ୟୁସିସିକୁ ନେଇ ବିଜେପିର ହାତ ଛାଡୁଛନ୍ତି ଗୋଟିଏ ପରେ ଗୋଟିଏ ସହଯୋଗୀ ଦଳ, ପିଏମକେ କହିଲା ଏହା ରାଷ୍ଟ୍ରୀୟ ଏକତା ବିରୋଧୀ ଆଇନ
କନକ ବ୍ୟୁରୋ : ସମାନ ନାଗରିକ ସଂହିତା ବା ୟୁସିସି ଲାଗୁ କରିବା କଥା କହୁଥିବା ବିଜେପି ଏବେ ଏହି ମାମଲାରେ ଏକା ପଡିଯାଇଥିବା ନଜରକୁ ଆସିଛି । ୟୁସିସିକୁ ନେଇ ସାରା ଦେଶରେ ବିରୋଧୀଦଳମାନେ ବିରୋଧ କରୁଥିବା ବେଳେ ବିଜେପିର ସହଯୋଗୀ ଦଳମାନେ ବି ଏବେ ସେମାନଙ୍କ ସ୍ୱରରେ ସ୍ୱର ମିଳାଇବା ଆରମ୍ଭ କରିଛନ୍ତି । ଏବେ ବିରୋଧୀଙ୍କ ସ୍ୱରରେ ସ୍ୱର ମିଳାଇଛି ତାମିଲନାଡୁରେ ବିଜେପି ସହ ମେଣ୍ଟ କରିଥିବା ପିଏମକେ । ପିଏମକେ ତରଫରୁ କୁହାଯାଇଛି କି, ୟୁସିସି ରାଷ୍ଟ୍ରୀୟ ଏକତା ଓ ବିକାଶ ବିରୋଧୀ ଆଇନ । ପିଏମକେ ଅଧ୍ୟକ୍ଷ ଡ. ଅମ୍ବୁମଣି ରାମଦାସ ଆଇନ ଆୟୋଗ ଅଧ୍ୟକ୍ଷଙ୍କୁ ଚିଠି ଲେଖି ଜଣାଇଛନ୍ତି କି, ତାଙ୍କ ପାର୍ଟି ୟୁସିସି ଆଇନକୁ ବିରୋଧ କରୁଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ବିଜେପି ସହ ମେଣ୍ଟରେ ଥିବା ଏଆଇଏଡିଏମକେ ମୁଖ୍ୟ ପାଲାନିସ୍ୱାମୀ ବହୁ ପୂର୍ବରୁ ୟୁସିସିକୁ ନେଇ ଦଳର ମତ ସ୍ପଷ୍ଟ କରିଛନ୍ତି । ୨୦୧୯ ଲୋକସଭା ନିର୍ବାଚନ ବେଳେ ଦଳ ତାର ଇସ୍ତାହାରରେ ଉଲ୍ଲେଖ କରିଥିଲା କି ସମାନ ନାଗରିକ ସଂହିତା ପାଇଁ ସମ୍ବିଧାନରେ କୌଣସି ସଂଶୋଧନ ନକରିବାକୁ ସେ କେନ୍ଦ୍ର ସରକାରଙ୍କ ନିକଟରେ ନିବେଦନ କରିବେ । କାରଣ ଭାରତରେ ୟୁସିସି ଲାଗୁହେଲେ ତାହା ଦେଶର ଅଳ୍ପ ସଂଖ୍ୟକଙ୍କ ଧାର୍ମିକ ଅଧିକାର ଉପରେ ଖରାପ ପ୍ରଭାବ ପକାଇବ ବୋଲି ପାଲାନିସ୍ୱାମୀ କହିଛନ୍ତି ।
ପୂର୍ବତ୍ତୋରରେ ବିଜେପିର ସହଯୋଗୀ ଦଳ ନ୍ୟାସନାଲ ପିପୁଲ୍ସ ପାର୍ଟି (ଏନପିପି) ମୁଖ୍ୟ ତଥା ମେଘାଳୟ ମୁଖ୍ୟମନ୍ତ୍ରୀ କାନରଡ ସାଂଗମା ଜୁନ ୩୦ ତାରିଖରେ ୟୁସିସିକୁ ନେଇ ନିଜର ମତ ରଖିଥିଲେ । ସେ କହିଥିଲେ କି ସମାନ ନାଗରିକ ସଂହିତା ଭାରତର ବାସ୍ତବିକ ବିଚାରଧାରର ବିପରିତ ଅଟେ । ଏହା ଦେଶପାଇଁ ଠିକ୍ ନୁହେଁ, ଭାରତ ଏକ ବିବିଧତାପୂର୍ଣ୍ଣ ଦେଶ, ବିବଧତା ଆମର ଶକ୍ତି ବୋଲି ସେ କହିଥିଲେ । ସୂଚନା ଥାଉକି ମେଘାଳୟରେ ବିଜେପି ଓ ଏନପିପିର ମେଣ୍ଟ ସରକାର ରହିଛି ।
ସେହିଭଳି ନାଗାଲ୍ୟାଣ୍ଡରେ ବିଜେପିର ସହଯୋଗୀ ଏନଡିପିପି ମଧ୍ୟ ୟୁସିସି ଲାଗୁ କରିବାକୁ ନେଇ ବିରୋଧ କରିଛି । ଏନଡିପିପି ତରଫରୁ କୁହାଯାଇଛି କି ୟୁସିସି ଦେଶର ଅଳ୍ପ ସଂଖ୍ୟକ ଓ ଆଦିବାସୀ ଲୋକଙ୍କ ସ୍ୱତନ୍ତ୍ରତା ଓ ଅଧିକାର ଉପରେ ନକରାତ୍ମକ ପ୍ରଭାବ ପକାଇବ ।
ଅନ୍ୟପଟେ ପଞ୍ଜାବରେ ବିଜେପିର ସହଯୋଗୀ ଦଳ ଶିରୋମଣୀ ଅକାଳୀ ଦଳ ମଧ୍ୟ ୟୁସିସିକୁ ବିରୋଧ କରିଛି । ଦଳର ଦିଲ୍ଲୀ ରାଜ୍ୟ ମୁଖ୍ୟ ପରମଜିତ ସିଂ ସରନା କହିଛନ୍ତି ବିନା କୌଣସି ଆଲୋଚନାରେ ଆଇନ କମିଶନଙ୍କ ଦ୍ୱାରା ଧାର୍ମିକ ସଂସ୍ଥାମାନଙ୍କ ସହ ସମାନ ନାଗରିକ ସଂହିତା ନେଇ କିଭଳି ପରାମର୍ଶ ମଗାଯାଇପାରିବ ।