କନକ ବ୍ୟୁରୋ: ରାଜ୍ୟରେ ବନ୍ୟା ସ୍ଥିତି ସଙ୍ଗୀନ ହୋଇପଡିଛି । ବନ୍ୟା ପାଣିକୁ ହାଲୁକାରେ ନେଇ ଦୁର୍ଘଟଣାର ସମ୍ମୁଖୀନ ହେଉଥିବା ଖବର ସାମ୍ନାକୁ ଆସିଛି । ଏପରି ସମୟରେ ସତର୍କତାମୂଳକ ପଦକ୍ଷେପ ନେବାକୁ ରାଜ୍ୟ ସରକାରଙ୍କ ପକ୍ଷରୁ ଲୋକଙ୍କୁ ସଚେତନ କରାଯାଇଛି । ଏହାଛଡା ବନ୍ୟା ପରବର୍ତ୍ତୀ ସ୍ୱାସ୍ଥ୍ୟ ସତର୍କତା ଗ୍ରହଣ କରିବାକୁ ଆଜି ରାଜ୍ୟ ସରକାରଙ୍କ ପକ୍ଷରୁ ପ୍ରମୁଖ ଖବରକାଗଜ ଗୁଡିକରେ ଲୋକଙ୍କୁ ସତର୍କ କରାଇ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛିଦିନ ହେଲା ବନ୍ୟାପାଣିରେ ବିଭିନ୍ନ ସ୍ଥାନରେ ଗାଡି ଭାସିଯାଇ ଲୋକଙ୍କ ପ୍ରାଣହାନୀ ହେଉଥିବା ଖବରସବୁ ସାମ୍ନାକୁ ଆସୁଛି । ଆଉ ଏହି ଦୁଃସାହସିକ ଯାତ୍ରା କାରଣରୁ ଚାହୁଁ ଚାହୁଁ ବନ୍ୟା ପାଣିରେ ଭାସିଯାଉଛି ବାଇକ ଆଉ କାର୍ । ସେଇଥିପାଇଁ ସତର୍କ କରାଇ ଦେଇଛନ୍ତି ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା ।
ସମ୍ବଲପୁର କୁଚିଣ୍ଡାରେ କାର ଭାସିଯାଇ ଦୁଇ ଜଣଙ୍କ ମୃତ୍ୟୁ ହେବା ସହ କିଛିଦିନ ତଳେ ଆଠଗଡରେ ମଧ୍ୟ ଗୋଟିଏ କାରସହ ଭାସିଯାଇଥିଲେ ପୁରା ପରିବାର । ବିଳମ୍ବିତ ରାତିରେ ଆଠଗଡ଼ ଘଣ୍ଟିଖାଲ ରାସ୍ତାରେ କାର ସହ ଭାସିଯାଉଥିବା ୪ ଯାତ୍ରୀଙ୍କୁ ଉଦ୍ଧାର କରିଥିଲେ ସ୍ଥାନୀୟ ଲୋକ । ତେଣୁ ଗଣମାଧ୍ୟମ ଜରିଆରେ ଲୋକଙ୍କୁ ବନ୍ୟା ପାଣିରେ ଏଭଳି ଦୁଃସାହସିକ ଯାତ୍ରା କରିବାକୁ ବାରଣ କରିଛନ୍ତି ଏସଆରସି ।
ସେହିପରି ବନ୍ୟା ସମୟରେ ଅନେକ ସ୍ୱାସ୍ଥ୍ୟ ସମସ୍ୟା ମଧ୍ୟ ଦେଖାଦେଇପାରେ । ତେଣୁ ବନ୍ୟା ପରବର୍ତୀ ସ୍ୱାସ୍ଥ୍ୟ ସତର୍କତା ଗ୍ରହଣ କରିବାକୁ ଆଜି ରାଜ୍ୟ ସରକାରଙ୍କ ପକ୍ଷରୁ ପ୍ରମୁଖ ଖବରକାଗଜ ଗୁଡିକରେ ସତର୍କ କରାଇ ଦିଆଯାଇଛି ।
ବନ୍ୟା ପରବର୍ତୀ ସ୍ୱାସ୍ଥ୍ୟ ସତର୍କତା
– ନଦୀ, ନାଳର ଦୂଷିତ ପାଣି ପିଅନ୍ତୁ ନାହିଁ
– ବିଶୋଧିତ ପାଇପ ପାଣି କିମ୍ବା ହାଲୋଜିନ ବଟିକା ପକାଇ ଅଧଘଂଟା ପରେ ପିଅନ୍ତୁ
– ବିଶୋଧିତ ପାଣିକୁ ଭାତ ପଖାଳିବା କିମ୍ବା ଚୁଡା, ମୁଢି ଖାଇବାରେ ବ୍ୟବହାର କରନ୍ତୁ
– ବାସି, ପଚାଷଢା କିମ୍ବା ମାଛି ବସିଥିବା ଖାଦ୍ୟକୁ ଖାଆନ୍ତୁ ନାହିଁ
– ଖାଦ୍ୟ ପରଷିବା ଓ ଖାଇବା ପୂର୍ବରୁ ଏବଂ ଶୌଚ ହେବା ପରେ ହାତ ସାବୁନରେ ଧୁଅନ୍ତୁ
– ତରଳ ଝାଡା ହେଲେ ଓଆରସ ଦ୍ରବଣ ପିଇବାକୁ ଦିଅନ୍ତୁ
– ବାହାରେ ଜମି ରହିଥିବା ପାଣିରେ ହାତ, ମୁହଁ କିମ୍ବା ବାସନକୁସନ ଧୁଅନ୍ତୁ ନାହିଁ
– ସାପ କାମୁଡା ରୋଗୀକୁ ତୁରନ୍ତ ଡାକ୍ତରଖାନାକୁ ନେଇ ଚିକିତ୍ସା କରାନ୍ତୁ