ଦକ୍ଷିଣ ଓଡିଶା ପରେ ଉପକୂଳରେ ବଡ ଲଢ଼େଇ । କାଲି ଭୁବନେଶ୍ୱରରେ ରୋଡ ସୋ କରିବେ ପ୍ରଧାନମନ୍ତ୍ରୀ । ଟକ୍କର ଦେବାକୁ ରଣନୀତି କରୁଛି ବିଜେଡି ।
କନକବ୍ୟୁରୋ :ପ୍ରଚାରରେ କମ୍ପିବ ରାଜଧାନୀ । ଆରପାର ଲଢେଇ ଭିତରେ ଆସନ୍ତାକାଲି ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ରାମ ମନ୍ଦିରରୁ ବାଣୀବିହାର ପର୍ଯ୍ୟନ୍ତ ମେଗା ରୋଡ ଶୋ କରି ଦମ ଦେଖାଇବେ ମୋଦୀ । ସେପଟେ ମୋଦୀଙ୍କ ସୋ କୁ କାଉଣ୍ଟର କରିବାକୁ ବିଜେଡି ମଧ୍ୟ ପ୍ରସ୍ତୁତ ହେଉଛି । ଶୁକ୍ରବାର କିଛି ଏହିଭଳି ଜନସମୁଦ୍ର ପାଲଟିବ ଜନପଥ ।
Kanak News is now on WhatsApp
Join and get latest news updates delivered to you via WhatsApp
କାରଣ ରାଜ୍ୟରେ କ୍ଷମତା ଦଖଲ ସହ କେନ୍ଦ୍ରରେ ୪୦୦ ପାରର ନାରା ନେଇ ଗୋଟିଏ ସପ୍ତାହରେ ଦୁଇ ଦୁଇଥର ଓଡିଶା ଆସିବା ପରେ ଶୁକ୍ରବାର ପୁଣି ଆସୁଛନ୍ତି ମୋଦୀ । ରାଜଧାନୀ ଭୁବନେଶ୍ୱରରେ କରିବେ ମେଗା ରୋଡ ସୋ । ଭୁବନେଶ୍ୱର ବିମାନ ବନ୍ଦରରେ ପହଂଚିବା ପରେ ସିଧା ପାର୍ଟି ଅଫିସରୁ ଆରମ୍ଭ ହେବ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମ । ରାଜ୍ୟ କାର୍ଯ୍ୟାଳୟରୁ ବାଣୀବିହାର ପର୍ଯ୍ୟନ୍ତ ରୋଡ ସୋ’ରେ ଲକ୍ଷାଧିକ ଲୋକଙ୍କ ସମାଗମ ହେବ । ଏଥିପାଇଁ ସ୍ୱତନ୍ତ୍ର ରଣନୀତି କରିଛି ରାଜ୍ୟ ବିଜେପି । ଶୁକ୍ରବାର ଭୁବନେଶ୍ୱରରେ ରାତ୍ରୀଯାପନ କରି ଶନିବାର କନ୍ଧମାଳ, ବରଗଡ ଏବଂ ବଲାଙ୍ଗୀରରେ ବିଶାଳ ସମାବେଶରେ ଜନସାଧାରଣଙ୍କୁ ସମ୍ବୋଧନ କରିବେ ମୋଦୀ ।
ମୋଦୀଙ୍କ କ୍ରେଜକୁ କାଉଣ୍ଟର କରିବା ପାଇଁ ବିଜେଡି ରଣନୀତି । ପ୍ରଧାନମନ୍ତ୍ରୀଙ୍କ ରୋଡ ସୋ’କୁ ନେଇ ବିଜେପି ଜୋରଦାର ପ୍ରସ୍ତୁତି କରୁଥିବା ବେଳେ, ବିଜେଡି ମଧ୍ୟ ସ୍ୱତନ୍ତ୍ର ପ୍ରସ୍ତୁତି କରିଛି । ଦଳୀୟ ନିଷ୍ପତି ଅନୁସାରେ ବିଜେଡିର ଯୋଜନା ରାଜଧାନୀର ବିଭିନ୍ନ ସ୍ଥାନରେ ସମାବେଶ ଓ ରାଲି କରିବା ପାଇଁ ପ୍ରାର୍ଥୀଙ୍କୁ ନିର୍ଦ୍ଦେଶ ଦିଆଯାଇଛି । ଏକାମ୍ର, ମଧ୍ୟ ଏବଂ ଉତ୍ତର ନିର୍ବାଚନ ମଣ୍ଡଳୀରେ ଦଳୀୟ କାର୍ଯ୍ୟକ୍ରମ କରିବାକୁ ଯୋଜନା କରାଯାଇଛି ।
କେବଳ ସେତିକି ନୁହେଁ ଆସନ୍ତା ୧୬ ତାରିଖରେ ରାଜଧାନୀରେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ମାରାଥନ ରୋଡ ସୋ’ର ବ୍ଲୁ ପ୍ରିଂଟ ମଧ୍ୟ ପ୍ରସ୍ତୁତ କରିଛି ଦଳ । ପାଗ ପରିବର୍ତନ ହେଲା ଭଳି ରାଜ୍ୟ ରାଜ୍ୟନୀତିର ପାଣିପାଗ ମଧ୍ୟ ବଦଳିଲାଣି । ଗୋଟେ ପଟେ ମୋଦୀ ଓ କେନ୍ଦ୍ରୀୟ ନେତୃତ୍ୱ ଘନଘନ ଆକ୍ରମଣ କରି ଓଡିଶାରେ ସରକାର ଗଢିବା ପାଇଁ ରଣହୁଙ୍କାର ଦେଉଛନ୍ତି । ଅନ୍ୟପଟେ ନବୀନ ମଧ୍ୟ ବିରୋଧୀଙ୍କୁ ମୁକାବିଲାର ମୈଦାନରେ କଡା ଜବାବ ଦେଉଛନ୍ତି । ଏଥିରୁ ସ୍ପଷ୍ଟ ସଂକେତ ମିଳୁଛି ଆଗକୁ ଆରପାରର ଲଢେଇ ହେବ ।