ମହାରାଷ୍ଟ୍ର ହାଇଡ୍ରାମା ଭିତରେ ପ୍ରଫୁଲ ପଟେଲଙ୍କ ବଡ ବୟାନ । କହିଲେ, ୫୪ର ୫୧ ଏନସିପି ବିଧାୟକ ଚାହୁଁଥିଲେ ବିଜେପି ସହ ସରକାର । ଏନସିପି ନେତା ନେଇପାରିଲେନି ସଠିକ୍ ନିଷ୍ପତ୍ତି ।
କନକ ବ୍ୟୁରୋ: ମହାରାଷ୍ଟ୍ର ରାଜନୀତିର ହାଇଡ୍ରାମା ଭିତରେ ଏବେ ସବୁଠୁ ବଡ ରାଜନୈତିକ ସଙ୍କଟ ଦେଇ କରୁଛି ଶରଦ ପାୱାରଙ୍କ ଦଳ ଏନସିପି । ପୁତୁରା ଅଜିତ ପାୱାରଙ୍କ ସହ ଦଳର ତମାମ ବଡ ବଡ ନେତା ତାଙ୍କୁ ଛାଡି ଯାଇ ବିଜେପି ସରକାର ସହ ମିଶିବା ପରେ ଏବେ ବ୍ୟାକଫୁଟରେ ଶରଦ ପାୱାର । ଖାଲି ସେତିକି ନୁହେଁ, ଦଳର ନେତା ତଥା ସାଂସଦ ପ୍ରଫୁଲ ପଟେଲ ବି ଏବେ ଅଜିତଙ୍କ ସହ ଅଛନ୍ତି । ତେବେ ଏହାରି ଭିତରେ ଏନସିପି ସାଂସଦ ପ୍ରଫୁଲ ପଟେଲ ଏକ ବଡ ବୟାନ ଦେଇଛନ୍ତି । ସେ କହିଛନ୍ତି ଯେ, ଗତବର୍ଷ ଯେତେବେଳେ ଏମବିଏ ସରକାର ଭାଙ୍ଗିଥିଲା । ସେତେବେଳେ ଏନସିପିର ୫୪ ଜଣରୁ ୫୧ ଜଣ ବିଧାୟକ ବିଜେପି ସହ ମିଶି ସରକାର ଗଢିବାକୁ ଇଚ୍ଛା ରଖିଥିଲେ । ଯାହାକି ସମ୍ଭବ ହେଇନଥିଲା ।
Kanak News is now on WhatsApp
Join and get latest news updates delivered to you via WhatsApp
ଏକ ଜାତୀୟ ଗଣମାଧ୍ୟମକୁ ପ୍ରତିକ୍ରିୟା ଦେଇ ଏନସିପି ନେତା ପ୍ରଫୁଲ ପଟେଲ କହିଛନ୍ତି ଯେ, ସେତବେଳେ ଆମ ପାଖରେ ଏକ ମୌକା ଥିଲା । ହେଲେ ସେତେବେଳେ ଆମ ନେତା ସଠିକ୍ ସମୟରେ ସଠିକ୍ ନିଷ୍ପତ୍ତି ନେଇପାରିନଥିଲେ । ଏହାପରେ ଏକନାଥ ସିନ୍ଦେ ମୌକାର ସୁଯୋଗ ନେବା ସହିତ ଦେବେନ୍ଦ୍ର ଫଡନାବିସଙ୍କ ସହ ମିଶି ସରକାର ଗଠନ କରିଥିଲେ ।
ପ୍ରଫୁଲ ପଟେଲ ଏହି ଇଣ୍ଟରଭ୍ୟୁ ବେଳେ କହିଛନ୍ତି ଯେ, ଏନସିପିର ଏକାଧିକ ବିଧାୟକଙ୍କ ସହ ଦଳର ନେତା ଏବଂ କର୍ମୀମାନେ ବିଜେପି ସହ ମିଶି ସରକାରରେ ସାମିଲ ହେବାକୁ ଇଚ୍ଛା ରଖିଥିଲେ । ସରକାର ସହ ରହି ଏନସିପି ନେତାମାନେ ନିଜ ନିଜ କ୍ଷେତ୍ରର ବିକାଶ କରିବାକୁ ଚାହୁଁଥିଲେ, ହେଲେ ଏନସିପି ନେତା କିନ୍ତୁ ସଠିକ୍ ସମୟରେ ସଠିକ୍ ନିଷ୍ପତ୍ତି ନେବାକୁ ଅକ୍ଷମ ହେଇଥିଲେ ।
ଅନ୍ୟପଟେ ପ୍ରଫୁଲ ପଟେଲ କ୍ୟାବିନେଟ୍ ବିସ୍ତାର କଥା କହିବା ସହ, ଆଗାମୀ ଦିନେ ଦୁଇଦିନ ଭିତରେ ବିଭାଗ ବଣ୍ଟନ ହେଇଯିବ ବୋଲି ସୂଚନା ଦେଇଛନ୍ତି । ଏହାପରେ ଶିବସେନା(ସିନ୍ଦେ ଗୋଷ୍ଠୀ), ବିଜେପି ଏବଂ ଏନସିପି (ଅଜିତ ପାୱାର ଗୋଷ୍ଠୀ)ର ଅନ୍ୟ ବିଧାୟକଙ୍କୁ କ୍ୟାବିନେଟରେ ସ୍ଥାନ ଦିଆଯିବ । ସୂଚନାଯୋଗ୍ୟ ଯେ, ପ୍ରଫୁଲ ପଟେଲ ହେଉଛନ୍ତି ସେହି ନେତା, ଯାହାଙ୍କୁ କି ଶରଦ ପାୱାରଙ୍କ ଏକାନ୍ତ ଅନୁଗତ ବୋଲି କୁହାଯାଏ । ଗତମାସରେ ହିଁ ଶରଦ ପାୱାର ସୁପ୍ରିୟା ସୁଲେଙ୍କୁ କାର୍ଯ୍ୟକାରୀ ଅଧ୍ୟକ୍ଷ ବନେଇବା ପରେ ଏବେ ଅଜିତଙ୍କ ସହ ହାତ ମିଲାଇଛନ୍ତି ପ୍ରଫୁଲ ପଟେଲ ।