ଏସିଆ କପ ଜିତିଲା ଶ୍ରୀଲଙ୍କା: ଏହି କ୍ରିକେଟର କହିଲେ, କପ ଜିତିବା ପାଇଁ ଦରକାର ନାହିଁ ବିଶ୍ୱସ୍ତରୀୟ କ୍ରିକେଟର, ଆମେ ୧୧ ଭାଇ ଯଥେଷ୍ଟ
କନକ ବ୍ୟୁରୋ: ପାକିସ୍ତାନକୁ ହରାଇ ଏସିଆ କପ ହାତେଇଛି ଶ୍ରୀଲଙ୍କା ଦଳ । ଯେଉଁ ଦଳ କିଛି ଦିନ ତଳେ ଗୋଟେ ଦୁର୍ବଳ ଦଳ ଭାବେ ପରିଚୟ ପାଇଥିଲା । ସେହି ଦଳ ଆଜି ଭାରତ, ପାକିସ୍ତାନ ଭଳି ଟିମକୁ ମାତ ଦେଇ ଚାମ୍ପିୟନ ହୋଇଛି । ଦେଶର ବିଭିନ୍ନ ସମସ୍ୟା ମଧ୍ୟରେ ଦେଶକୁ ଏକ ବଡ ବିଜୟ ଭେଟି ଦେଇଛି ଶ୍ରୀଲଙ୍କା ଟିମ । ତେବେ ଏହି ବିଜୟ ପରେ ଶ୍ରୀଲଙ୍କା ଟିମ ପୁଣି ସେହି ପୁରୁଣା ଟିମ ହୋଇ ଫେରିଛି ବୋଲି କ୍ରିକେଟ ଫ୍ୟାନମାନେ ମତ ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ବିଜୟ ପରେ ଶ୍ରୀଲଙ୍କା କ୍ରିକେଟର ମହେଶ ତିକ୍ଷସାନାଙ୍କ ଏକ ଟ୍ୱିଟ ବଡ ବଡ ଟିମଙ୍କ ପାଟି ଚୁପ କରିଦେଇଛି । ଏକ ଟ୍ୱିଟ କରି ମହେଶ କହିଛନ୍ତି, ଯେବେ ଯାଏଁ ଆମେ ୧୧ ଭାଇ ଅଛୁ, ଆମକୁ କୌଣସି ବିଶ୍ୱସ୍ତରୀୟ କ୍ରିକେଟଙ୍କ ଆବଶ୍ୟକତା ନାହିଁ । ମହେଶ ତିକ୍ଷସାନାଙ୍କ ଟ୍ୱିଟ ଅନେକଙ୍କ ହୃଦୟ ଜିତିଛି । ଶ୍ରୀଲଙ୍କାକୁ ଷଷ୍ଠ ଥର ପାଇଁ ଚାମ୍ପିୟନ କରିବାରେ ମହେଶଙ୍କ ବେଶ ଅବଦାନ ରହିଥିଲା ।
୨୦୨୨ ଏସିଆକପ ଶ୍ରୀଲଙ୍କାରେ ଅନୁଷ୍ଠିତ ହୋଇଥାନ୍ତା । ହେଲେ ଦେଶରେ ସୃଷ୍ଟି ହୋଇଥିବା ସମସ୍ୟା ଯୋଗୁଁ ଏହା ସମ୍ଭବ ହୋଇପାରିନଥିଲା । ତେଣୁ ଏହାକୁ ଦୁବାଇରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା । ଆଉ ଏହି ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ କେହି କେବେ ଭାବି ନଥିଲେ ଶ୍ରୀଲଙ୍କା ଚାମ୍ପିୟନ ହେବ । ମ୍ୟାଚ ପୂର୍ବରୁ ଟିଭିରେ ହୋଇଥିବା ଫ୍ୟାନ ଭୋଟିଂରେ ଶ୍ରୀଲଙ୍କାକୁ କେହି ବି ଭୋଟ ଦେଇନଥିଲେ । ଏମିତିକି ଆଫଗାନିସ୍ତାନଠାରୁ ବି ଶ୍ରୀଲଙ୍କାକୁ ଦୁର୍ବଳ ଦଳ ବୋଲି ଲୋକେ ଭାବିଥିଲେ । ହେଲେ ଶ୍ରୀଲଙ୍କା ସମସ୍ତଙ୍କୁ ଶିଖାଇଲା କେମିତି ଗୋଟିଏ ଅପ୍ରିତିକର ପରିସ୍ଥିତିରେ ସମୟ ସହ ଲଢାଯାଏ । ଯଦି ମନରେ ଜୋସ ଥିବ ତେବେ ତୁମକୁ ଜିତିବାରୁ କେହି ବି ରୋକିପାରିବେନି ।
ସେପ୍ଟେମ୍ବର ୧୧ରେ ହୋଇଥିବା ଏସିଆ କପ ଫାଇନାଲ ମ୍ୟାଚରେ ଶ୍ରୀଲଙ୍କା ସମସ୍ତଙ୍କୁ ଚକିତ କରି ଚାମ୍ପିୟନ ହୋଇଥିଲା । ଏହି ମ୍ୟାଚରେ ପାକିସ୍ତାନ ଟସ ଜିତି ବୋଲିଂ ନିଷ୍ପତ୍ତି ନେଇଥିଲା । ଆଉ ବ୍ୟାଟିଂ କରିଥିଲା ଶ୍ରୀଲଙ୍କା । ଆରମ୍ଭରୁ ଶ୍ରୀଲଙ୍କା ଦଳ ଭଲ ପ୍ରଦର୍ଶନ କରିପାରିନଥିଲା । ୫୮ ରନରେ ଦଳ ୫ ୱିକେଟ ହରାଇ ସାରିଥିଲା । ଏହାପରେ ରାଜପକ୍ଷ ୭୧ ଓ ହସରଙ୍ଗାଙ୍କ ୩୬ ରନ ବଳରେ ଶ୍ରୀଲଙ୍କା ୧୭୦ ରନ କରିଥିଲା । ୧୭୧ ରନର ବିଜୟ ଲକ୍ଷ୍ୟର ପିଛା କରି ପାକିସ୍ତାନ ପୂରା ଟିମ ୧୪୭ ରନରେ ଅଲଆଉଟ ହୋଇଯାଇଥିଲା ।
ଏସିଆ କପ ଆରମ୍ଭର ପ୍ରଥମ ମ୍ୟାଚରେ ଶ୍ରୀଲଙ୍କା ଆଫଗାନିସ୍ତାନଠାରୁ ପରାସ୍ତ ହୋଇଥିଲା । ଏହାପରେ ଦଳ ଗୋଟିଏ ବି ମ୍ୟାଚରେ ପରାଜିତ ହୋଇନି ବରଂ ବଡ ବଡ ଟିମକୁ ପାଣି ପିଆଇଦେଇଛି । ଏହାସହ ଶ୍ରୀଲଙ୍କା ଷଷ୍ଠ ଥର ପାଇଁ ଏହି ଟାଇଟଲ ହାତେଇଛି । ସେହିପରି ଭାରତ ୭ ଥର ଏସିଆ କପ ବିଜୟୀ ହୋଇ ପ୍ରଥମ ସ୍ଥାନରେ ରହିଛି ।