୪ମାସ ଧରି ଦରମା ନ ପାଇଁ ଅସନ୍ତୁଷ୍ଟ ପାକିସ୍ତାନ କ୍ରିକେଟ ଖେଳାଳି । ପିସିବିକୁ ଦେଲେ ଧମକ । କହିଲେ, ପିନ୍ଧିବୁ ନାହିଁ ଆୟୋଜକ ଲୋଗୋ ଥିବା ପୋଷାକ
କନକ ବ୍ୟୁରୋ : ଆଇସିସି ବିଶ୍ୱକପ ଆରମ୍ଭ ହେବାକୁ ମାତ୍ର କିଛିଦିନ ବାକି ରହିଛି । ଏହି ବିଶ୍ୱକପରେ ଭାଗ ନେବାକୁ ଥିବା ସମସ୍ତ ଟିମ୍ ଏବେ ଜୋରଦାର ପ୍ରସ୍ତୁତି ଚଳାଇଛନ୍ତି । ହେଲେ ୧୯୯୨ ମସିହାର ବିଶ୍ୱକପ୍ ଚାମ୍ପିଅନ ପାକିସ୍ତାନ ଟିମ୍ ଏବେ ଚର୍ଚ୍ଚାକୁ ଆସିଛି । ରିପୋର୍ଟ ମୁତାବକ ପାକିସ୍ତାନ କ୍ରିକେଟ ବୋର୍ଡ (ପିସିବି) ଓ ଖେଳାଳିଙ୍କ ମଧ୍ୟରେ ହୋଇଥିବା ଚୁକ୍ତିକୁ ନେଇ ୫ ମାସ ହେବ ଲାଗିରହିଥିବା ବିବାଦ ଏବେ ଗମ୍ଭୀର ରୂପ ନେଇଛି । ଖେଳାଳିଙ୍କ ଅଭିଯୋଗ ମୁତାବକ ସେମାନଙ୍କ ପିସିବି ୪ମାସ ହେବ ଦରମା ଦେଇନାହିଁ । ଏହାକୁ ନେଇ ଖେଳାଳିମାନେ ପିସିବିକୁ ସ୍ପଷ୍ଟ କରିଦେଇଛନ୍ତି କି ଯଦି ଦରମା ନ ମିଳେ ତେବେ ଖେଳାଳିମାନେ ଆୟୋଜକଙ୍କ ଲୋଗୋ ଥିବା ପୋଷାକ ପିନ୍ଧିବେ ନାହିଁ ଓ ବିଶ୍ୱକପରେ କୌଣସି ପ୍ରମୋଶନାଲ ଇଭେଣ୍ଟରେ ଭାଗ ନେବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ସୋମବାର ଦିନ କିଛି ଗଣମାଧ୍ୟମ ରିପୋର୍ଟରେ ଦାବି କରାଯାଇଛି କି ସମସ୍ୟାର ସମାଧାନ ପାଇଁ ପିସିବି ମୁଖ୍ୟ ଜକା ଅଶରଫ ମୁଖ୍ୟ ଚୟନକର୍ତ୍ତା ଇଂଜାମାମ ଓଲ ହକଙ୍କ ସହାୟତା ଲୋଡିଛନ୍ତି । ହେଲେ ଏନେଇ ଇଂଜାମାମ କିମ୍ବା ଜକା ଅଶରଫଙ୍କ ତରଫରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ ।
ଖେଳାଳିମାନେ ଦରମା ନ ପାଇଥିବାରୁ ଅସନ୍ତୁଷ ଜାହିର କରିଛନ୍ତି । ଏହାସହ କିଛି ଖେଳାଳି କିଛି କ୍ରିକେଟ ଲିଗ୍ ଖେଳି ନିଜର ଗୁଜରାଣ ମେଣ୍ଟାଉଛନ୍ତି । ହେଲେ ପିସିବି କହିଛି କି ଯଦି ଦେଶର ଖେଳାଳିମାନେ କ୍ରିକେଟ ଲିଗ ଖେଳିବେ ତେବେ ପ୍ରଥମେ ପିସିବି ଠାରୁ ଅନୁମତି ନେବେ ଓ ଲିଗରୁ ଯାହା ରୋଜଗାର କରୁଛନ୍ତି ତାହାର ହିସାବ ପିସିବିକୁ ଦେବାକୁ ପଡିବ । ହେଲେ ଏନେଇ ଖେଳାଳିମାନେ ଅସହମତ ପ୍ରକାଶ କରିଛନ୍ତି ।