କନକ ବ୍ୟୁରୋ : ଭାରତୀୟ ଏୟାରଲାଇନ୍ସ ସେକ୍ଟରେ ପୁଣି ଏକ ବଡ ଘଟଣାକ୍ରମ ଦେଖିବାକୁ ମିଳିଛି । ଦେଶର ତୃତୀୟ ଏୟାରଲାଇନ କମ୍ପାନୀ ଏବେ ଦେବାଳିଆ ସ୍ଥିତିକୁ ଆସିଯାଇଛି । ବଜେଟ ଏୟାରଲାଇନ୍ସ ‘ଗୋ ଫାଷ୍ଟ’ ତରଫରୁ ଭଲିଣ୍ଟାରୀ ଇନସଲଭେନ୍ସି ପ୍ରୋସିଡିଙ୍ଗ୍ ପାଇଁ ଆବେଦନ କରାଯାଇଛି । ଏହା ପୂର୍ବରୁ ଜେଟ୍ ଏୟାରୱେଜ ୨୦୧୯ ମସିହାରେ ଦେବାଳିଆ ହୋଇଯାଇଥିଲା । ତା ପୂର୍ବରୁ ପଳାତକ ବିଜୟ ମାଲ୍ୟାଙ୍କ ମାଲିକାନାରେ ଥିବା କିଙ୍ଗଫିସର ଏୟାର ଲାଇନ୍ସ ମଧ୍ୟ ଦେବାଳିଆ ହୋଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ଗୋଟିଏ ପଟେ ଏହି ୩ଟି ଭାରତୀୟ ଏୟାରଲାଇନ୍ସ ବର୍ବାଦ ହୋଇଗଲା, ଠିକ୍ ସେତେବେଳେ ଆଭିଏସନ୍ ସେକ୍ଟରେ ଇଣ୍ଡିଗୋ ଲଗାତର ଭାବେ ନିଜର ପରିସର ବୃଦ୍ଧି କରିବାରେ ଲାଗିଛି । ଏହାସହ ୬୯ ବର୍ଷ ପରେ ପୁଣି ଟାଟା ଗ୍ରୁପ ନିକଟକୁ ଫେରିଥିବା ଏୟାର ଇଣ୍ଡିଆ ବି ଆଗକୁ ବଢିବାରେ ଲାଗିଛି ।
ଏବେ ଆସନ୍ତୁ ଜାଣିବା କୌଣସି ଏୟାର ଲାଇନ୍ସ ଦେବାଳିଆ ହେବା ପଛରେ କଣ ରହିଛି ପ୍ରମୁଖ କାରଣ । ଦେବାଳିଆପଣ ଏକ ଆର୍ଥିକ ସ୍ଥିତି ଅଟେ । ଯେତେବେଳେ କୌଣସି କମ୍ପାନୀ ବା ବ୍ୟକ୍ତି କରିଥିବା ଋଣ ସୁଝିବାରେ ସମର୍ଥ ହୋଇ ନଥାଏ ସେତେବେଳେ ସେ ନିଜକୁ ଦେବାଳିଆ ବୋଲି ଘୋଷିତ କରିଥାଏ । ଏହାପରେ ଦେବାଳିଆ ସମ୍ପତ୍ତି ବା କମ୍ପାନୀକୁ ଅଦାଲତ ତରଫରୁ ନିଯୁକ୍ତି ଅଧିକାରୀ ନିଲାମ କରିଦେଇଥାନ୍ତି । ଏହି ନିଲାମରୁ ମିଳିଥିବା ଟଙ୍କାକୁ ଋଣଦାତାଙ୍କ ମଧ୍ୟରେ ବଣ୍ଟନ କରାଯାଇଥାଏ । ସବୁଠାରୁ ବଡକଥା ଯେତେବେଳେ କୌଣସି କମ୍ପାନୀ ବା ବ୍ୟକ୍ତି ନିଜକୁ ଋଣ ସୁଝିବାକୁ ଅକ୍ଷମ ଦର୍ଶାଇ ଦେବାଳିଆ ଘୋଷିତ କରିଥାଏ ସେତେବେଳେ ତାଙ୍କୁ ଋଣ ପ୍ରଦାନ କରିଥିବା ବ୍ୟକ୍ତି ଋଣ ସୁଝିବାକୁ ବାଧ୍ୟ କରିପାରିବ ନାହିଁ ।
