ରଦ୍ଦ ହେଲା ବାଚସ୍ପତି ବିକ୍ରମ କେଶରୀ ଆରୁଖଙ୍କ ଭାଇ ବିରେନ୍ଦ୍ର ଆରୁଖଙ୍କ ପ୍ରାର୍ଥୀପତ୍ର। ଲକ୍ଷ ଟଙ୍କାର ଋଣ ବକେୟା ଥିବାରୁ ନାମାଙ୍କନ ବାତିଲ।
କନକ ବ୍ୟୁରୋ: ବାଚସ୍ପତି ବିକ୍ରମ କେଶରୀ ଆରୁଖଙ୍କ ଭାଇ ବିରେନ୍ଦ୍ର ଆରୁଖଙ୍କ ଦାଦାଗିରି ପରେ ତାଙ୍କ ପ୍ରାର୍ଥପତ୍ର ରଦ୍ଦ ହୋଇଯାଇଛି । ଆସିକା କେନ୍ଦ୍ରୀୟ ସମବାୟ ବ୍ୟାଙ୍କ ନିର୍ବାଚନ ପାଇଁ ବିରେନ୍ଦ୍ର ୧୧ ନମ୍ବର ଜୋନରୁ ଏକମାତ୍ର ପ୍ରାର୍ଥୀ ଭାବେ ନିର୍ଦ୍ଦେଶକ ପଦବୀ ପାଇଁ ନାମାଙ୍କନ ଦାଖଲ କରିଥିଲେ । କିନ୍ତୁ ଋଣ ଟଙ୍କା ପରିଶୋଧ କରିନଥିବାରୁ ବ୍ୟାଙ୍କ ବିରେନ୍ଦ୍ର ଆରୁଖଙ୍କୁ କ୍ଲିୟରାନ୍ସ ଦେଇନଥିଲା । ଫଳରେ ତାଙ୍କ ପ୍ରାର୍ଥୀପତ୍ର ରଦ୍ଦ କରିଦେଇଥିଲେ ତହସିଲଦାର । ଯାହାକୁ ନେଇ ବିରେନ୍ଦ୍ର ଆରୁଖ ଏବଂ ତାଙ୍କ ସମର୍ଥକମାନେ ବ୍ୟାଙ୍କରେ ପଶି ଗଣ୍ଡଗୋଳ କରିଥିବା ଅଭିଯୋଗ ହୋଇଛି । ଏପରିକି ବ୍ୟାଙ୍କ ଜଣେ ଅଫିସରଙ୍କ ଚ୍ୟାମ୍ବରରେ ପଶି ଭିତରୁ କବାଟ ବନ୍ଦ କରି ତାଙ୍କ ମାଡ ମାରିଥିବା ଅଭିଯୋଗ କରିଛନ୍ତି ବ୍ୟାଙ୍କ ଶାଖା ପରିଚାଳକ ଗୀତାଞ୍ଜଳୀ ବେହେରା ।
Kanak News is now on WhatsApp
Join and get latest news updates delivered to you via WhatsApp
ବ୍ୟାଙ୍କର ଅନ୍ୟ କିଛି କର୍ମଚାରୀଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ ମାରିଥିବା ମଧ୍ୟ ଅଭିଯୋଗ କରାଯାଇଛି । ଏପଟେ ତାଙ୍କ ବ୍ୟାଙ୍କ କର୍ମଚାରୀମାନେ ମାଡମାରିଥିବା ନେଇ ଅଭିଯୋଗ କରିଛନ୍ତି ବିରେନ୍ଦ୍ର । ଅଭିଯୋଗକୁ ଆଧାର କରି ଆସିକା ଥାନା ପୁଲିସ ଦୁଇଟି ମାମଲା ରୁଜୁ କରିଛି । ବ୍ୟାଙ୍କ ପକ୍ଷରୁ ମିଳିଥିବା ସୂଚନା ମୁତାବକ, ବିରେନ୍ଦ୍ର ୨୦୦୧ ମସିହାରେ ୨ ଲକ୍ଷରୁ ଅଧିକ ଟଙ୍କାର ଋଣ ନେଇଥିଲେ । ସେଥିରୁ କିଛି ଟଙ୍କାର ଋଣ ଛାଡ ହୋଇଥିଲା । କିନ୍ତୁ ଆହୁରି ୧ ଲକ୍ଷ ୯୧ ହଜାର ଟଙ୍କାର ଋଣ ବାକିଥିବା ବେଳେ ସମୁଳସୁଧକୁ ମିଶାଇ ମୋଟ ୩୫ ଲକ୍ଷ ଟଙ୍କା ବାକି ରହିଛି । ଯେଉଁଥିପାଇଁ ବ୍ୟାଙ୍କ୍ କ୍ଲିୟରାନ୍ସ ଦେଇନଥିଲା ।