୁ ଭିଡ ନିୟନ୍ତ୍ରଣ, ଟିକାକରଣ ଓ କୋଭିଡ ନିୟମ ପାଳନ ଉପରେ ଜୋର ଦିଆଯାଉଛି । ତେଣୁ ଆଜି ରାଜ୍ୟ ସରକାର ସ୍ପଷ୍ଟ କରିଛନ୍ତି ଯେ, ଗୋଟିଏ ଲେୟାର ମାସ୍କ ନପିନ୍ଧି ତିନି ଲେୟାର ମାସ୍କ କିମ୍ବା ଏନ-୯୫ ମାସ୍କ ପିନ୍ଧିବା ଜରୁରୀ ।
Kanak News is now on WhatsApp
Join and get latest news updates delivered to you via WhatsApp
ଦେଶରେ କରୋନାର ଦ୍ୱିତୀୟ ଲହର ଆଣିଥିବା ଡେଲ୍ଟା ଭୂତାଣୁ ଅପେକ୍ଷା ଓମିକ୍ରନ୍ ଭୂତାଣୁ ଅଧିକ ସଂକ୍ରାମକ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ପୂର୍ବରୁ ଚେତାଇ ଦେଇଥିଲା । ଦେଢରୁ ୩ ଦିନ ଭିତରେ ଓମିକ୍ରନ୍ ସଂକ୍ରମଣ ଦୁଇଗୁଣା ହୋଇଯିବାର ଆଶଙ୍କା ରହିଛି । ତଥାପି ବର୍ତମାନ କ୍ଲଷ୍ଟର ଗୁଡିକରେ ଡେଲ୍ଟା ଭୂଚାଣୁ ଅଧିକ ଚିହ୍ନଟ ହେଉଛି । ତେଣୁ ଡେଲ୍ଟାର ମୁକାବିଲା ପାଇଁ ଯେଉଁ ଚିକିତ୍ସା ପଦ୍ଧତି ଆପଣା ଯାଉଥିଲା ତାହା ଅବ୍ୟାହତ ରହିବ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ କହିଛି । କିନ୍ତୁ ଡେଲ୍ଟା ଅପେକ୍ଷା ଓମିକ୍ରନ ଭୂତାଣୁ ରୋଗ ପ୍ରତିରୋଧ ଶକ୍ତିର ସୁରକ୍ଷା ବଳୟକୁ ଭେଦ କରିବାକୁ ଅଧିକ ସକ୍ଷମ ।
‘ଓମିକ୍ରନ୍’କୁ ନେଇ ନୂଆ ତଥ୍ୟ
- ୧୮୩ଟି ଓମିକ୍ରନ୍ ମାମଲାର ବିଶ୍ଳେଷଣ କରାଯାଇଛି
- ଏମାନଙ୍କ ଭିତରୁ ୯୧% ଦୁଇଟି ଡୋଜ୍ ଟିକା ନେଇଛନ୍ତି
- ୩ ଜଣ ବୁଷ୍ଟର ଡୋଜ୍ ନେବାପରେ ଆକ୍ରାନ୍ତ ହୋଇଛନ୍ତି
- ୭୦%ଙ୍କ ଠାରେ କୌଣସି ଲକ୍ଷଣ ମଧ୍ୟ ଦେଖାଯାଉ ନାହିଁ
ଓମିକ୍ରନ ବିରୋଧରେ କରୋନା ଟିକାର କଣ ପ୍ରଭାବ ରହିବ ତାକୁ ନେଇ ଅଧିକ ଅନୁଶୀଳନ ଚାଲିଛି । ତଥାପି ଟିକାକରଣକୁ ବ୍ୟାପକ କରିବା ପାଇଁ ଯୁକ୍ତି ବାଢିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ତେବେ ୧୧ଟି ରାଜ୍ୟରେ ଟିକାକରଣ ଜାତୀୟ ହାରଠାରୁ କମ୍ ରହିଛି । ଓଡିଶାରେ ୩୭ ଲକ୍ଷ ଲୋକ ଟିକାର ପ୍ରଥମ ଡୋଜ୍ ନେଇନଥିବାବେଳେ ୩୧ ଲକ୍ଷ ଲୋକଙ୍କ ଦ୍ୱିତୀୟ ଡୋଜ୍ ବାକି ଥିବା ଜଣାପଡିଛି ।