କିଙ୍ଗଫିସର ଏୟାରଲାଇନ୍ସ : ବିଜୟ ମାଲ୍ୟାଙ୍କ ଦ୍ୱାରା ସ୍ଥାପିତ ଏୟାର ଲାଇନ୍ସ ‘କିଙ୍ଗ ଫିସର’ ଦେବାଳିଆ ହୋଇଥିବା ଏୟାରଲାଇନ୍ସ ତାଲିକାର ପ୍ରଥମ ସ୍ଥାନରେ ରହିଛି । ଏହାକୁ ୨୦୦୩ ମସିହାରେ ଲଂଚ କରାଯାଇଥିଲା । ୨୦୦୫ ମସିହାରେ ଏହି ଏୟାରଲାଇନ୍ସ ସିଙ୍ଗଲ କ୍ଲାସ ଇକୋନମୀ ରୂପରେ ପରିଚାଳିତ ହୋଇଥିଲା । ଏହି ଏୟାର ଲାଇନ୍ସ ଆରମ୍ଭ ହେବାର କିଛି ଦିନ ମଧ୍ୟରେ ଦମଦାର ଲାଭ କରିଥିଲା । ଏହାପରେ ୨୦୦୭ ମସିହାରେ ଋଣରେ ବୁଡିଥିବା ଏୟାର ଡେକ୍କନକୁ କିଣିବାକୁ କିଙ୍ଗଫିସର କମ୍ପାନୀ ନିଷ୍ପତ୍ତି ନେଇଥିଲା । ଏହାସହ ୨୦୦୮ ମସିହାରେ ଚୁକ୍ତି ପୁରଣ କରି କିଙ୍ଗଫିସର ଏୟାର ଲାଇନ୍ସ ଏୟାର ଡେକାନକୁ କିଣି ନେଇଥିଲା । ଏହାପରେ କମ୍ପାନୀର କ୍ଷତି ଆରମ୍ଭ ହୋଇଯାଇଥିଲା । ଏହା ପଛରେ ବଡ କାରଣ ଥିଲା ବିମାନରେ ବ୍ୟବହୃତ ହେଉଥିବା ଇନ୍ଧନର ଦର ବୃଦ୍ଧି । ମାତ୍ରାଧିକ ଋଣ ଓ ପରିଚାଳନା ଖର୍ଚ୍ଚ ନଦେଇ ପାରିବାରୁ ୨୦୧୨ ମସିହାରେ ଏହି ଏୟାର ଲାଇନ୍ସ କମ୍ପାନୀର ପଞ୍ଜିକରଣ ରଦ୍ଦ କରାଯାଇଥିଲା ।
ଜେଟ୍ ଏୟାରୱେଜ୍: ନରେଶ ଗୋଏଲ ୧୯୯୨ ମସିହାରେ ଏୟାର ଟ୍ୟାକ୍ସି ଭାବେ ଜେଟ୍ ଏୟାରୱେଜର ଆରମ୍ଭ କରିଥିଲେ । ୧୯୯୩ ମସିହାରେ କମ୍ପାନୀର ଦୁଇଟି ବିମାନ ଉଡିବା ଆରମ୍ଭ କରିଥିଲା । ୨୦୦୨ ମସିହାରେ ଏହି ଏୟାର ଲାଇନ୍ସ ଘରୋଇ ଏୟାରଲାଇନ୍ସ ମାର୍କେଟରେ ଇଣ୍ଡିଆନ ଏୟାରଲାଇନ୍ସକୁ ବି ପଛରେ ପକାଇ ଦେଇଥିଲା । ୨୦୦୬ ମସିହା ବେଳେକୁ ଏହି ଏୟାରଲାଇନ୍ସ ସହ ୨୭ଟି ନୂଆ ବିମାନ ଯୋଡି ହୋଇଥିଲା । କମ୍ପାନୀ ଏବେ ଅନ୍ତର୍ଜାତୀୟ ବିମାନ ସେବା ଆରମ୍ଭ କରିଦେଇଥିଲା । ଏହା କମ୍ପାନୀ ପାଇଁ ସବୁଠାରୁ ବଡ ଭୁଲ ଥିଲା । ଏହାସହ ଆଭିଏସନ ମାର୍କେଟରେ ଇଣ୍ଡିଗୋର ପ୍ରବେଶ ମଧ୍ୟ ଜେଟ ଏୟାରୱେଜ୍ ପାଇଁ କାଳ ସାଜିଥିଲା । ଏଭଳି ଅବସ୍ଥା ଭିତରେ କମ୍ପାନୀ ଗତି କରୁଥିବା ବେଳେ ୨୦୧୯ ବେଳକୁ ବ୍ୟାଙ୍କ ଲୋନ ସୁଝିବାରେ ବିଫଳ ହୋଇଥିଲା କମ୍ପାନୀ । ଏହାସହ କମ୍ପାନୀର ମାଲିକ ନରେଶ ଗୋଏଲ ମଧ୍ୟ ଋଣ ସୁଝିବା ସହ କମ୍ପାନୀ କର୍ମଚାରୀଙ୍କୁ ଦରମା ଦେବାରେ ବିଫଳ ହୋଇଥିଲେ । ଫଳରେ ସେହି ୨୦୧୯ ମସିହାରେ ଏହି କମ୍ପାନୀ ନିଜକୁ ଦେବାଳିଆ ଘୋଷଣା କରିଥିଲା ।
ଗୋ ଫାଷ୍ଟ : ଜେଟ୍ ଏୟାରୱେଜର ବିଫଳତା ପରେ ଏବେ ବଜେଟ ଏୟାରଲାଇନ୍ସ ଗୋ-ଫାଷ୍ଟ ନଗଦ ଅଭାବ କାରଣରୁ ବନ୍ଦ ହେବାକୁ ବସିଛି । କମ୍ପାନୀ ଏବେ ନିଜକୁ ଦେବାଳିଆ ଘୋଷଣା କରିବା ପରେ ଏନସିଏଲଟି ଆବେଦନ କରିଛି । ବାଡିୟା ଗ୍ରୁପର ଏୟାରଲାଇନ୍ସ କମ୍ପାନୀ ଗୋ-ଫାଷ୍ଟ ୨୦୦୫ ମସିହାରେ ଆଭିଏସନ ସେକ୍ଟରେ ଯୋଡି ହୋଇଥିଲା । ପ୍ରାଥମିକ ପର୍ଯ୍ୟାୟରେ ଦୁଇଟି ବିମାନ ଲିଜ ସୂତ୍ରରେ ନେଇଥିବା ବେଳେ ଏବେ କମ୍ପାନୀ ପାଖରେ ୬୧ଟି ବିମାନ ରହିଛି । ଗତ ୩ବର୍ଷ ମଧ୍ୟରେ ବାଡିୟା ଗ୍ରୁପ ଗୋ-ଫାଷ୍ଟ ଏୟାରଲାଇନ୍ସରେ ୩,୨୦୦ କୋଟି ଟଙ୍କା ନିବେଶ କରିଛି । ହେଲେ ଏବେ କମ୍ପାନୀ ଏଭଳି ସ୍ଥିତିରେ ପହଂଚିଛି କି କମ୍ପାନୀ କ୍ୟାସ ଆଣ୍ଡ କ୍ୟାରୀ ମୋଡରେ ଚାଲିଛି । ଅର୍ଥାତ କମ୍ପାନୀକୁ ଯେତୋଟି ବିମାନ ସଂଚାଳିତ କରିବାର ଅଛି ତା ପାଇଁ କମ୍ପାନୀକୁ ଦୈନିକ ପେମେଣ୍ଟ କରିବାକୁ ପଡୁଛି । ଏବେ କମ୍ପାନୀ ଉପରେ ୬,୫୨୭ କୋଟି ଟଙ୍କା ଋଣ ରହିଛି ।