ଲାଞ୍ଚ ନେଉଥିଲେ ପୋଲିସ ବାବୁ, ଭିଜିଲାନ୍ସ ଟିମକୁ ଦେଖି ଗିଳିଦେଲେ ୪୦୦୦ ଟଙ୍କା
କନକ ବ୍ୟୁରୋ: ଲାଞ୍ଚ ନେଉଥିଲେ ସବଇନ୍ସପେକ୍ଟର । ମାଡି ମସିଲା ଭିଜିଲାନ୍ସ ଟିମ୍ । ବିକଳରେ ୪୦୦୦ ଟଙ୍କା ଗିଳିଦେଲେ ପୋଲିସ ବାବୁ । ହେଲେ ଛାଡିଲେନି ଭିଜିଲାନ୍ସ ଅଧିକାରୀ । ପୋଲିସ ବାବୁଙ୍କ ପାଟିରେ ହାତ ପୁରାଇ ଟଙ୍କା କାଢିବାକୁ ଚେଷ୍ଟା କଲାବେଳେ ଉଭୟ ଧରାପରା ହେଲେ । ଏଭଳି ଏକ ଦୃଶ୍ୟ ଏବେ ଭାଇରାଲ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଲାଞ୍ଚ ନେଇ ଧରା ପଡିବାର ଏଭଳି ମଜାଦାର ଘଟଣା ଘଟିଛି ହରିୟାଣା ଫରିଦାବାଦର ସେକ୍ଟର ୩ ଅଞ୍ଚଳରେ । ସୂଚନା ମୁତାବକ, ଶମ୍ଭୁ ନାଥ ନାମକ ଜଣେ ବ୍ୟକ୍ତିଙ୍କର ମଇଁଷି ଚୋରୀ ହୋଇଯାଇଥିଲା । ସେ ଏଫଆଇଆର ଦେବାକୁ ପୋଲିସର ଦ୍ୱାରସ୍ଥ ହୋଇଥିଲେ । ହେଲେ ମାମଲା ଦାଏର କରାଇବାକୁ ଦାୟିତ୍ୱରେ ଥିବା ସବଇନ୍ସପେକ୍ଟର ୧୫ ହଜାର ଟଙ୍କା ଲାଞ୍ଚ ମାଗିଥିଲେ । ପ୍ରଥମେ ଶମ୍ଭୁନାଥ ପୋଲିସ ବାବୁଙ୍କୁ ୪ ହଜାର ଓ ପରେ ୨ ହଜାର ଟଙ୍କା ଦେବା ପରେ ବି ଶାନ୍ତି ହୋଇନଥିଲେ ପୋଲିସ ବାବୁ । ଏଥିରେ ଅସନ୍ତୁଷ୍ଟ ହୋଇ ଶମ୍ଭୁନାଥ ଭିଜିଲାନ୍ସକୁ ଜଣାଇଦେଇଥିଲେ ।
ଯେଉଁଦିନ ବାକି ୪୦୦୦ ଟଙ୍କା ଦେବା କଥା ସେଦିନ ଠିକଣା ଜାଗାରେ ଜଗିରହିଥିଲା ଭିଜିଲାନ୍ସ ଟିମ୍ । ଆଉ ପୋଲିସ ଅଧିକାରୀ ଟଙ୍କା ଧରିବା କ୍ଷଣି ମାଡିବସିଥିଲେ ଭିଜିଲାନ୍ସ ଅଧିକାରୀ । ଆଉ ବିକଳରେ ସବୁତକ ଟଙ୍କା ଗିଳିଦେଇଥିଲେ ପୋଲିସ ବାବୁ । କିନ୍ତୁ ଛାଡିନଥିଲେ ଭିଜିଲାନ୍ସ ଅଧିକାରୀ । ତାଙ୍କୁ ତଳେ ପକାଇ ତାଙ୍କ ପାଟିରୁ ଟଙ୍କା କାଢିବାକୁ ଚେଷ୍ଟା କରିଥିଲେ । ଘଟଣାସ୍ଥଳରେ ଉପସ୍ଥିତ କେହି ଜଣେ ବ୍ୟକ୍ତି ଏହି ଦୃଶ୍ୟକୁ ସୁଟିଙ୍ଗ କରି ସୋସିଆଲ ମିଡିଆରେ ଅପଲୋଡ କରିବା ପରେ ଏବେ ଏହା ଭାଇରାଲ ହେବାରେ ଲାଗିଛି ।