ଟଙ୍କିକିଆ ଚାଉଳରେ ଲାଗିଲା ରାଜନୀତିର ନୂଆ ରଙ୍ଗ। କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଲେ, ମାଗଣା ଚାଉଳ ଦେଉଛନ୍ତି ମୋଦୀ।
କନକ ବ୍ୟୁରୋ: ଟଙ୍କିକିଆ ଚାଉଳ ମାଗଣା ହେବା ପରେ, ଆଉ ମାଗଣା ଚାଉଳ ସମ୍ପୂର୍ଣ୍ଣ କେନ୍ଦ୍ର ସରକାର ଦେବେ ବୋଲି ଘୋଷଣା କରିବା ପରେ, ବଦଳି ଯାଇଛି ଚାଉଳ ରାଜନୀତି । ବର୍ଷ ବର୍ଷ ଧରି ରାଜ୍ୟ ସରକାର ଚାଉଳ ଦେଉଥିବା ନେଇ ଲୋକଙ୍କ ଭିତରେ ଥିବା ଧାରଣା ବଦଳାଇବାକୁ ଉଦ୍ୟମ ଆରମ୍ଭ କରିଛି ବିଜେପି । ଏକାଥରକେ ଦୁଇ କେନ୍ଦ୍ରମନ୍ତ୍ରୀ ମାଗଣା ଚାଉଳ ମୋଦୀଙ୍କର ବୋଲି ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମାଗଣା ଚାଉଳ ବଣ୍ଟା ଘୋଷଣା ପରେ, ରାଜନୀତି କୁଆଡେ ଯିବ ଚର୍ଚ୍ଚା ଭିତରେ, କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଏଣିକି ଆଉ ଚାଉଳକୁ ନେଇ ଶ୍ରେୟ ନେଇପାରିବେନି ରାଜ୍ୟ । ମୋଦୀ ସରକାର ଦେଶରେ ୮୧କୋଟି ୩୫ ଲକ୍ଷ ଲୋକଙ୍କୁ ମାଗଣାରେ ମାସକୁ ୫କେଜି ଚାଉଳ ଦେବା ପାଇଁ ନିଷ୍ପତି ନେଇଛି । ଏଥିରେ ଓଡ଼ିଶାର ୩କୋଟି ୨୬ ଲକ୍ଷ ଲୋକ ଉପକୃତ ହେବେ । ପୂର୍ବରୁ ଏହି ହିତାଧିକାରୀ କିଲୋ ପିଛା ୧ଟଙ୍କାରେ ଚାଉଳ କିଣୁଥିଲେ । କିଲେ ଚାଉଳରେ ଦୁଇ ଟଙ୍କା ଦେଉଥିଲେ ରାଜ୍ୟ ସରକାର । ହେଲେ, ରାଜ୍ୟ ସରକାରଙ୍କ ୨ଟଙ୍କାର ଯୋଗଦାନକୁ ମୋଦୀ ଶେଷ କରିଦେଇଥିବାରୁ, ଏଣିକି ଆଉ ଶ୍ରେୟ ନେଇପାରିବନି ।
ମୋଦୀ ସରକାର କେମିତି ଲୋକଙ୍କୁ ସମ୍ପୂର୍ଣ୍ଣ ମାଗଣାରେ ଚାଉଳ ଯୋଗାଇ ଦେବାକୁ ନିଷ୍ପତି ନେଇଛନ୍ତି, ତାର ହିସାବ ଦେଇଛନ୍ତିି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କହିଛନ୍ତି, ଓଡ଼ିଶାରେ ୩କୋଟି ୨୫ ଲକ୍ଷ ଲୋକଙ୍କୁ ମୋଦୀ ଦେବେ ମାଗଣା ଚାଉଳ । ଏଥିପାଇଁ କେନ୍ଦ୍ର ଦେଉଛି ୧ ଲକ୍ଷ ୮୭ ହଜାର ମେଟ୍ରିକ ଟନ ଚାଉଳ । ବର୍ତମାନ କେଜି ପିଛା ୩୭ ଟଙ୍କା ୮୮ ପଇସା ଖର୍ଚ୍ଚ ହେଉଛି । ଏଥିପାଇଁ ମାସିକ ୭ଶହ କୋଟି ଟଙ୍କା ଖର୍ଚ୍ଚ ହେଉଥିବା ବେଳେ ବର୍ଷକୁ ୮ହଜାର ୪ଶହ କୋଟି ଟଙ୍କା ଖର୍ଚ୍ଚ କରୁଛନ୍ତି କେନ୍ଦ୍ର ସରକାର । ତେଣୁ ମୋଦୀ ଦେଉଥିବା ଚାଉଳକୁ ଗଡ଼ବଡ଼ ନକରି ସଠିକ୍ ହିତାଧିକାରୀଙ୍କ ପାଖରେ ପହଞ୍ଚାଇବାକୁ ଆହ୍ୱାନ ଦେଇଛନ୍ତି ଧର୍ମେନ୍ଦ୍ର ।
୨୦୦୮ରୁ ୨ଟଙ୍କିଆ ଓ ୨୦୧୩ରୁ ଟଙ୍କାଙ୍କିଆ ଚାଉଳ ବାଣ୍ଟି ଏକ ବଡ ଭୋଟ ବ୍ୟାଙ୍କ ସୃଷ୍ଟି କରିବାରେ ସକ୍ଷମ ହୋଇଥିଲେ ନବୀନ ପଟ୍ଟନାୟକ । ଟଙ୍କିକିଆ ଚାଉଳରେ କେନ୍ଦ୍ରର ଭାଗ ଅଧିକ ଥିଲେ ବି ମାତ୍ର ୨ଟଙ୍କା ଦେଇ ସବୁ ଶ୍ରେୟ ନେଉଥିଲେ । କେନ୍ଦ୍ର ସରକାର ଏନେଇ ବାରମ୍ବାର ଲୋକଙ୍କୁ ବୁଝାଇବାକୁ ଉଦ୍ୟମ କରିଥିଲେ ବି ସଫଳ ହୋଇପାରିନଥିଲେ । ଲୋକେ ଧରି ନେଇଥିଲେ ଟଙ୍କିକିଆ ଚାଉଳ ଦେଉଛନ୍ତି ନବୀନ । କିନ୍ତୁ ମାଗଣାରେ ଚାଉଳ ଦେବାକୁ ଘୋଷଣା କରି ମାଷ୍ଟରଷ୍ଟ୍ରୋକ ଖେଳିଛନ୍ତି ନରେନ୍ଦ୍ର ମୋଦୀ । ହେଲେ, ମୋଦୀଙ୍କ ମାଷ୍ଟରଷ୍ଟ୍ରୋକ ଓ ବିଜେପି ନେତାଙ୍କ ଦାବିକୁ ଲୋକେ କେତେ ବୁଝି ପାରୁଛନ୍ତି ତାହା ବିରାଟ ପ୍ରଶ୍ନବାଚୀ । କାରଣ ମୋଦୀଙ୍କ ଚାଉଳ ହେଲେ ବି ବଣ୍ଟନ ଦାୟିତ୍ୱରେ ରହିବ ବିଜେଡି । ତେଣୁ ପ୍ରଶ୍ନ ଉଠୁଛି, ମୋଦୀ ସରକାରଙ୍କ ଗୋଟି ଚାଳନାର ପ୍ରଭାବ ଓଡିଶା ଭୋଟରଙ୍କୁ ପ୍ରଭାବିତ କରିବ କି? ୨୦୨୪ରେ ଏହାର ରାଜନୈତିକ ପ୍ରଭାବ ରହିବ କି?