ଏସବିଆଇକୁ ସୁପିମକୋର୍ଟଙ୍କ ଛାଟ । ନିର୍ବାଚନୀ ବଣ୍ଡ ସମ୍ବନ୍ଧରେ ସମ୍ପୂର୍ଣ୍ଣ ତଥ୍ୟ ଦାଖଲ କରିନଥିବାରୁ ଅସନ୍ତୋଷ ପ୍ରକାଶ, ସୋମବାର ସୁଦ୍ଧା ପୁରା ତଥ୍ୟ ଦାଖଲ କରିବାକୁ ନିର୍ଦ୍ଦେଶ
କନକ ବ୍ୟୁରୋ : ତଥ୍ୟ ଦେଲେ, ହେଲେ ରହସ୍ୟ ରଖିଦେଲେ । ସମ୍ପୂର୍ଣ୍ଣ ତଥ୍ୟ ସାମ୍ନାକୁ ଆସିଲା ନାହିଁ । ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସର୍ବୋଚ୍ଚ ନ୍ୟାୟାଳୟ । ଏସବିଆଇକୁ ସୁପିମକୋର୍ଟ ଛାଟ । ଇଲୋକ୍ଟୋରାଲ ତଥା ନର୍ବାଚନ ବଣ୍ଡ ସମ୍ପନ୍ଧରେ ସମ୍ପୁର୍ଣ୍ଣ ତଥ୍ୟ ଦାଖଲ କରିନଥିବାରୁ ଏସବିଆଇ ଉପରେ ବିରକ୍ତି ପ୍ରକାଶ କରିଛନ୍ତି ସର୍ବୋଚ କୋର୍ଟ । ଏସବିଆଇ ନିର୍ବାଚନ ବଣ୍ଡ ସମ୍ପର୍କରେ ଯେଉଁ ତଥ୍ୟ ପ୍ରଦାନ କରିଛନ୍ତି ସେଥିରେ ପୁରା ତଥ୍ୟ ନାହିଁ ବୋଲି କହିଛନ୍ତି କୋର୍ଟ । ମାମଲାର ଶୁଣାଣି କରି ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୁଡଙ୍କ ଅଧ୍ୟକ୍ଷତାର ୫ ଜଣିଆ ଖଣ୍ଡପୀଠ ଏସବିଆଇକୁ ଇଲୋକ୍ଟୋରାଲ ବଣ୍ଡ ନମ୍ବର ସହ ପୁରା ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ପରବର୍ତି ଶୁଣାଣି ମାର୍ଚ୍ଚ ୧୮ ତାରିଖ ସୁଦ୍ଧା ପୁରା ତଥ୍ୟ ଦାଖଲ କରିବାକୁ ଏସବିଆଇକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ କୋର୍ଟ ।
Kanak News is now on WhatsApp
Join and get latest news updates delivered to you via WhatsApp
କେଉଁ ସଂସ୍ଥା କେତେ ଟଙ୍କାର ବଣ୍ଡ କିଣିଛନ୍ତି ଏବଂ କେଉଁ ଦଳ ଏହି ବଣ୍ଡ ଗ୍ରହଣ କରିଛନ୍ତି ସେନେଇ ରିପୋର୍ଟ ଦେଇଛି ଏସବିଆଇ । କିନ୍ତୁ କେଉଁ ସଂସ୍ଥା କେଉଁ ଦଳକୁ କେତେ ଟଙ୍କାର ବଣ୍ଡ ଦେଇଛନ୍ତି ଏସମ୍ପର୍କରେ ସୂଚନା ଦିଆଯାଇନାହିଁ । ନିର୍ବାଚନ ବଣ୍ଡ ନମ୍ବର ଦ୍ୱାରା ଚାନ୍ଦା ଦେଉଥିବା ସଂସ୍ଥା ଏବଂ ରାଜନୈତିକ ଦଳର ସମ୍ପର୍କ ଜଣାପଡିବ । ହେଲେ ନିର୍ବାଚନୀ ବଣ୍ଡର ନମ୍ବର ଦିଆଯାଇ ନାହିଁ, ଫଳରେ କିଏ ଦେଲା, ଆଉ କାହାକୁ ଦେଲା, କେତେ ଦେଲା ଜଣାପଡ଼ୁ ନାହିଁ । ଏହାକୁ ନେଇ ପ୍ରଶ୍ନ ଉଠାଇଛନ୍ତି ସୁପ୍ରିମକୋର୍ଟ । ଦିଆଯାଇଥିବା ତଥ୍ୟ ସମ୍ପୂର୍ଣ୍ଣ ନୁହେଁ, ଏନେଇ ଉତର ରଖିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।
