ମୋହନା ମାଣିକପୁର ଗାଁ ମହିଳାଙ୍କ ଛତୁ ଚାଷ । କମ୍ ଖର୍ଚ୍ଚ ଓ କମ୍ ସମୟରେ ହେଉଛି ଭଲ ଲାଭ । ଦିନକୁ ୩ରୁ ୪ ଘଣ୍ଟା ପରିଶ୍ରମ କରି ହେଉଛନ୍ତି ଲାଭବାନ
କନକ ବ୍ୟୁରୋ: ଛତୁ ଚାଷ କରି ସ୍ୱାବଲମ୍ବୀ ହେଲେ ମହିଳା । ମିଶନ ଶକ୍ତି ଜରିଆରେ ତାଲିମ ନେଇ ଛତୁ ଚାଷ କରୁଛନ୍ତି ଗଜପତି ଜିଲ୍ଲା ମୋହନା ବ୍ଲକ ମାଣିକପୁର ଗାଁର ମା’ ମହାଲକ୍ଷ୍ମୀ ସ୍ୱୟଂ ସହାୟକ ଗୋଷ୍ଠୀର ସଦସ୍ୟା । କିଏ ନଡ଼ା କାଟୁଛି ତ ପୁଣି କିଏ ନଡ଼ାକୁ ପାଣିରେ ଭିଜାଇବା କାମରେ ଲାଗିପଡ଼ିଛି । ଘର କାମ ସାରି ମହିଳା ମାନେ ଏହି କାମ କରିବା ପାଇଁ ଏକାଠି ହୁଅନ୍ତି । ଦିନକୁ ୩ରୁ ୪ ଘଣ୍ଟା ପରିଶ୍ରମ କରି ଭଲ ଲାଭବାନ ହେଉଛନ୍ତି । ଛତୁ ଚାଷ ପାଇଁ କମ୍ ଜାଗାରେ ପ୍ରସ୍ତୁତ ହୋଇଛି ସବୁଜ ଘର । ଦିନକୁ ପ୍ରାୟ ୧୦ରୁ ୧୫ କେଜି ଛତୁ ଉତ୍ପାଦନ ହେଉଥିବା ବେଳେ ମାସକୁ ଏଥିରୁ ୮ରୁ ୯ ହଜାର ଟଙ୍କା ରୋଜଗାର ହୋଇପାରୁଛି । ଏହାକୁ ବଜାରରେ ବିକ୍ରି ଲାଭବାନ ହେଉଛନ୍ତି ମହିଳା ।
Kanak News is now on WhatsApp
Join and get latest news updates delivered to you via WhatsApp
ମିଶନ ଶକ୍ତି ଜରିଆରେ ମହିଳା ମାନଙ୍କୁ ପାରଳାଖେମୁଣ୍ଡି ଠାରେ ଉଦ୍ୟାନ କୃଷି ବିଭାଗ ପକ୍ଷରୁ ଛତୁ ଚାଷ ବିଷୟରେ ତାଲିମ ମିଳିବା ପରେ ମହିଳା ମାନେ ବ୍ୟାଙ୍କରୁ ୧ ଲକ୍ଷ ଟଙ୍କା ରୁଣ ଆଣିଥିଲେ । ସେଥିରେ ମହିଳାଙ୍କୁ ୮୦ ହଜାର ଟଙ୍କାର ରିହାତି ମିଳିବା ସହ ଉଦ୍ୟାନ କୃଷି ବିଭାଗ ପକ୍ଷରୁ ୩୦୦ ଶଯ୍ୟା ବିଶିଷ୍ଠ ଏକ ସବୁଜ କୋଠରୀ କରାଯାଇଥିଲା । ଏବେ ମହିଳା ମାନେ ଧିଙ୍ଗିରି ଛତୁ ଚାଷ କରୁଛନ୍ତି । ଆଗକୁ ପାଳ ଛତୁ ଚାଷ କରିବା ପାଇଁ ଯୋଜନା କରିଛନ୍ତି । ନିଜେ ସ୍ୱାବଲମ୍ବୀ ହେବା ସହ ପରିବାରର ଆର୍ଥିକ ସ୍ଥିତିରେ ସୁଧାର ଆଣିପାରିଛନ୍ତି ।
ଛତୁ ଚାଷ ଏକ ଲାଭଜନକ ଚାଷ ହୋଇଥିବା ବେଳେ କମ୍ ଖର୍ଚ୍ଚରେ ଏହା ଭଲ ଲାଭ ଦେଇଥାଏ । ତେଣୁ ମହିଳା ମାନେ ଏହି ଚାଷ ଆପଣାଇ ଏବେ ରୋଜଗାରକ୍ଷମ ହୋଇପାରିଛନ୍ତି ।