ଭାରତ ଫେରିବା ବ୍ୟତୀତ ନୀରବ ମୋଦୀଙ୍କ ପାଖରେ ଆଉ କିଛି ନାହିଁ ବିକଳ୍ପ । ପ୍ରତ୍ୟାର୍ପଣ ବିରୋଧୀ ଆବେଦନକୁ ଲଣ୍ଡନ ସୁପ୍ରିମକୋର୍ଟ କଲେ ଖାରଜ
କନକ ବ୍ୟୁରୋ : ପଳାତକ ନୀରବ ମୋଦୀ ଏବେ ଭାରତ ଫେରିବାକୁ ବାଧ୍ୟ ହେବେ । କାରଣ ଭାରତ ନଫେରିବା ନେଇ ସେ ଲଣ୍ଡନ ସୁପ୍ରିମକୋର୍ଟରେ କରିଥିବା ଆବେଦନକୁ କୋର୍ଟ ଖାରଜ କରିଦେଇଛନ୍ତି । ଏବେ ତାଙ୍କ ପାଖରେ ଆଇନଗତ ଭାବେ ଅନ୍ୟ କିଛି ବିକଳ୍ପ ନଥିବାରୁ ସେ ଭାରତ ଫେରିବା ପ୍ରାୟ ତ ନିଶ୍ଚିତ ହୋଇଛି । ହେଲେ କୁହାଯାଉଛି କି ତାଙ୍କ ପାଖରେ ଏବେ ଗୋଟିଏ ମାତ୍ର ଆଇନଗତ ବିକଳ୍ପ ରହିଛି । କୁହାଯାଉଛି କି, ସେ ୟୁରୋପର ମାନବାଧିକାର କୋର୍ଟରେ ଭାରତ ନଫେରିବା ନେଇ ଆବେଦନ କରିପାରନ୍ତି । ହେଲେ ଏହି ବିକଳ୍ପ ତାଙ୍କ ପାଇଁ ସେତେଟା ଲାଭଦାୟକ ହେବ ନାହିଁ ବୋଲି ଆଇନ ବିଶାରଦମାନେ ମତ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ଭାରତ ସରକାରଙ୍କ ତରଫରୁ ବ୍ରିଟିସ ସୁପ୍ରିମକୋର୍ଟରେ ନୀରବ ମୋଦୀ ପ୍ରତ୍ୟାର୍ପଣ ବିରୋଧରେ କରିଥିବା ଆବେଦନକୁ ଖାରଜ କରିବାକୁ ଅନୁରୋଧ କରିଥିଲେ । ବ୍ରିଟେନ କୋର୍ଟରେ ଭାରତ ସରକାରଙ୍କ ତରଫରୁ ଆଇନଗତ ଲଢେଇ ଲଢୁଥିବା କ୍ରାଉନ ପ୍ରସିକ୍ୟୁସନ ସର୍ଭିସ ଅଦାଲତରେ ନୀରବ ମୋଦୀଙ୍କ ବିରୋଧରେ ଜବାବ ଦାଖଲ କରିଥିଲେ ।
ଏହା ପୂର୍ବରୁ ବ୍ରିଟେନ ହାଇକୋର୍ଟ ବି ନୀରବ ମୋଦୀଙ୍କ ପ୍ରତ୍ୟାର୍ପଣ ବିରୋଧୀ ଆବେଦନକୁ ଖାରଜ କରି କହିଥିଲେ କି, କାହାର ଆଚାର ବ୍ୟବହାର ଦେଖି ପ୍ରତ୍ୟାର୍ପଣ ବିରୋଧରେ ନିର୍ଣ୍ଣୟ ନିଆଯାଇପାରିବ ନାହିଁ । ଏହାପରେ ନୀରବ ମୋଦୀ ବ୍ରିଟେନ ସୁପ୍ରିମକୋର୍ଟରେ ଆବେଦନ କରିଥିଲେ । ହେଲେ ଏବେ ସୁପ୍ରିମକୋର୍ଟ ବି ତାଙ୍କ ଆବେଦନକୁ ଖାରଜ କରିବା ପରେ ଭାରତ ଫେରିବାକୁ ବାଧ୍ୟ ହୋଇପାରନ୍ତି ଏହି ପଳାତକ ନୀରବ ମୋଦୀ ।
ସୂଚନା ଥାଉକି ଭାରତରେ ହୀରା ବ୍ୟବସାୟ କରୁଥିବା ନୀରବ ମୋଦୀ ଦେଶର ବିଭିନ୍ନ ବ୍ୟାଙ୍କରୁ ୧୩ ହଜାର କୋଟି ଟଙ୍କାରୁ ଅଧିକ ଋଣ ନେଇ ଫେରାର ହୋଇଯାଇଛନ୍ତି । ଏଥି ମଧ୍ୟରୁ କେବଳ ପଞ୍ଜାବ ନ୍ୟାସନାଲ ବ୍ୟାଙ୍କରୁ ୧୧ ହଜାର କୋଟି ଟଙ୍କାରୁ ଅଧିକ ଋଣ ନେଇଛନ୍ତି ।