କିଏ କାହାକୁ ଦେଇଛି, ଯଦିଓ ଜଣାପଡ଼ି ନାହିଁ, ହେଲେ କିଏ କେତେ ଦେଇଛି ଓ କିଏ କେତେ ପାଇଛି, ସେ ନେଇ ଜଣାପଡ଼ିଛି । ନିର୍ବାଚନୀ ବଣ୍ଡ ଟଙ୍କାରୁ ରାଜନୈତିକ ଦଳଗୁଡ଼ିକ ମାଲାମାଲ ହୋଇଛନ୍ତି । କୋଟି କୋଟି ଟଙ୍କା ଦଳକୁ ଏହି ବଣ୍ଡ ଜରିଆରେ ମିଳିଛି । ସବୁଠୁ ଆଗରେ ଅଛି ବିଜେପି । ବିଜେପିକୁ ମିଳିଛି ୬ ହଜାର ୬୧ କୋଟି । ଦ୍ୱିତୀୟରେ ରହିଛି ମମତା ବାନାର୍ଜୀଙ୍କ ଟିଏମସି । ଟିଏମସିକୁ ୧୬୧୦ କୋଟି ଟଙ୍କା ନିର୍ବାଚନୀ ବଣ୍ଡ ଆକାରରେ ମିଳିଛି । ଏହାତଳକୁ କଂଗ୍ରେସ, ବିଆରଏସ୍, ବିଜେଡି, ଡିଏମକେ, ଆମ୍ ଆଦମୀ ପାର୍ଟି ଓ ଏଆଇଏଡିଏମକେ ରହିଛି । କଂଗ୍ରେସକୁ ୧୪୨୨ କୋଟି ଟଙ୍କା ମିଳିଥିବା ବେଳେ ବିଆରଏସକୁ ୧୨୧୫ କୋଟି ଟଙ୍କା ମିଳିଛି । ସେହିପରି ବିଜେଡିକୁ ୭୭୬ କୋଟି, ଡିଏମକେକୁ ୬୩୯ କୋଟି, ଆପକୁ ୬୫ କୋଟି ଓ ଏଆଇଏଡିଏମକେକୁ ୬ କୋଟି ଟଙ୍କାର ନିର୍ବାଚନୀ ବଣ୍ଡ ମିଳିଛି ।
କେଉଁ ଦଳ କେତେ ଟଙ୍କା ପାଇଛନ୍ତି
ବିଜେପି ୬,୦୬୧ କୋଟି
ଟିଏମସି ୧,୬୧୦ କୋଟି
କଂଗ୍ରେସ ୧,୪୨୨ କୋଟି
ବିଆରଏସ୍ ୧,୨୧୫ କୋଟି
ବିଜେଡି ୭୭୬ କୋଟି
ଡିଏମକେ ୬୩୯ କୋଟି
ଆପ୍ ୬୫ କୋଟି
ଏଆଇଏଡିଏମକେ ୬ କୋଟି
ନିର୍ବାଚନ ବଣ୍ଡରେ ଜଣେ ବ୍ୟକ୍ତି ଅବା ସଂସ୍ଥା ନିଜ ନାମ ଗୋପନ ରଖି ରାଜନୈତିକ ଦଳଗୁଡିକୁ ଚାନ୍ଦା ଦେବାର ବ୍ୟବସ୍ଥା ଥିଲା । ୨୦୧୮ରେ ବିଜେପି ସରକାର ଇଲୋକ୍ଟୋରାଲ ବଣ୍ଡର ବ୍ୟବସ୍ଥା କରିଥିଲେ । ତେବେ ସୁପ୍ରିମକୋର୍ଟ ଗତ ମାସରେ ଏହାକୁ ଅସାମ୍ବିଧାନିକ କହିବା ସହ ନିର୍ବାଚନ ବଣ୍ଡ ସମ୍ପର୍କିତ ସମସ୍ତ ତଥ୍ୟ ନିର୍ବାଚନ କମିଶନଙ୍କ ନିକଟରେ ମାର୍ଚ୍ଚ ୧୨ ତାରିଖ ସୁଦ୍ଧା ପୈଠ କରିବାକୁ ଏସବିଆଇକୁ ନିର୍ଦ୍ଦେଶ ଦେଇଥିଲେ ।