ଜମତରା ଗ୍ୟାଙ୍ଗକୁ ନେଇ ଆସିଲା ଚମକାଇ ଦେଲା ଭଳି ତଥ୍ୟ: ମୁମ୍ବାଇରେ ବସି ଦଲାଲ ବିକ୍ରି କରୁଛନ୍ତି ଗ୍ରାହକଙ୍କ ବ୍ୟାଙ୍କ ଆକାଉଣ୍ଟ
କନକ ବ୍ୟୁରୋ: ଜମତରା ଗ୍ୟାଙ୍ଗର ସଦସ୍ୟମାନେ ସାଇବର ଲୁଟ କରିବା ପାଇଁ କେମିତି ପାଆନ୍ତି ଆପଣଙ୍କ ନମ୍ବର, କେମିତି ପାଆନ୍ତି ଆପଣଙ୍କ ତଥ୍ୟ । ଏ ସମ୍ପର୍କରେ ନୂଆ ତଥ୍ୟ ସାମନାକୁ ଆସିଛି । ଓଡିଶା କ୍ରାଇମବ୍ରାଂଚ ତିନି ଜଣଙ୍କୁ ରିମାଣ୍ଡରେ ଆଣିବା ପରେ ଏହି ତଥ୍ୟ ହାସଲ କରିଛି ।
Kanak News is now on WhatsApp
Join and get latest news updates delivered to you via WhatsApp
ଆପଣ ଜାଣିଲେ ଆଶ୍ଚର୍ଯ୍ୟ ହେବେ, ଆପଣଙ୍କ ମୋବାଇଲ ନମ୍ବର, ଆପଣଙ୍କ ବ୍ୟାଙ୍କ ଆକାଉଂଟ ସମ୍ପର୍କୀତ ତଥ୍ୟ ବିକ୍ରି ହେଉଛି । ମୁମ୍ବାଇରେ ବସିଥିବା କିଛି ସାଇବର ଦଲାଲ ଲୋକଙ୍କ ବ୍ୟାଙ୍କ ଆକାଉଂଟ ଓ ଫୋନ ନମ୍ବର ସଂଗ୍ରହ କରୁଛନ୍ତି ଓ ଜମତରା ଗ୍ୟାଙ୍ଗର ଲୁଟେରାଙ୍କ ଭଳି ଠକଙ୍କୁ ଏହି ତଥ୍ୟ ବିକ୍ରି କରୁଛନ୍ତି । ଜମତରା ଗ୍ୟାଙ୍ଗର ସଦସ୍ୟଙ୍କୁ ପଚରାଉଚୁରା କରିବା ପରେ ଓଡିଶା କ୍ରାଇମବ୍ରାଂଚ ଏଭଳି ତଥ୍ୟ ହାସଲ କରିଛି ।
ବ୍ୟାଙ୍କ ଆକାଉଂଟ ସମ୍ପର୍କୀତ ତଥ୍ୟ ପାଇବା ପରେ ଲୋକଙ୍କୁ ଫସାଇବା ଏମାନଙ୍କ ପାଇଁ ଟିକିଏ ସହଜ ହୋଇଯାଏ । ଫୋନରେ ଯେତେବେଳେ ଏହି ଲୁଟେରାମାନେ ଆପଣଙ୍କୁ ଫୋନ କରି , ଆପଣଙ୍କ ଆକାଉଂଟ ସମ୍ପର୍କୀତ ତଥ୍ୟ କୁହନ୍ତି, ସେତେବେଳେ ତାଙ୍କ ଉପରେ ଅନେକାଂଶରେ ବିଶ୍ୱାସ ବି ହୋଇଯାଏ । ଆଉ ଏହାର ଫାଇଦା ଉଠାନ୍ତି ଏହି ଚୋର ଡକାୟତମାନେ ।
ଜମତରା ଗ୍ୟାଙ୍ଗର ମୁଖ୍ୟ ମାଷ୍ଟରମାଇଣ୍ଡ ଏବେ ବି ଝାଡଖଣ୍ଡରେ ବସି ସାରାଦେଶକୁ ଲୁଟ କରିବାରେ ଲାଗିଛି । ଓଡିଶା କ୍ରାଇମବ୍ରାଂଚ ଗିରଫ କରିଥିବା ଜମତରା ସଦସ୍ୟଙ୍କଠାରୁ ଜଣାପଡିଛି, ସବୁ ଲୁଟ୍ର ଟଙ୍କା ସେହି ମାଷ୍ଟରମାଇଣ୍ଡର ଆକାଉଂଟକୁ ଯାଏ ଏବଂ ପରେ ସେ ଟଙ୍କାକୁ ଅନ୍ୟମାନଙ୍କୁ ପଠାଇଥାଏ ।