ଶାହିନଙ୍କୁ ଏତେ ପ୍ରଂଶସା କାହିଁକି, ଶାହିନ କଣ ୱାସିମ ଆକ୍ରମ? ପାକିସ୍ତାନର ଦ୍ରୁତ ବୋଲରଙ୍କ ଧଜିଆ ଉଡାଇଲେ ରବି ଶାସ୍ତ୍ରୀ ।
କନକ ବ୍ୟୁରୋ : ପୁଣିଥରେ ଭାରତ ବିପକ୍ଷରେ ମାତ୍ ଖାଇଲା ପାକିସ୍ତାନ । ବିଶ୍ୱକପରେ ପାକିସ୍ତାନକୁ ୭ ୱିକେଟରେ ମାତ୍ ଦେଇଛି ଟିମ୍ ଇଣ୍ଡିଆ । ରୋହିତଙ୍କ ଦ୍ରୁତ ଅର୍ଦ୍ଧଶତକ ଓ ଶ୍ରେୟସଙ୍କ ଧୈର୍ଯ୍ୟପୂର୍ଣ୍ଣ ଇନିଂସ ବଳରେ ପାକିସ୍ତାନ ବିପକ୍ଷରେ ଭାରତ ସହଜ ବିଜୟ ହାସଲ କରିଛି । ଭାରତର ବ୍ୟାଟିଂ ଆଗରେ ପାକିସ୍ତାନର ବୋଲିଂ ବାହିନୀ ଚିତପଟାଙ୍ଗ ମାରିଥିଲା । ପାକିସ୍ତାନର ବୋଲିଂ ବିଭାଗକୁ ସବୁଠାରୁ ଶକ୍ତିଶାଳୀ କୁହାଯାଉଥିଲେ ମଧ୍ୟ ରୋହିତ ଓ ଶ୍ରେୟସଙ୍କ ଇନିଂସ ଏହାକୁ ସମ୍ପୂର୍ଣ୍ଣ ଭୁଲ ପ୍ରମାଣିତ କରିଥିଲା । ଯାହାକୁ ନେଇ ପୂର୍ବତନ ଭାରତୀୟ କୋଚ୍ ତଥା ଏବେ ଭାଷ୍ୟକାର ଦାୟିତ୍ୱ ତୁଲାଉଥିବା ରବି ଶାସ୍ତ୍ରୀ ବଡ ବୟାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମ୍ୟାଚ ସମୟରେ କମେଣ୍ଟ୍ରି କରୁଥିବା ବେଳେ ରବି ଶାସ୍ତ୍ରୀ ପାକିସ୍ତାନର ବୋଲିଂ ବାହିନୀକୁ ନେଇ କହିଛନ୍ତି ଯେ, ଲୋକେ ମୋତେ କହୁଛନ୍ତି ପାକିସ୍ତାନ ପାଖରେ ଶକ୍ତିଶାଳୀ ବୋଲିଂ ଆଟାକ ରହିଛି । କିନ୍ତୁ ଏହା ସମ୍ପୂର୍ଣ୍ଣ ମିଛ । ପାକିସ୍ତାନର ବୋଲିଂ ବିଭାଗ ସେତେଟା ଶକ୍ତିଶାଳୀ ନୁହେଁ । ନସିମ ଶାହା ବିଶ୍ୱକପ ଖେଳୁନାହାନ୍ତି । ପାକିସ୍ତାନର ସ୍ପିନ ବିଭାଗ ପ୍ରଭାବୀ ପ୍ରଦର୍ଶନ କରିବାରେ ବିଫଳ । ଦ୍ରୁତ ବୋଲର ଶାହିନ ଆଫ୍ରିଦି ମଧ୍ୟ ୱାସିମ ଆକ୍ରମ ନୁହଁନ୍ତି । ଶାହିନ ଭଲ ବୋଲର । ନୂଆ ବଲରେ ୱିକେଟ ନେବାର ଦକ୍ଷତା ତାଙ୍କର ରହିଛି । କିନ୍ତୁ ତାଙ୍କୁ ଏତେ ପ୍ରଂଶସା କରିବାର ଆବଶ୍ୟକତା ନାହିଁ । ଯାହା ସତ ତାହା କହିବା ଆବଶ୍ୟକ । କାହାକୁ ଅଧିକ ଟେକି ଶକ୍ତିଶାଳୀ ବୋଲି କହିବା ଦରକାର ନାହିଁ । ଏହାକୁ ମାନିବା ସହ ସ୍ୱୀକାର କରିବାକୁ ପଡିବ ।
ରବି ଶାସ୍ତ୍ରୀ ଏଭଳି ବୟାନ ଦେବା ପଛର କାରଣ ମଧ୍ୟ ରହିଛି । ପାକିସ୍ତାନ ବୋଲର ଶାହିନ ଆଫ୍ରିଦି ଭାରତ ପାଇଁ ଘାତକ ସାବ୍ୟସ୍ତ ହୋଇପାରନ୍ତି ବୋଲି ମ୍ୟାଚ୍ ପୂର୍ବରୁ ଅନେକ କ୍ରିକେଟର କହୁଥିଲେ । କାରଣ ଶାହିନ ଏହା ପୂର୍ବରୁ ଅନେକବାର ଭାରତର ଟପ୍ ଅର୍ଡରକୁ ଅଡୁଆରେ ପକାଇଛନ୍ତି । କିନ୍ତୁ ବିଶ୍ୱକପରେ ଶାହିନଙ୍କୁ ନିର୍ଦ୍ଧୁମ ଧୂଲେଇ କରିଥିଲେ ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା । ମ୍ୟାଚରେ ଶାହିନ ୨ଟି ୱିକେଟ ହାତେଇଥିଲେ ମଧ୍ୟ ଏହା ପାକିସ୍ତାନର ବିଜୟ ପାଇଁ ଯଥେଷ୍ଟ ନଥିଲା । ଅନ୍ୟପଟେ ଟିମ୍ ଇଣ୍ଡିଆର ଟପ୍ ଅର୍ଡର ବ୍ୟାଟର ଏବେ ଜବରଦସ୍ତ ଫର୍ମରେ ରହିଛନ୍ତି । ଭାରତ ନିଜର ଦମଦାର ବ୍ୟାଟିଂ ବଳରେ ବିଶ୍ୱକପରେ ବିଜୟର ହାଟ୍ରିକ ମାରିଛି । ଏହାସହ ପଏଣ୍ଟ ଟେବୁଲର ଶୀର୍ଷରେ ରହିଛି ରୋହିତ ବାହିନୀ ।