୫୦ ଦିନରେ କାହିଁକି ଆତ୍ମହତ୍ୟା କଲେ ୧୨ ଚାଷୀ ! ରାଜ୍ୟ ସରକାରଙ୍କୁ ଜାତୀୟ ମାନବାଧିକାର କମିଶନଙ୍କ ନୋଟିସ, ୪ ସପ୍ତାହ ମଧ୍ୟରେ ଉତ୍ତର ରଖିବାକୁ ନିର୍ଦ୍ଦେଶ
କନକ ବ୍ୟୁରୋ : ଗୋଟିଏ ପଟେ ଚାଷୀ ଆତ୍ମହତ୍ୟାକୁ ନେଇ ରାଜ୍ୟ ରାଜନୀତିକୁ ଉଷ୍ମ କରିଥିବା ବେଳେ ଅନ୍ୟପଟେ ଚାଷୀ ଆତ୍ମହତ୍ୟା ଘଟଣାକୁ ଗୁରୁତ୍ୱ ଦେଇଛନ୍ତି ଜାତୀୟ ମାନବାଧିକାର କମିଶନ । ଗଣମାଧ୍ୟମରେ ପ୍ରକାଶିତ ଖବର ଆଧାରରେ ଏନେଇ ରାଜ୍ୟ ସରକାରଙ୍କୁ ନୋଟିସ ଜାରି କରିଛନ୍ତି କମିଶନ । ବରଗଡର ଚାଷୀ ମୃତ୍ୟୁ ଘଟଣାର ମାତ୍ର ୫୦ ଦିନ ଭିତରେ କେଉଁ ପରିସ୍ଥିତିରେ ରାଜ୍ୟର ୧୨ ଜଣ ଚାଷୀଆତ୍ମହତ୍ୟା କଲେ ବୋଲି ମୁଖ୍ୟ ଶାସନ ସଚିବଙ୍କୁ ଜବାବ ତଲବ କରିଛନ୍ତି ଏନଏଚଆରସି । ଏନେଇ ୪ ସପ୍ତାହ ମଧ୍ୟରେ ଉତର ରଖିବାକୁ ଜାତୀୟ ମାନବାଧିକାର କମିଶନ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଥିରେ କମିଶନ, ପ୍ରଭାବିତ ପରିବାରଙ୍କ ଥଇଥାନ ଏବଂ ସହାୟତା ପାଇଁ କଣ ପଦକ୍ଷେପ ନିଆଯାଇଛି ତାହା ମଧ୍ୟ ଜଣାଇବାକୁ କହିଛନ୍ତି । କେବଳ ଓଡିଶା ନୁହେଁ ଦେଶର ବିଭିନ୍ନ ଅଂଚଳରେ ଚାଷୀ ଓ କୃଷି ଶ୍ରମିକ ଆତ୍ମହତ୍ୟା କରୁଥିବା ଚିନ୍ତାର ବିଷୟ ବୋଲି କମିଶନ କହିଛନ୍ତି । ମହାରାଷ୍ଟ୍ର, ଆନ୍ଧ୍ର ପ୍ରଦେଶ, କର୍ଣ୍ଣାଟକ, ମଧ୍ୟପ୍ରଦେଶ, କେରଳ, ଛତିଶଗଡ, ତାମିଲନାଡୁ ଓ ଉତର ପ୍ରଦେଶ ଆଦି ରାଜ୍ୟରେ ଚାଷୀ ଆତ୍ମହତ୍ୟା ହେଉଥିବା ବେଳେ ଏନେଇ ରାଜ୍ୟ ଓ କେନ୍ଦ୍ର ସରକାର ଅଧିକ ତ୍ୱରାନ୍ୱିତ ଭାବେ ପଦକ୍ଷେପ ନେବା ଜରୁରୀ ବୋଲି ଜାତୀୟ ମାନବାଧିକାର କମିଶନ ଗୁରୁତ୍ୱ ଦେଇଛନ୍ତି ।