ଚମ୍ପୁଆରୁ ବିରୋଧୀଙ୍କୁ ଟାର୍ଗେଟ କଲେ ପାଣ୍ଡିଆନ । କହିଲେ, ନବୀନ ବାବୁ ଭଲ କାମ କଲେ, ବିରୋଧୀଙ୍କର ନିଦ ହଜି ଯାଉଛି ।
କନକ ବ୍ୟୁରୋ : ଚମ୍ପୁଆରେ ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ଭିକେ ପାଣ୍ଡିଆନ । ଜନସଭାକୁ ସମ୍ବୋଧିତ କରି ପାଣ୍ଡିଆନ କହିଛନ୍ତି, ମା’ ମାନେ ହେଉଛି ବିଜେଡିର ଶକ୍ତି । ସେମାନଙ୍କ ପାଇଁ ଅନେକ ପ୍ରକାର ଯୋଜନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲକ୍ଷ୍ମୀ ବସରେ ୫ ଟଙ୍କାରେ ଯାତ୍ରା, ମିଶନ ଶକ୍ତି ମହିଳାଙ୍କୁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ ବ୍ୟବସ୍ଥା, ମମତା ଯୋଜନାରେ ମା’ ମାନଙ୍କୁ ୧୦ ହଜାର ଟଙ୍କା ମିଳୁଛି । ସେହିଭଳି ଆଦିବାସୀଙ୍କ ବିକାଶ ପାଇଁ ଏସଡିସି ଗଠନ କରିବା ସହ ସେମାନଙ୍କ ଉପରେ ଥିବା ୫୦ ହଜାର ପୋଲିସ ମାମଲା ପ୍ରତ୍ୟାହାର କରିଛନ୍ତି ମୁଖ୍ୟମନ୍ତ୍ରୀ । ଆଦିବାସୀ ଛାତ୍ରଛାତ୍ରୀଙ୍କ ପାଇଁ ସର୍ବାଧିକ ହଷ୍ଟେଲ ନିର୍ମାଣ କରିବା ସହ ସେମାନଙ୍କୁ ପାଠ ପଢାଇବା ଦିଗରେ ଅନେକ ଯୋଜନା କରିଛନ୍ତି । କିନ୍ତୁ କେନ୍ଦ୍ର ସରକାର ଆଦିବାସୀଙ୍କ ପାଇଁ ଆସୁଥିବା ବଜେଟକୁ ହ୍ରାସ କରି ଚାଲିଛନ୍ତି । ଆଦିବାସୀଙ୍କ ପାଇଁ ଲାଭ ଯୋଜନା ଆଣିଛନ୍ତି ନବୀନ । ଯେଉଁମାନେ ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭର କରୁଛନ୍ତି ସେମାନଙ୍କ ଠାରୁ ସମସ୍ତ ଜଙ୍ଗଲଜାତ ଦ୍ରବ୍ୟକୁ ସରକାର ଠିକ୍ ମୂଲ୍ୟରେ କିଣିବେ । ଯାହାଦ୍ୱାରା ଆଦିବାସୀ ଭାଇଭଉଣୀ ମାନେ ଅଧିକ ଲାଭାନିତ୍ୱ ହେବେ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ବିରୋଧୀଙ୍କୁ ଟାର୍ଗେଟ କରି ପାଣ୍ଡିଆନ କହିଛନ୍ତି, ଅନ୍ୟ ଦଳର ସାଂସଦ ହେଲେ ସେମାନେ ବିକାଶମୂଳକ କାମରେ ବାଧା ଦେବେ । ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାମ ହାତକୁ ନେଇଥିଲେ ମୁଖ୍ୟମନ୍ତ୍ରୀ । କିନ୍ତୁ ବିଜେପିର ନେତା ଓ କେନ୍ଦ୍ରମନ୍ତ୍ରୀ ଏହି ପ୍ରକଳ୍ପକୁ ବନ୍ଦ କରିବାକୁ ଚକ୍ରାନ୍ତ କଲେ । କିନ୍ତୁ ମହାପ୍ରଭୁଙ୍କ ଆଶୀର୍ବାଦରେ ଏହି କାମ ଶେଷ ହେଲା । ଚମ୍ପୁଆ ପାଇଁ ମୁଖ୍ୟମନ୍ତ୍ରୀ ଯାହା କାମ କରିବେ ସେଥିରେ ଯେପରି ବାଧା ନ ଉପୁଜିବ ସେଥିପାଇଁ ଉଭୟ ବିଧାୟକ ଓ ସାଂସଦ ପ୍ରାର୍ଥୀଙ୍କୁ ବାଛିବାକୁ ଅପିଲ କରିଛନ୍ତି ପାଣ୍ଡିଆନ । ସବୁ ବିକାଶମୂଳକ କାମ ଦେଖି ବିରୋଧୀ ଦଳର ନିଦ ହଜିଯାଇଛି । ନବୀନ ବାବୁ ଏତେ ଭଲ କାମ କଲେ କେମିତି ରାଜନୀତି କରିବେ ବୋଲି ଭାବୁଛନ୍ତି ବିରୋଧୀ । ତେଣୁ ସେମାନେ ଏବେ ଅପପ୍ରଚାର କରିବା ସହ କୁମ୍ଭୀର କାନ୍ଦଣା କାନ୍ଦୁଛନ୍ତି । ଜୁନ୍ ୯ ତାରିଖରେ ଓଡ଼ିଶାବାସୀଙ୍କ ଆଶୀର୍ବାଦରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ନବୀନ । ପ୍ରଥମ ଦସ୍ତଖତରେ ମାଗଣା ବିଜୁଳି ବିଲ, ଦ୍ୱିତୀୟ ଦସ୍ତଖତରେ ସମସ୍ତଙ୍କୁ ବିଏସକେୱାଇ ଓ ତୃତୀୟ ଦସ୍ତଖତରେ ମିଶନ ଶକ୍ତି ମହିଳାଙ୍କୁ ପେନସନ ଦେବାକୁ ମୋହର ମାରିବେ ନବୀନ । ତେଣୁ ବିଜେଡି ପ୍ରାର୍ଥୀଙ୍କୁ ବିଜୟୀ କରିବାକୁ ଅପିଲ କରିଛନ୍ତି ପାଣ୍ଡିଆନ ।