କନକ ବ୍ୟୁରୋ: ଭାରତୀୟ ପାଣିପାଗ ବିଭାଗ ଜାରି କରିଥିବା ବାତ୍ୟାର ଗତିପଥ । ଧୀରେ ଧୀରେ ସ୍ପଷ୍ଟ ହେବାରେ ଲାଗିଛି ବାତ୍ୟା କେଉଁ ପଟେ ଯିବ, କେଉଁଠି ସ୍ଥଳଭାଗ ଛୁଇଁବ, ଏହାର ବେଗ କେତେ ରହିବ । ବାଂଲାଦେଶର ତିନ କୋଣା ଓ ସନ୍ଦୀପ ଦ୍ୱୀପ ମଝି ଅଂଚଳରେ ସ୍ଥଳଭାଗ ଅତିକ୍ରମ କରିବ ବୋଲି ପୂର୍ବାନୁମାନ କରିଛି ଆଇଏମଡି ।
Kanak News is now on WhatsApp
Join and get latest news updates delivered to you via WhatsApp
ଆଇଏମଡିର ପୂର୍ବାନୁମାନ ଅନୁସାରେ ଓଡ଼ିଶା ଉପକୂଳ ଠାରୁ ୨୦୦ କିଲୋମିଟର ଦୂରରେ ବାତ୍ୟାର ଗତିପଥ ରହିବ ଏବଂ ବହୁଦୂରରେ ସ୍ଥଳଭାଗ ଛୁଇଁବ । ତେଣୁ ଓଡ଼ିଶା ଉପରେ ଏହାର ବଡ଼ ପ୍ରଭାବ ରହିବନାହିଁ ବୋଲି ଆକଳନ କରାଯାଉଛି । ଉଭୟ ପବନ ଓ ବର୍ଷା ପରିମାଣ କମ ରହିବ । ଗୋଟିଏ କଥା କୁହାଯାଇପାରେ ବାତ୍ୟା ନେଇ ଯେଉଁ ଭୟ ସୃଷ୍ଟି ହେଇଥିଲା, ଏବେ ଏଥିରୁ ଓଡ଼ିଶାବାସୀଙ୍କୁ ଆଶ୍ୱସ୍ତି ମିଳିଛି ।
ଏହାରି ଭିତରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ଅବପାତର ରୂପ ନେଇଛି ସୁଦୃଶ୍ୟ ଲଘୁଚାପ ।୨୩ ତାରିଖରେ ତୀବ୍ର ଅବପାତର ରୂପ ନେଇ ରି-କର୍ଭ କରିବା ସମ୍ଭାବନା ରହିଛି । ଧୀରେ ଧୀରେ ଏହାର ଦିଗ ବଦଳିବା ସହ ଉତ୍ତର-ଉତ୍ତରପୂର୍ବ ଦିଗରେ ଗତି କରି ଅଧିକ ଘନୀଭୂତ ହେବ ।୨୩ ତାରିଖ ସନ୍ଧ୍ୟାରେ ଏହା ବାତ୍ୟା ବା ସାମୁଦ୍ରିକ ଝଡ଼ରେ ପରିଣତ ହୋଇପାରେ । ୨୪ ତାରିଖ ସନ୍ଧ୍ୟାରେ ଭୀଷଣ ସାମୁଦ୍ରିକ ଝଡ଼ ରେ ପରିଣତ ହେବା ଆଶଙ୍କା ରହିଛି । ଏହି ସମୟରେ ସବୁଠୁ ଶକ୍ତିଶାଳୀ ରୂପ ନେଇ ଗତି କରିବ ବାତ୍ୟା । ଘଣ୍ଟା ପ୍ରତି ୯୦ରୁ ୧୦୦ କିଲୋମିଟର ବେଗରେ ପବନ ବହିପାରେ । ଯାହାର ଝଟକା ୧୧୦ କିଲୋମିଟର ପର୍ଯ୍ୟନ୍ତ ଅନୁଭୂତ ହେବ । ତେବେ ଏହାର ବିଶେଷ ପ୍ରଭାବ ଓଡ଼ିଶା ଉପକୂଳରେ ପଡ଼ିବା ସମ୍ଭାବନା କମ୍ । ୨୫ ତାରିଖ ସକାଳେ ବାଂଲାଦେଶ ଉପକୂଳରେ ଅତିକ୍ରମ କରିବ ସ୍ଥଳଭାଗ
ଓଡ଼ିଶା ଉପକୂଳ ଜିଲ୍ଲାଗୁଡିକରେ ବର୍ଷା ନେଇ ଯେଉଁ ଆକଳନ କରାଯାଉଥିଲା, ସେଥିରେ ମଧ୍ୟ ପରିବର୍ତ୍ତନ କରିଛି ଭାରତୀୟ ପାଣିପାଗ ବିଭାଗ । ତେବେ ୨୩ ତାରିଖ ରେ କେନ୍ଦ୍ରାପଡ଼ା, ଜଗତସିଂହପୁର, ପୁରୀ । ୨୪ ତାରିଖରେ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, କଟକ, ଯାଜପୁରଜିଲ୍ଲାର କିଛି ସ୍ଥାନରେ ବର୍ଷା ହେବା ଆଶଙ୍କା ରହିଛି ।
ଫୁଜିୱାରା ଇଫେକ୍ଟ ଥିଲେ ବି ଓଡ଼ିଶା ଉପକୂଳ ଠାରୁ ବାତ୍ୟା ଅଧିକ ଦୂରତାରେ ଥିବାରୁ ଏହାର ପ୍ରଭାବ କମ୍ ଅନୁଭୂତ ହେବ । ଫୁଜିୱାରା ଇଫେକ୍ଟ ହେଉଛି, ଯଦି ଦୁଇଟି ଘୂର୍ଣ୍ଣବଳୟ କ୍ଷେତ୍ର ସକ୍ରିୟ ରୁହନ୍ତି ଏବଂ ପାଖାପାଖି ଥାଆନ୍ତି, ତେବେ ସବଳ କ୍ଷେତ୍ର ଦୁର୍ବଳ କ୍ଷେତ୍ରକୁ ଆକର୍ଷିତ କରିଥାଏ । ଫଳରେ ଦୁଇଟି କ୍ଷେତ୍ର ଏକତ୍ର ମିଶି ଯିବାରୁ ଏହା ଶକ୍ତିଶାଳୀ ହୋଇ ଘନିଭୂତ ହୋଇଥାଏ । ଅନେକ ସମୟରେ ଏହା ହିଁ ବାତ୍ୟାକୁ ଶକ୍ତିଶାଳୀ କରିଥାଏ । ବାତ୍ୟା ବାଂଲାଦେଶ ଉପକୂଳରେ ସ୍ଥଳଭାଗ ଅତିକ୍ରମ କରୁଥିବାରୁ ଓଡ଼ିଶାକୁ ବାତ୍ୟା ନେଇ ଆଶଙ୍କା ରହିଥିଲା, ସେଥିରୁ ଆଶ୍ୱସ୍ତି ମିଳିଛି ।