କଟକ : ଅର୍ଥ ମଞ୍ଜୁର ପରେ ଆରମ୍ଭ ହେଲା ରାସ୍ତା ମରାମତି କାମ , ହେଲେ ସୂଚନା ଫଳକ ଲାଗି ନଥିବାରୁ ଦେଖାଦେଇଛି ଅସନ୍ତୋଷ
କନକ ବ୍ୟୁରୋ : ଦୀର୍ଘଦିନର ଦାବିପରେ ରାସ୍ତା ମରାମତି ପାଇଁ ସରକାର ଅର୍ଥ ମଞ୍ଜୁର କରିଛନ୍ତି । ମରାମତି କାମ ମଧ୍ୟ ଆରମ୍ଭ ହୋଇଛି, ହେଲେ କାର୍ଯ୍ୟସ୍ଥଳରେ ସୂଚନା ଫଳକ ଲାଗି ନଥିବାରୁ ଅସନ୍ତୋଷ ଦେଖାଦେଇଛି । କାମର ମାନକୁ ନେଇ ପ୍ରଶ୍ନ କରିଛନ୍ତି କଟକ ଜିଲ୍ଲା କଂଟାପଡା ବ୍ଲକ ଗୋବିନ୍ଦପୁର ବାସିନ୍ଦା ।
Kanak News is now on WhatsApp
Join and get latest news updates delivered to you via WhatsApp
କଟକର ବାରଙ୍ଗ ବ୍ଲକ ମହିଧରପଡା ଠାରୁ କଂଟାପଡା ଗୋବିନ୍ଦପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତା ପାଇଁ ଆରମ୍ଭ ହୋଇଛି ମରାମତି କାମ । କଟକ ଗ୍ରାମ୍ୟ ଉନ୍ନୟନ ବିଭାଗ (୧) ଅଧିନରେ ଥିବା ଏହି ରାସ୍ତା ବର୍ଷବର୍ଷ ଧରି ଖାଲଖମାରେ ଭର୍ତ୍ତି ହୋଇ ରହିବା ପରେ ସରକାରଙ୍କ ନଜର ପଡିଛି । ରାସ୍ତା ମରାମତି ପାଇଁ ଅର୍ଥ ମଞ୍ଜୁର ହୋଇ ଏବେ କାମ ଚାଲିଛି । ହେଲେ କାମକୁ ନେଇ ସୂଚନାଫଳକ ଲାଗିନଥିବାରୁ କାମର ମାନଙ୍କୁ ନେଇ ପ୍ରଶ୍ନ କରିଛନ୍ତି ସ୍ଥାନୀୟ ବାସିନ୍ଦା ।
ସେପଟେ ପୂର୍ବାପେକ୍ଷା ବର୍ତ୍ତମାନ ଉନ୍ନତମାନର କାମ କରାଯାଉଥିବା କହିଛନ୍ତି ବିଭାଗୀୟ ଅଧିକାରୀ । କାର୍ଯ୍ୟସ୍ଥଳରେ ସୂଚନା ଫଳକ ନ ଲଗାଇବା ପାଇଁ ବିଭାଗୀୟ ନିର୍ଦ୍ଦେଶ ରହିଥିବା ନେଇ କହିବା ସହ ଲାଗିଥିଲେ ଭଲ ହୋଇଥାନ୍ତା ବୋଲି ସେ ସ୍ୱୀକାର କରିଛନ୍ତି । ଗୋଟିଏ ପଟେ ଲୋକଙ୍କ ଅଭିଯୋଗ, ଅନ୍ୟପଟେ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା । ଏହାରି ଭିତରେ କାମର ମାନ କେତେ ଉନ୍ନତ ତାହା ଆଗାମୀ ଦିନ ହିଁ କହିବ ।