କନକ ବ୍ୟୁରୋ: ବ୍ରହ୍ମପୁରରେ ଜଣେ ଯୁକ୍ତ ଦୁଇ ଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ ଘଟଣାରେ ରାସ୍ତାକୁ ଓହ୍ଲାଇଛି ବିଜେପିର ମହିଳା ମୋର୍ଚ୍ଚା । ମହିଳା ମୋର୍ଚ୍ଚାର ସଭାପତି ଐଶ୍ୱର୍ଯ୍ୟା ବିଶ୍ୱାଳଙ୍କ ନେତୃତ୍ୱରେ ମହିଳାମାନେ ବ୍ରହ୍ମପୁର ଏସ୍ପି ଅଫିସ୍ ସମ୍ମୁଖରେ ପ୍ରତିବାଦ କରିବା ସହ ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ମହିଳା ଅସୁରକ୍ଷିତ ଥିବା ଅଭିଯୋଗ କରିବା ସହ ବିଭିନ୍ନ ଦାବି ସମ୍ମଳିତ ଏକ ଅଭିଯୋଗ ପତ୍ର ଦେଇଛି ବିଜେପି ମହିଳା ମୋର୍ଚ୍ଚା । ବ୍ରହ୍ମପୁରର ବୈଦନାଥପୁର ଥାନା ଅଂଚଳରେ ଘଟିଥିବା ଏହି ଘଟଣାରେ ୫ ଜଣଙ୍କୁ ଗିରଫ କରି ସ୍ୱତନ୍ତ୍ର ପୋକ୍ସୋ କୋର୍ଟକୁ କରାଯାଇଥିଲା । ତେବେ ପୋକ୍ସୋ କୋର୍ଟ ଜାମିନ୍ ନାମଞ୍ଜୁର କରିବା ପରେ ସମସ୍ତଙ୍କୁ ଜେଲ୍କୁ ପଠାଇ ଦିଆଯାଇଛି । ତେବେ ଏହି ପାଶବିକ ଅତ୍ୟାଚାର ଘଟଣାରେ ସଂପୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ଜାଲ ବିଛାଇଛି ପୁଲିସ୍ । ଏଭଳି ଘଟଣାରେ କାହାରିକୁ ଛଡ଼ା ଯିବ ନାହିଁ, ଦୋଷୀଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି, ଏସ୍ପି ଦାୟୀତ୍ୱରେ ଥିବା ଡିଆଇଜି ସାର୍ଥକ ଷଡ଼ଙ୍ଗୀ ।
ଥାନାରେ ହୋଇଥିବା ଏତଲା ଅନୁସାରେ, ନାବାଳିକା ଛାତ୍ରୀ ଜଣଙ୍କ ତାଙ୍କ ବାପାଙ୍କୁ ବସଷ୍ଟାଣ୍ଡରେ ଅପେକ୍ଷା କରିଥିଲେ । ଏହି ସମୟରେ ଖରାରେ ଏତେ ସମୟ କାହିଁକି ଅପେକ୍ଷା କରିବ କହି ପୁରୁଷ ବନ୍ଧୁ ଜଣଙ୍କୁ ନାବାଳିକାଙ୍କୁ ତାଙ୍କ ରୁମକୁ ନେଇ ଯାଇଥିଲେ । ଆଉ ଘରେ କୋଲ୍ଡ ଡ୍ରିଙ୍କସରେ ନିଶାଦ୍ରବ୍ୟ ମିଶାଇ ପିଆଇବା ପରେ ଦୁଷ୍କର୍ମ କରିଥିଲେ । ଏଥିରେ ଆହୁରି କିଛି ସାଙ୍ଗ ସହଯୋଗ କରିଥିବା ଅଭିଯୋଗ ରହିଛି ।