ସରକାରୀ ବାସଭବନ ଛାଡ଼ିବାକୁ ରାଜି ହେଲେ ରାହୁଲ ଗାନ୍ଧୀ: ଚିଠି ଲେଖି ଲୋକସଭା ସଚିବାଳୟର ଡେପୁଟି ସେକ୍ରେଟାରୀଙ୍କୁ କଲେ ଅବଗତ
କନକ ବ୍ୟୁରୋ: ଯେଉଁ ତତ୍ପରତାରେ ରାହୁଲ ଗାନ୍ଧୀଙ୍କ ସଭ୍ୟପଦ ରଦ୍ଦ ହୋଇଥିଲା, ଯେଉଁ ଢଙ୍ଗରେ ସରକାରୀ ବଙ୍ଗଳା ଖାଲି କରିବାକୁ ନୋଟିସ୍ ହୋଇଥିଲା, ସେଇ ସମାନ ଢଙ୍ଗରେ ତତ୍ପରତା ଦେଖାଇ ସରକାରୀ ବଙ୍ଗଳା ଛାଡ଼ିବାକୁ ରାଜି ହୋଇଛନ୍ତି ରାହୁଲ ଗାନ୍ଧୀ । ଲୋକସଭା ସଚିବାଳୟର ଉପସଚିବଙ୍କୁ ଚିଠି କରି, ରାହୁଲ ଲେଖିଛନ୍ତି- ଲୋକଙ୍କ ଜନାଦେଶ ବଳରେ ୪ଥର ଲୋକସଭାର ସଦସ୍ୟ ହୋଇଛି । ମୋର ଅଧିକାରକୁ ପକ୍ଷଭୁତ ନକରି, ମୁଁ ନିଶ୍ଚିତ ଭାବେ ଆପଣଙ୍କ ଆଦେଶକୁ ପାଳନ କରିବି । ଆଉ ନୋଟିସରେ କୁହାଯାଇଥିବା ସବୁ ପଦକ୍ଷେପ ଗ୍ରହଣ କରିବି । ଅର୍ଥାତ୍ ସଫାସଫା ବଙ୍ଗଳା ଛାଡ଼ିବାକୁ ସହମତି ଦେଖାଇଛନ୍ତି ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ରାହୁଲ ଗାନ୍ଧୀ ବଙ୍ଗଳା ଛାଡ଼ିବାକୁ ରାଜି ହୋଇଥିବା ବେଳେ ଏବେ ସେ କେଉଁଠି ରହିବେ ତାକୁ ନେଇ ଚର୍ଚ୍ଚା ହୋଇଛି । ଆଉ ଠିକ୍ ଏତିକି ବେଳେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ କହିଛନ୍ତି, ଯଦି ରାହୁଲ ଗାନ୍ଧୀ ବଙ୍ଗଳା ଖାଲି କରନ୍ତି । ତେବେ ନିଜ ମା’ ସୋନିଆ ଗାନ୍ଧୀ ସହ ରହିପାରିବେ । ନଚେତ୍ ମୋ ପାଖରେ ଆସି ମଧ୍ୟ ରହିପାରିବେ ।
ରାହୁଲ ଗାନ୍ଧୀଙ୍କ ସଭ୍ୟ ପଦ ରଦ୍ଦକୁ ନେଇ ବିବାଦ ଥମିନଥିବା ବେଳେ ଏବେ ଆଉ ଏକ ବିବାଦ ମୁଣ୍ଡ ଟେକି ଠିଆ ହୋଇଛି । ଏହି ବିବାଦ ପଛରେ ରହିଛି, ରାହୁଲ ଗାନ୍ଧୀଙ୍କ ଏହି ବୟାନ୍ । ରାହୁଲ ଗାନ୍ଧୀଙ୍କ ଏହି ବୟାନକୁ ନେଇ ଅଡୁଆରେ ପଡ଼ିଛନ୍ତି ରାହୁଲ ଗାନ୍ଧୀ । ଏହି ବୟାନକୁ ନେଇ କେବଳ ବିଜେପି ନୁହେଁ ବରଂ ସାବରଙ୍କର ବଂଶଧର ଭାବେ ଆପତି ଉଠାଇଛନ୍ତି । ଯଦି ରାହୁଲ ଗାନ୍ଧୀ ମନ୍ତବ୍ୟକୁ ଫେରାଇ ନନିଅନ୍ତି, ତେବେ ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି ବୀର ସାବରକରଙ୍କ ନାତି ।
ଏପଟେ ସଭ୍ୟପଦ ରଦ୍ଦ ପ୍ରସଙ୍ଗରେ ରାହୁଲଙ୍କୁ ସମର୍ଥନ ଦେଉଥିବା ଶିବସେନାର ଉଦ୍ଧବ ଗୋଷ୍ଠୀ ଏହି ବୟାନକୁ ନେଇ ଆପତି ଉଠାଇଛନ୍ତି । ଉଦ୍ଧବ ଠାକରେ ଏବଂ ସଂଜୟ ରାଉତ ଏହି ମନ୍ତବ୍ୟକୁ ବିରୋଧ କରିବା ସହ ମହାରାଷ୍ଟ୍ରରେ ମହାବିକାଶ ଅଘାଡ଼ି ସହ ମେଂଟ ଭାଙ୍ଗିବାକୁ ଚେତାବନୀ ଦେଇଛନ୍ତି ।
ଏସବୁ ଭିତରେ ରାହୁଲଙ୍କ ଲୋକସଭା ସଦସ୍ୟତା ଯିବା ପରେ ଆମେରିକା ରଖିଛି ପ୍ରତିକ୍ର୍ରିୟା । ଆମେରିକା ବୈଦେଶିକ ବିଭାଗର ମୁଖପାତ୍ର ବେଦାନ୍ତ ପଟେଲ କହିଛନ୍ତି, ଆଇନ୍ ଓ ନ୍ୟାୟିକ ସ୍ୱାଧୀନତାର ସମ୍ମାନ ଯେକୌଣସି ଗଣତନ୍ତ୍ରର ମୂଳ ଆଧାର । ଗଣତାନ୍ତ୍ରିକ ମୂଲ୍ୟବୋଧ ସହିତ ବାକ୍ ସ୍ୱାଧୀନତା ଜରୁରୀ । ଆମେରିକା ଭାରତ ସରକାର ସହ ଯୋଗାଯୋଗରେ ଅଛନ୍ତିି । ରାହୁଲ ଗାନ୍ଧୀଙ୍କ ବହିଷ୍କାର ସମ୍ପର୍କିତ ଏକ ପ୍ରଶ୍ନର ଉତରରେ ଏହି ପ୍ରତିକ୍ରିୟା ରଖିଥିଲେ ବେଦାନ୍ତ ପଟେଲ ।