କନକ ବ୍ୟୁରୋ : ଅନେକ ସମୟରେ ପିଆଜକୁ ରାଜନୈତିକ ପରିବା ବୋଲି ମଧ୍ୟ କୁହାଯାଇଥାଏ । ଦେଶରେ ପିଆଜକୁ ନେଇ ଯେତେ ରାଜନୀତି ହୋଇଛି ସେହି ତୁଳନାରେ ଅନ୍ୟ ପନିପରିବା ପିଆଜର ପାଖ ମାଡିପାରି ନାହାଁନ୍ତି । ସମସ୍ତ ପରିବା ଠାରୁ ଭିନ୍ନ ପିଆଜ ନିଜ ଦମରେ କେବେ ସରକାର ଗଢିଛି ତ କେତେ ସରକାର ଭାଙ୍ଗିଛି । ରାଜନୀତିରେ ପିଆଜର ଭୂମିକାକୁ ନେଇ ସେତେବେଳେ ଜୋରଦାର ଚର୍ଚ୍ଚା ହୋଇଥିଲା ଯେତେବେଳେ ଇନ୍ଦିରା ଗାନ୍ଧୀଙ୍କ ଦ୍ୱାରା ଘୋଷଣା କରାଯାଇଥିବା ଜରୁରୀକାଳୀନ ପରିସ୍ଥିତି ଶେଷ ହୋଇଥିଲା । ଜରୁରୀକାଳୀନ ପରିସ୍ଥିତି ପରେ ଦେଶରେ ଜନତାଦଳର ସରକାର ଆସିଥିଲା । ଏହି ସରକାରରେ ଇନ୍ଦିରା ଗାନ୍ଧୀଙ୍କ ନେତୃତ୍ୱରେ କଂଗ୍ରେସ ବିରୋଧୀ ଆସନରେ ବସିଥିଲା । ଏହି ସମୟରେ ପିଆଜର ଦାମ ଅହେତୁକ ଭାବେ ବୃଦ୍ଧି ପାଇଥିଲା । ଏହାର ସୁଯୋଗ ନେଇ କଂଗ୍ରେସ ଏହାକୁ ପ୍ରସଙ୍ଗ କରି ଜନତାଦଳ ସରକାରକୁ ଘେରିଥିଲା । କଂଗ୍ରେସ ସାଂସଦ ପିଆଜ ମାଳ ପିନ୍ଧି ସଂସଦକୁ ଆସିଥିଲେ । ଏହା ପୁରା ଦେଶବାସୀଙ୍କ ଉପରେ ପ୍ରଭାବ ପକାଇଥିଲା । ଏହି ପ୍ରସଙ୍ଗ ଉଠାଇ କଂଗ୍ରେସ ଜନତା ଦଳ ସରକାରକୁ ବ୍ୟାକଫୁଟକୁ ଠେଲି ଦେଇଥିଲା । ଏସବୁ ଭିତରେ ନିର୍ବାଚନ ତାରିଖ ଘୋଷଣା ହୋଇଗଲା । ଜରୁରୀକାଳୀନ ପରିସ୍ଥିତିରେ ଜନତାଙ୍କ ଆକ୍ରୋଶରେ ଶିକାର ହୋଇଥିବା ଇନ୍ଦିରା ଗାନ୍ଧୀ ପିଆଜକୁ ହତିଆର କରି ପୁଣି ଜନତାଙ୍କ ସହାନୁଭୂତି ହାସଲ କରିବାକୁ ଚେଷ୍ଟା କରିଥିଲେ । ଆଉ ନିର୍ବାଚନ ପ୍ରଚାର ବେଳେ ବେକରେ ପିଆଜର ମାଳ ପିନ୍ଧି ମଞ୍ଚରେ ଭାଷଣ ଦେଲେ । ଏହା ଲୋକଙ୍କ ଉପରେ ଏତେ ପ୍ରଭାବ ପକାଇଲା କି ଜରୁରୀକାଳୀନ ପରିସ୍ଥିତିରେ ଇନ୍ଦିରା ଗାନ୍ଧୀଙ୍କ ଉପରେ ଥିବା ରାଗକୁ ଲୋକମାନେ ଭୁଲି ପୁଣି କଂଗ୍ରେସକୁ କ୍ଷମତାକୁ ଫେରାଇଆଣିଲେ ।
Kanak News is now on WhatsApp
Join and get latest news updates delivered to you via WhatsApp
ପିଆଜ ଇନ୍ଦିରାଙ୍କୁ ସିନା ଗାଦୀ ଫେରିପାଇବାରେ ସହାୟକ ହେଲା ହେଲେ ଅଟଳ ବିହାରୀ ବାଜପେୟୀଙ୍କୁ ଗାଦିଚ୍ୟୁତ ମଧ୍ୟ କରିଦେଇଥିଲା । ୧୯୯୮ ମସିହାରେ ପୋଖରଣ ପରାମାଣୁ ପରୀକ୍ଷଣ ପରେ ହଠାତ ଦେଶରେ ପିଆଜର ଦାମ ବଢିଯାଇଥିଲା । ବିରୋଧୀ ଦାବି କରିଥିଲେ କି ହଜାର ହାଜର ଟନ୍ ପିଆଜକୁ ସରକାର ପୋଖରଣ ବାଲିରେ ପୋତି ଦେଇଛନ୍ତି । ଏହି ଖବର ଏତେ ପ୍ରଚାରିତ ହେଲା ଯେ କିଛିଦିନ ମଧ୍ୟରେ ବାଜପେୟୀଙ୍କ ସରକାର ଭାଙ୍ଗିଯାଇଥିଲା । ଆଉ ବାଜପେୟୀ କେବେ ବି ଗାଦୀରେ ବସିପାରି ନଥଲେ ।
ପିଆଜ ଗରିବ ପଖାଳର ସାଥୀ ତ ବଡ ବଡିଆଙ୍କ ପାଇଁ ସୁସ୍ୱାଦୁ ଖାଦ୍ୟ । କେବେ ପିଆଜର ଦାମ ଆକାଶଛୁଆଁ ହେଲେ ଖାଉଟିଙ୍କ ଆଖିରୁ ଲୁହଗଡେ ତ ପୁଣି କେବେ ଶସ୍ତା ହୋଇଗଲେ ଚାଷୀବାପୁଡା କାନ୍ଦେ । ଏବେ ଏବେ ମହାରାଷ୍ଟ୍ରର ନାସିକରୁ ହଜାର ହଜାର ପିଆଜ ଚାଷୀ ଏକ ପଦଯାତ୍ରା କରି ମହାରାଷ୍ଟ୍ର ବିଧାନସଭା ଅଭିମୁଖେ ଯାତ୍ରା କରିବାର ଚିତ୍ର ବେଶ୍ କିଛି ବୟାନ କରୁଥିଲା । ସେମାନଙ୍କ ପଦଯାତ୍ରା ଦେଖି ମହାରାଷ୍ଟ୍ରର ସିନ୍ଦେ ସରକାର ତୁରନ୍ତ ସେମାନେ ବିଧାନସଭା ନିକଟରେ ପହଂଚିବା ପୂର୍ବରୁ ଚାଷୀଙ୍କର ସମସ୍ତ ଦାବି ମାନି ନେଇଥିଲେ । କାରଣ ସିନ୍ଦେ ଜଣେ ବରିଷ୍ଠ ରାଜନେତା ହୋଇଥିବାରୁ ଦେଶ ରାଜନୀତିରେ ପିଆଜର ଭୂମିକାକୁ ସେ ବୁଝି ସାରିଥିଲେ ।